ያንሳ 19

የሱሳ ጎጎሱዋምሮን ሙርተሳመ

(ማቶ. 27፡27-31፤ ማር. 15፡16-20)

1 ጲላጦሳ የሱሳ ሀጋኣተረ ቦጪሰ። 2 ዎታዳራልና ኤኤን ማማረን ካላቻ ኣን መተ ካየሱሳ ጉት ካዬን፥ ሄላ ቡራቡረክ ሳርስ ሳርስሴን። 3 ማራሙረን “ካአይሁድ ዎኖ ገጌላና” አማ ባላባንጆ ባሳ ግኔን።

4 ጲላጦሳና አደ አዉድ ቶስ ቤረ፥ ኮና ሞቶን ኦጌግስራን ፈሎ ኦሜላን ሄልዋት ጎጎአዴሳኑን፥ “ጎርታ አን ኡሱ እስን ቶስ ቤስናራ” አመ። 5 የሱሳ ካላቻ ካኤኤኔ ካተረ ሄላ ቡራቡረክ ሳርስ ሳርሳተ ቤ፥ ጲላጦሳና፥ “ሂክማ፥ እባዶት!” አመ።

6 ካቱቃሞል ዎይቻልና ቁሉክ ምን ካዋ ኦኦራኔን የሱሳ ካኮድያሬን ጎራታ፥ “ሱይና! ሱይና!” አማ ኦኬን።

ጲላጦሳና አደ፥ “እስን ጌሳየንደን ሱዋየን፥ እን ቶንሴ ሞቶን ኦጌግስራን ፈሎ ኦሜላን አን ላኮሄለሮ” አመ።

7 አይሁድና፥ “ኖ ሴራ አብና፥ እስኦቴሳ ኤረ ካዋ ማንኮየለ ማራን ሴራካን ማለ ጎይን ዶትሳራ” አመን። 8 ጲላጦሳ ሂካ ካኮማላረ ጎራታ ኣሎ አብሳተ፥ 9 አዉድ ቶስ አባባተረ የሱሳ፥ “አት ሀየኮ ኤሜተታ?” አመ ሆሳተ፥

የሱሳ አደ ኮና ላኮአባበሮ። 10 ጲላጦሳና፥ “ላኮሰጋቶያ? አን ኩ ፉርን ጎርቱን ሱይን ኦዶናት አባኖ ላካሶያ?” አመ።

11 የሱሳና፥ “ዋኮ ስሳምዋተዋ እን ጉት ኦዶናት ላኮግራረ፥ ሃንሱን ኩዬን ሮርሰ ካስሰራ እባዶት ጩቦኮ ካሮረ ጩቦ አባ” አመ።

12 ኤሰኮ አባባተረ ጲላጦሳ የሱሳ ፉርን ዶተ፥ አይሁድ አደ፥ “ሂካ እባዶት ጎፉርተ ቄሳር ካጌላቶ ላኮቶ፥ እስኦቴሳ ዎኖ ካየላታራ ቄሳር ካዲዳሮያ” አማ ኦካኖ ሆረዴን።

13 ጲላጦሳ ሂካ ማለረ የሱሳ ሳርደሰ ቤሰ፥ ኤኤሞኮክ ያማኖ ታአማማተ ባንኤ ካፍርዳ ባርጩማ ሀማጼ፥ ህት ባንኤና ታአራማይክ ሄኢ ገበታ አማንተ ኡማማተ። 14 አሪ ካፋስካ ባላ ታኮኤካሳናተ ጎራታና አርኮ ሳቲ ሌክ ሌ ግረ። ጲላጦሳና አይሁድነ፥ “ሂክማ ዎኖክስን” አመ። 15 እሶ አደን፥ “ባስና! ባስና! ሱይና!” አማ እዬን። ጲላጦሳና፥ “ዎኖክስን ሱዩ?” አመ።

