1 SAMUƐLI 16

Samuɛli nↄ́sikuna Dauda mìa

1 Dii bè Samuɛlinɛ: Nɛ́gↄ̃ ↄ́ↄ dↄↄ Solu yã musu ai bↄrɛmɛ? Ma ginɛ à kí ble Isarailinↄnɛ. Ǹ nↄ́si ká koban à pa ǹ da zɛ́n. Ma n zĩ Bɛtɛlɛmu gbɛ̃ Yɛsɛ kiia, zaakɛ à nɛ́nↄ doken má sɛ̀ à gↄ̃ kí ũ. 2 Ben Samuɛli bè: Dian mɛ́ kɛ nà mà gá gwee? Tó Solu mà, eé ma dɛ. Ben Dii bènɛ: Ǹ zùnunu sɛ́ ǹ gáo ǹ be n mↄ ma gbãgbãmɛ. 3 Ǹ Yɛsɛ sísi saa pì onaa, mɛ́ yã kɛ̀ nɛ́ kɛɛ onnɛ, nɛ́ nↄ́si kúmɛ gbɛ̃ kɛ̀ mɛ́ ↄdↄannɛɛ mìa.

4 Samuɛli yã kɛ̀ Dii ònɛ kɛ̀. Kɛ̀ èe kaa Bɛtɛlɛmu, lakutu pì gbɛ̃nsinↄ gàa wà dààlɛ. Vĩa ń kũ, ben aↄ̃ à là wà bè: Aafian n mↄ kɛ̀ↄ́? 5 À bè: Aafiamɛ. Ma mↄ Dii gbãgbãmɛ. À gbãsĩ bↄ a zĩndan à gámao saa o. Ben à gbãsĩ bↄ̀ Yɛsɛn kↄ̃n a nɛ́gↄ̃gbɛ̃nↄ à ń sísi sa'onaa. 6 Kɛ̀ aↄ̃ kà, Samuɛli Ɛliabu è, ben à laasuu lɛ̀ à bè: Gbɛ̃ kɛ̀ Dii sɛ̀ bé à zɛna à aɛ gwe. 7 Ben Dii bènɛ: Ǹton à zɛna ke à gbã̀akɛɛ gwaro, ma gizimɛ. Mɛɛ̀ gbɛ̃ gwa lán gbɛ̃ntee è gwa nàro. Gbɛ̃ntee è gbɛ̃ gwa a mɛ̀amɛ, mapi sↄ̃, swɛ̃̀n mɛɛ̀ gwa. 8 Ben Yɛsɛ Abinadabu sìsi, à mↄ̀ Samuɛli aɛ, ben à bè: Dii e gbɛ̃ kɛ̀kii sɛ́ro. 9 Ben Yɛsɛ Sama sìsi, à mↄ̀ Samuɛli aɛ dↄ, ben à bè: Dii e gbɛ̃ kɛ̀kii sɛ́ro. 10 Ben Yɛsɛ a nɛ́gↄ̃gbɛ̃ gↄ̃ↄn swɛɛplaaanↄ sìsi, aↄ̃ mↄ̀ Samuɛli aɛ, ben à bè: Dii e ń gbɛ̃ke sɛ́ro. 11 Ben à Yɛsɛ là à bè: N gↄ̃kparɛnↄ lɛ́n yɛ̀ ń píngiↄ́? À wèàla à bè: Aↄ̃ gbɛ̃ zãadee bé à kú kɛ̀ro, èe sãa dãamɛ. Ben Samuɛli bènɛ: Ǹ gbɛ̃ zĩ wà à sísi. Wé pↄ́ke kɛro séto à sù. 12 Ben à gbɛ̃ zĩ̀a, à mↄ̀. Nɛ́ pì nɛ́ gbɛ̃ tɛ̃aamɛ, à zɛna maa bensↄ̃ à uu kɛ̃kↄ̃ana. Ben Dii bè: Ǹ fɛɛ ǹ nↄ́si kú à mìa, zaakɛ àpin gwe. 13 Ben Samuɛli koba pì sɛ̀ à nↄ́si kù à mìa à vĩ̀inↄ wáa. Zaa zĩ beeean Dii Nini sù Daudaa. Beee gbɛra Samuɛli ɛ̀ara à tà Rama.

Dauda zĩkɛna Solunɛ

14 Dii Nini gò Solua, ben Dii tò zĩn pãsĩ sùa. 15 À ìbanↄ bènɛ: Ludaa tò zĩn pãsĩ e wɛ́ɛ tãamma. 16 Kí, ǹ tó wamↄwa n ìbanↄ gbɛ̃ kɛ̀ mↄrↄlɛna dↄ̃ↄ wɛtɛ. Tó Ludaa tò zĩn pãsĩ pì sùmma, eégae mↄrↄ lɛ́nnɛ, ǹgae e ǹ kɛ sã̀ↄ. 17 Ben à bè a ìbanↄnɛ. À gbɛ̃ kɛ̀ mↄrↄlɛna dↄ̃ maamaa wɛtɛ à mↄ́omɛ. 18 Ben à ìbanↄ doke bènɛ: Ma Bɛtɛlɛmu gbɛ̃ Yɛsɛ nɛ́ ke è, à mↄrↄlɛna dↄ̃. Zĩ̀kpɛ wↄ́rↄngↄdeemɛ, bensↄ̃ à yã'ona dↄ̃. Gↄ̃ maaamɛ, bensↄ̃ Dii kúo. 19 Ben Solu gbɛ̃nↄ zĩ̀ Yɛsɛa, aↄ̃ gàa wà bènɛ: Solu bè ǹ n nɛ́ Dauda kɛ̀ è sãanↄ dã gbarɛare.

20 Ben Yɛsɛ burɛdi dì zaakinɛ kↄ̃n geepiwɛ̃ɛo tùu do kↄ̃n blèkofĩinɛ bↄ̀rↄo, à a nɛ́ Dauda gbàrɛo Solua. 21 Kɛ̀ à kà Solu kiia, à gↄ̃̀ à zĩkɛri ũ. Solu yezi maamaa, ben à à dìɛ a zĩ̀kapↄnↄsɛrinↄ doke ũ. 22 Ben Solu gbɛ̃ zĩ̀ Yɛsɛa à bè: Ǹ tó Dauda gↄ̃ ma zĩkɛri ũ, zaakɛ à yã è kɛmɛ nna. 23 Tó Ludaa tò zĩn pì sù Solua, ben Dauda è a mↄrↄ sɛ́ àgↄ̃ lɛɛnɛ. Tó zĩn pì gòa, ben è kɛ sã̀ↄ, à su a làakaria.

<- 1 SAMUƐLI 15 1 SAMUƐLI 17 ->