1 YOHANA 2

1 Ma nɛ́ yenzideenↄ, mɛ́ɛ yã beee ooare, lɛ àton durun kɛro yãnzimɛ. Mↄde tó a gbɛ̃ke durun kɛ̀, wá zɛnyodee vĩ De Luda kiia, àmbe taarisaide Yesu Kirisi ũ. 2 Àmbe wa durunnↄ agbaakpabↄ ũ. Èe kɛ wa durunnↄn adoro, kↄ̃n anduna píngi gbɛ̃nↄ pↄ́omɛ.

3 Tó wá yã kɛ̀ à dìɛnↄ kũna, beee ↄ̀dↄawe yãpura kɛ̀ wá à dↄ̃. 4 Tó gbɛ̃ bè á à dↄ̃, ben à à yã kɛ̀ à dìɛnↄ kũnaro, ɛgɛdeemɛ, yãpuraa kú à swɛ̃̀ guuro. 5 Gbɛ̃ kɛ̀ à à yã kũna sↄ̃, Luda yenzi papana à guu yãpura. Pↄ́ kɛ̀ eé tó wà dↄ̃ kɛ̀ wá kú à guun yɛ̀: 6 Gbɛ̃ kɛ̀ bè á kú à guu, séde àgↄ̃ kuu lán Kirisi kuu nà yã.

Yã dufu diɛna

7 Ma gbɛ̃ yenzideenↄ, èe kɛ yã dufun mɛ́ɛ ooarero, yã zii kɛ̀ wà dìɛare zaa káakumɛ. Yã zii pìn yã kɛ̀ á mà ũ. 8 Baa kↄ̃n beeeo yã kɛ̀ mɛ́ɛ ooaree dufumɛ dↄ, wè à yãpuraa e à kiia kↄ̃n a kiiao, zaakɛ gusiaa e gɛ̃tɛɛ, ben gupura yãpura e puu sa.

9 Gbɛ̃ kɛ̀ bè á kú gupuraan, ben à za a gbɛ̃daaan, adee kú gusiaa guumɛ ai tia. 10 Gbɛ̃ kɛ̀ ye a gbɛ̃daaazi kú gupuraan, à yãke è tó gbɛ̃ke furo. 11 Gbɛ̃ kɛ̀ za a gbɛ̃daaan kú gusiaan, à tɛ́ gusiaan, à dↄ̃ guu kɛ̀ èe gaanlo, kɛ̀ gusiaa à vĩ̀a kũ̀ yãnzi.

12 Ma nɛ́ yenzideenↄ, mɛ́ɛ beee ooare

kɛ̀ a durunnↄ kɛ̃̀awa à tↄ́ gãzĩ yãnzimɛ.

13 Mareenↄ, mɛ́ɛ beee ooare

kɛ̀ á gbɛ̃ kɛ̀ kuu zaa káaku dↄ̃ yãnzimɛ.

Gↄ̃kparɛnↄ, mɛ́ɛ beee ooare

kɛ̀ a zĩ̀ blè Setãn-a yãnzimɛ.

Ma nɛ́ yenzideenↄ, má òare

kɛ̀ á De Luda dↄ̃ yãnzimɛ.

14 Mareenↄ, má òare

kɛ̀ á gbɛ̃ kɛ̀ kuu zaa káaku dↄ̃ yãnzimɛ.

Gↄ̃kparɛnↄ, má òare

kɛ̀ á gbãa vĩ, Luda yã kú a swɛ̃̀ guu,

bensↄ̃ a zĩ̀ blè Setãn-a yãnzimɛ.

15 Àtongↄ̃ ye andunaziro ke pↄ́ kɛ̀ kú à guunↄ. Tó gbɛ̃ ye andunazi, à ye De Ludaziro. 16 Zaakɛ yã kɛ̀ kú anduna guu píngi, mɛ̀ pↄ́nidɛna kↄ̃n sãnkarawɛɛo kↄ̃n auziki ĩadãnao e bↄ De Luda kiiaro, à bↄ̀ anduna kiiamɛ. 17 Anduna e gɛ̃tɛɛ kↄ̃n a pↄ́nidɛnao, mↄde ludapↄyezikɛri égↄ̃ kuu gurↄ píngimɛ.

Kirisi ibɛɛ

18 Ma nɛ́ yenzideenↄ, gurↄ zãan wá kún kɛ̀. Lán á mà kɛ̀ Kirisi ibɛɛ e mↄↄ nà, à ibɛɛnↄ gĩakɛ wà kɛ̀ pari. Beee ↄ̀dↄawe kɛ̀ wá kú gurↄ zãanↄa. 19 Gbɛ̃ pìnↄ bↄ̀ wa kiiamɛ, mↄde wa gbɛ̃nↄnlo. Tó wa gbɛ̃nↄmɛ yã, lɛ aↄ̃ↄ kúwao. Aↄ̃ bↄ̀, lɛ wà dↄ̃ kɛ̀ aↄ̃ gbɛ̃kee kuu wa gbɛ̃ ũro yãnzimɛ.

20 Apinↄ sↄ̃, Luda a Ninii dìare, ben á yãpuraa dↄ̃ a píngi. 21 Ma beee òare, kɛ̀ á yãpura dↄ̃ yãnzimɛ, èe kɛ kɛ̀ á dↄ̃ro yãnzinlo. Á dↄ̃ kɛ̀ ɛgɛ ke è bↄ yãpuraa guuro. 22 Dén ɛgɛdee ũu? Gbɛ̃ kɛ̀ gì Yesu mɛsayakɛɛzimɛ. Gbɛ̃ beeen Kirisi ibɛɛ ũ, à gì De Ludazi kↄ̃n à Nɛ́omɛ. 23 Gbɛ̃ kɛ̀ gì Luda Nɛ́zi De Luda vĩro. Gbɛ̃ kɛ̀ zɛ̀ kↄ̃n Luda Nɛ́o bé à De Luda vĩ.

24 À tó yã kɛ̀ á mà zaa káaku gↄ̃ kú a swɛ̃̀ guu. Tó yã kɛ̀ á mà zaa káaku pì kú a swɛ̃̀ guu, apinↄ sↄ̃, ègↄ̃ kú Luda Nɛ́ guu kↄ̃n à Deo. 25 Pↄ́ kɛ̀ Kirisi à lɛ́ gbɛ̃̀ween wɛ̃̀ndi kɛ̀ è yãaroo ũ.

26 Ma yã beee òare gbɛ̃ kɛ̀ aↄ̃ↄe a sãsãanↄ yã musu. 27 Amↄanↄ sↄ̃, Ninii kɛ̀ á è Kirisia kú a guu. A bà kú kↄ̃n gbɛ̃ke yãdadanaareeoro, zaakɛ à Ninii e yã píngi dadaaare, à yãpuraa vĩ, ɛgɛɛ kú à guuro. Lán èe dadaaare nà, àgↄ̃ kú Kirisi guu lɛ.

28 Tia sa ma nɛ́ yenzideenↄ, àgↄ̃ kú à guu, lɛ gurↄↄ kɛ̀ à bↄ̀ gupuraaa, wa swɛ̃̀ gↄ̃ diɛna, wí tón wa kũ à sugurↄro.

29 Zaakɛ á dↄ̃ kɛ̀ Ludaa maa, àgↄ̃ dↄ̃ kɛ̀ yãmaakɛri píngi nɛ́ à nɛ́mɛ.

<- 1 YOHANA 1 1 YOHANA 3 ->