1 KƆRINTIDEENƆ 2

Kirisi kↄ̃n a gana lía yão

1 Ma gbɛ̃nↄ, kɛ̀ ma mↄ a kiia, ma mↄ Luda yã kpàakpaa kɛaremɛ, èe kɛ ma mↄ ↄ̃ndↄ̃ gbãaa ke lɛ́nnaa kɛarenlo. 2 Ma zɛo kɛ̀ mɛ́ yãke oarero, séde Yesu Kirisi yã baasiro, atɛ̃nsa à gana lía yã. 3 Ma mↄna a kiia guu ma mↄ kↄ̃n kùvĩio kↄ̃n vĩao kↄ̃n lugaluganao. 4 Ma waazikɛna guu mɛ́ɛ yã o kↄ̃n lɛ́nnaao ke ↄ̃ndↄ̃ↄoro. Má ò kↄ̃n Luda Nini gbãaa ↄdↄanaomɛ, 5 lɛ a ludanaanɛkɛna tón bↄ gbɛ̃ntee ↄ̃ndↄ̃ↄ guuro, sé Luda gbãaa guu.

Ɔ̃ndↄ̃ↄ kɛ̀ Luda Nini è dańnɛ

6 Baa kↄ̃n beeeo weè ↄ̃ndↄ̃yã o gbɛ̃ kàsaanↄnɛ. Èe kɛ anduna tiaa kɛ̀ki ↄ̃ndↄ̃ↄ ke à gbãadee kɛ̀ aↄ̃ gbãaa e yãaanↄ pↄ́nlo. 7 Luda ↄ̃ndↄ̃ↄn wée oo, à pↄyezi kɛ̀ utɛna yãa pì. À gĩakɛ à dìɛ wa gakui ena yãnzi zaalɛ èe anduna káɛro. 8 Anduna tiaa kɛ̀ki gbãadee ke ↄ̃ndↄ̃ↄ pì dↄ̃ro. Tó aↄ̃ↄ dↄ̃mɛ yã, lɛ aↄ̃ↄe Dii gakuide pá líaro. 9 Lán à kɛ̃na Luda yãn nà wà bè:

Pↄ́ kɛ̀ wɛ́ɛ e ero bensↄ̃ swã e maro,

à laasuu e gɛ̃ gbɛ̃ke swɛ̃̀ guuro,

àmbe Luda à soru kɛ̀ gbɛ̃ kɛ̀ aↄ̃ↄ yezinↄnɛ.

10 Ludaa ↄ̀dↄawe kↄ̃n a Nini gbãaao, zaakɛ à Ninii pì yã píngi tàasikɛna, baa kↄ̃n Luda asii bítanↄ.

11 Gbɛ̃kee a daa nↄ̀sɛ guu yã dↄ̃ro, tó èe kɛ à ninii kɛ̀ kú à guu baasiro. Lɛmɛ dↄ gbɛ̃kee Luda nↄ̀sɛ guu yã dↄ̃ro, tó èe kɛ Luda pì Ninii baasiro. 12 Anduna kɛ̀ niniin wá èro, Ninii kɛ̀ bↄ̀ Luda kiian wá è, lɛ wà gbaa kɛ̀ Ludaa dàwee dↄ̃. 13 Yã kɛ̀ wée oon gwe, èe kɛ yã kɛ̀ gbɛ̃ntee ↄ̃ndↄ̃ↄ è dańnɛnlo, yã kɛ̀ Luda Nini è dańnɛmɛ. Lɛn weè Luda Nini yã bↄkↄ̃tɛ gbɛ̃ kɛ̀ aↄ̃ↄ Luda Nini vĩinↄnɛ lɛ. 14 Anduna gbɛ̃ è Luda Nini yãnↄ síro, zaakɛ à dɛnɛ mìsaiyã ũmɛ. Eé fↄ̃ à à mì dↄ̃ sero, zaakɛ Luda Nini pì gbãaan wè à yã zɛ́ dↄ̃o. 15 Gbɛ̃ kɛ̀ Luda Nini è dↄnɛ aɛzĩ è yã píngi zɛ́ dↄ̃, gbɛ̃ke sↄ̃ zɛ́ vĩ à à zaa boro. 16 À kɛ̃na Luda yãn wà bè: Dé bé à Dii nↄ̀sɛ dↄ̃ gbasa à lɛ́ daa? Mↄde wapinↄ wá Kirisi nↄ̀sɛ vĩ.

<- 1 KƆRINTIDEENƆ 1 1 KƆRINTIDEENƆ 3 ->