ካቱቃሞ ዎይቻልና፥ “ካሮም ዎኖ ቄሳር ኳሬ ካካለ ዎኖ ኖ ላኮአብኖ” አመን አባበን።

16 ጉድሳኖና ጲላጦሳ የሱሳ ጎጎሱይራዉን ሮርሰ ስሰ። ዎታዳራልና የሱሳ አበን ጌሰን።

የሱሳኮክ ሱዋማኖ

(ማቶ. 27፡33-44፤ ማር. 15፡22-32፤ ሉቃ. 23፡33-43)

17 ኡሱና ማስቃሊቴሳ ስዳተረ ታአራማይክ ሄኢ “ጎልጎታ” አማንተ ታኡማማቶ “ቡቀ ታመተ” ታአማማተ ባንኤ ቤ። 18 ኤሴና ሱዬን፥ ኡሱ ዎታና እባዶ ላማ፥ ኮ ምና ታበተነ፥ ኮና ምና ታመርጌነ፥ የሱሳ ጠኤ የሌነ ሱዬን። 19 ጲላጦሳና ጹፍ ጻፈረ ማስቃሊ ጉት ሬረሰ፤ ጹፍና፥ ካናዝረት የሱሳ፥ ካአይሁድ ዎኖ ታአማቶተ። 20 የሱሳ ታኮሱዋመረ ባንኤ ካታማ ዶሌ ማንኮግቴ ማራን ኦሞጋን አይሁድ ጹፍ ናባቤን፥ ጹፍና፥ ሄኢ ታኢብራይስጢ ታላትንና፥ ታግሪክተ። 21 ካአይሁድ ቱቃሞልኮክ ዎይቻልና ጲላጦሳ ዲዳ፥ “ኡሱ፥ ‘ካአይሁድ ዎኖያ’ አመራ አም ጻፍ ኳሬ ካአይሁድ ዎኖ አም አሮጻፍተ” አመን።

22 ጲላጦሳና፥ “አን ካጻፈሮ ጻፈራ” አመ አባበ።

23 ዎታዳራል የሱሳ ሱዬን አባባተን፥ ቆሎኬሳ ሄሳ፥ ሁኬሳ አቴረን መተመተዉን ኮ ኮ ጎጎገገሮን በንኤ አፋር ሄዴዳመን፥ ኤለኮ ታ ሄገል ጌቶን አማለኮ ሌተ ሀኢሪራሞን ታፈላንተታ። 24 ሃንሱን፥ “እጣ ቤሳይነ ካኮንቤተ ሀጌተ” ኳሬ “ላኮፊልኖ” አመን። ህክና ካኮንሌራ

“ሁኬ ሄዴዳመን፥

ቆሎና ኢጣ ቤሳተን”

ካአማመራ ካማጻፋ ሃፉራ ጎጎጉዳሮንያ። ዎታዳራልና ካፌለራን ሂካዋያ። [a]

25 ታየሱሳ ማስቃሊ ዶሌ ኣየቴሳና ኣየቴሳኮት አባ፥ ታቀልዮጳ ኦር ማይራመና ኡል ካመግደላኮት ማይራመ ኤሰ አሌን ግረን። 26 ኤሴና የሱሳ ኣየቴሳና ካጌላታረ ኡሱኮ ካአጋልሳታረ ዶሌ አሌን ግራን ካኮድያረ ጎራታ ኣየቴሳነ፥ “አት ሄለልትቲ፥ ኤረካ ሂክማ” አመ።

27 ኡሱኮ ካአጋልሳታረነ፥ “ኣየታ ህትማ” አመ። ኡሱ ጎራታኮ ሀጋአበረ ሂክ ኡሱኮ ካአጋልሳታረ ምንኬሳ ቶስ አታተ።

ጎይ ካየሱሳ

(ማቶ. 27፡48-50፤ ማር. 15፡36-37፤ ሉቃ. 23፡36)

28 ኤሰኮ የሱሳ አየስ ዱባ ጉዳታኖ አዴሰረ፥ ካማጻፋ ሃፉራ ጎጎጉዳሮ፥ “አን ሱጉባየዋ!” አመ። [b]

