2 KINANƆ 22

Yudanↄ kí Yosia

1 Yosia wɛ̃̀ sↄraagↄ̃dee guun à kí blè, ben à vɛ̃̀ɛ kpatan Yerusalɛmu wɛ̃̀ baaakuri awɛɛdo. À da tↄ́n Yedida, Adaya nɛ́, Bↄzↄka gbɛ̃mɛ. 2 À yã kɛ̀ Dii yezi kɛ̀ à a dezi Dauda zɛ́kpaɛ sɛ̀ píngi, èe pãnɛ ↄplazi ke ↄzɛziro. 3 À kíblena wɛ̃̀ baro plaasaidee guun à a takadakɛ̃ri Safana, Azalia nɛ́, Mɛsulamu dio zĩ̀ Dii ua à bè: 4 Ǹ gá sa'oriki Ilikia kiia ǹ onɛ à ↄↄ kɛ̀ wà mↄ̀o Dii ua kɛ̀ zɛ́dãkparinↄ sì ń ↄzĩ naro 5 à na gbɛ̃ kɛ̀ wà ń díɛ Dii ua zĩkɛrinↄ gbɛ̃nsi ũunↄnɛ ń ↄzĩ, aↄ̃ fĩa boo gbɛ̃ kɛ̀ aↄ̃ↄe kpɛ́ pì guu kɛ̀ yàkanↄ kɛkɛɛnↄnɛ, 6 lí'arinↄ kↄ̃n kpɛ́borinↄ kↄ̃n gbɛ̀'arinↄ. Wà lí lúo dↄ kↄ̃n gbɛ̀ ananↄ wà kpɛ́ pì kɛkɛo. 7 Wàton gbeka lán aↄ̃ ↄↄ kɛ̀ wà nàńnɛ ń ↄzĩ pì blè nàro, zaakɛ gbɛ̃ náanɛdeenↄmɛ.

8 Sa'oriki Ilikia bè takadakɛ̃ri Safananɛ a bↄ Musa doka takadaa Dii ua, ben à kpàa. Kɛ̀ à à kyó kɛ̀, 9 ben à gàa kína kiia à à yã gbã̀nɛ à bè: N ìbanↄ ↄↄ kɛ̀ kú Dii ua bↄ̀ɛ wà nà ua zĩkɛrinↄ gbɛ̃nsinↄnɛ ń ↄzĩ. 10 À ɛ̀ara à bènɛ sa'ori Ilikia takada kpàawa, ben à à kyó kɛ̀ kínanɛ. 11 Kɛ̀ kína Musa doka takada pì yã mà, ben à a utadaa gà à kɛ̃̀. 12 Ben à bè sa'ori Ilikianɛ kↄ̃n Safana nɛ́ Aikamuo kↄ̃n Mikaya nɛ́ Akaboo kↄ̃n takadakɛ̃ri Safanao kↄ̃n a ìba Asayao à bè: 13 À gá gbekamɛ Diia Yudanↄnɛ ń píngi takada kɛ̀ wà bↄ̀a kɛ̀ yã musu. Dii pↄ fɛ̃̀wazi à kɛ̀ bíta, zaakɛ wa dezinↄ e wa yã kɛ̀ kú takada kɛ̀ guu ma wà zĩi kɛ̀aro. 14 Ben sa'ori Ilikia kↄ̃n Aikamuo kↄ̃n Akaboo kↄ̃n Safanao kↄ̃n Asayao gàa wà yã pì ò nↄgbɛ̃ annabi Uludanɛ. Nↄgbɛ̃ pì kú Yerusalɛmu fáandi plaadee guumɛ, à zã tↄ́n Salumu, Tikiva nɛ́, Arasa diomɛ. Arasan Dii ua utakaɛki dãkpari ũ. 15 Dii Isarailinↄ Luda yã sù nↄgbɛ̃ pìa à bè: À gá à o gbɛ̃ kɛ̀ à a zĩmaanɛ, 16 mamↄma Dii ma bè mɛ́ mↄ́nzi kpá gu kɛ̀kiizi kↄ̃n gbɛ̃ kɛ̀ aↄ̃ↄ kúnnↄ lán à kú takada kɛ̀ Yudanↄ kína à kyó kɛ̀ pì guu nà. 17 Mɛ́ pↄfɛ̃ pita gu kɛ̀kiia, ma pↄfɛ̃ pì é kpáɛro, zaakɛ aↄ̃ ma ton aↄ̃ tuaetiti kpàta tãanↄa aↄ̃ ma pↄↄ fɛ̃̀mɛ tãa kɛ̀ aↄ̃ↄ kɛ̀ pìnↄ yãnzi. 18 À o Yudanↄ kína kɛ̀ à a zĩ à gbekamaanɛ, yã kɛ̀ à mà pì musu, mamↄma Dii Isarailinↄ Luda ma bè 19 yã kɛ̀ má ò guu kɛ̀kiia kↄ̃n gbɛ̃ kɛ̀ aↄ̃ↄ kúnnↄ, ma bè eé gↄ̃ bɛzĩ ũ kana pↄ́ ũmɛ, zaakɛ à swɛ̃̀ kpà yã pìa à a zĩnda bùsa à a utadaa gà à kɛ̃̀ à ↄ́ↄ dↄ̀, beee yãnzin ma à yã màzi. Mamↄma Dii mámbe má ò. 20 Beee yãnzin mɛ́ tó à ga, weé à vĩi yĩiyĩi. Eé wɛ́ɛ si mↄ́nzi kɛ̀ mɛ́ kpá guu kɛ̀zilɛro. Ben zĩ̀ri pìnↄ ɛ̀ara wà tà kína kiia kↄ̃n yã pìo.

<- 2 KINANƆ 21 2 KINANƆ 23 ->