29 ኤሴና ታኦኮካታ ዎይኒ ሁቡቾ ምግ ሌተ ግቴ፥ እሶና እስፎንጅ ጣሞ ካዎይኒቲ ጡቅሴነ፥ ኦጎሮ ካአቦ ባሊ ህኢ ቶስ ጋባሌን። 30 የሱሳና ካኦኮኮታሮ ካኮቃማሳረ ጎራታ “ጉዳተዋ” አመ።

መተኬሳ ሁስሳተረ፥ ኔፎቴሳ ሮርሰ ስሰ።

አራንጃ ታየሱሳ ጀሬን ኤጋማኖ

31 ኤሰኮ አባባተረ አሪ አይሁድን ታፎልሲ አርዉን ታኮኤካሳታራንተ። አይሁድ፥ ካሱዋመሮ እባዶኮክ ሬስ ታፎልሲ አሪ ማስቃሊ ጉት ጎጎሀይኖንኮ ማንኮዶታቴን ማራንና ካለት ታፎልሲ አሪ ማንኮሌተ ማራን፥ ኦሱዋሜራን እባዶጃ ግልብ ኤብሰሬን ሬስ ጎጎዳግሮን ጲላጦሳ ኤባተን። 32 ሃንሱን ዎታዳራል ኤመተረ ክርስቶሳነ ዎታ ሱዋመ ካግረ ካሆራርጄ እባዶትኮክ ግልብ ኤብሴን፥ አደን ካካለኮክ ግልብ ኡሱማሌ ኤብሴን። 33 የሱሳ ቶስ ካኮኤሜተረን ጎራታ ካጎየሮ ማንኮዴረን ማራን ግልብ ላኮኤብሴረን። 34 አየሱን ጎአመን ዎታዳራልኮ ኮ አራንጃ ታየሱሳ ጀሬን ኤገ፥ ጎርሰዋ ኢግና በከና ኡባተ። 35 ሂካ ካዴራ እባዶት አቶናት ስሰራ፥ አቶናትና ሩምያ፥ ሩም አዬሳኖና ካሶዋ፥ እስና ጎጎአማንታኑን አቶታራ። 36 ህክና ካሌራ፥ ማጻፋ፥ “ለፋልኮ ኮና ላኮኤብሮ” ካአማመራ ጎጎጉዳሮንያ፥ [c] 37 ካካለ ቁሉክ ማጻፋና፥ “ሀሱ ካኤገራን እሶ ድናራን” አማራ።

ቃማላማኖ ካየሱሳ

(ማቶ. 27፡57-61፤ ማር. 15፡42-47፤ ሉቃ. 23፡50-56)

38 ሂታኮ አባባተረ ካአርማትያስ ዮሴፋ ካየሱሳ ሬስ አታይን ጲላጦሳ ኤባተ፥ ዮሴፋና አይሁድ ማንኮአብሳተሮ ማራን ሄቶ የሱሳኮ ካአጋልሳታሮየ። ኡሱና ጲላጦሳ ፈኢ ካኮስሳረ ጎራታ ኤመተ ሬስ አታተ። 39 ኤሰኮ ሆረነ ሄመን የሱሳ ቶስ ኤመተ ካግረ ንቆድሞሳ ኮፍቻ ሶንዶም ታሌቶ ኣሎ አዉኣሎ ፑልፑልሶና ካኦኮኮታሮ ባጩ ኣተ ኤመተ። [d] 40 እሶና ሬስ ካየሱሳ አቴረን ካአይሁድ ሬስ ኤካሳኖኮክ ሴራ ሽቶነ ዎታ ቃማሉን ጋሼ ማማሬን። 41 የሱሳ ታኮሱዋመራ ባንኤና ታአካክልተ በንኤተ፥ ታአካክልተ ባንኤ ማዮና ታኮቃማላሞን ግሮ ካኡሱብ ቃማልየ። 42 አይሁድን ታፎልሲ አርዉን ታኮኤካሳታራን አሪ ማንኮሌተዉን ታቃማል ባንኤ ኤነ ማንኮሌዉን የሱሳ ኤሰ ቃማሌን።

<- ያንሳ 18 ያንሳ 20 ->