1 ጎርታ ክርስቶሳነ ዎታ ጎይኮ ጎከቴን ክርስቶሳ መርጌ ታዋይ ሀማጼ ታኮግሮ ኤለ ዳሩሪ ካግሮ አየስ ዶታዬን። [a] 2 አርጌቶ ኤለ ዳሩሪ ካግሮ አዬስኮክ ቆፓ ኳሬ ኡሊ ካግሮ አየስ አሮቆፕቴን። 3 እስን ጎተታን፤ ግርክስና ክርስቶሳነ ዎታ ዋይ ኦሮ ጎላተራ። 4 ግርክስን ካሌራ ክርስቶሳ አባባይ ካኮኤሜተ ጎራታ እስና ኡሱነ ዎታ ካባጃ ሙትናታን።

5 ሃንሱን እስኒ ካግሮ ካኡሌ ሀልቻ ላጋዳ፤ እሶና “ሻርሙጡማ፥ ባቶዋኖ፥ ዮራኖ፥ ሀልቻ ካሜላን፥ ቶልቻ ሄዶይሳታኖ ካሌሮ ሀልቻኖያ”። 6 ሂካ አዬስጆልኮት ኣላንቲ ካአጃጃሞን እባዶ ጉት ኤንገ ታዋ ኤመይናታ። 7 እስን መተክስንዋ ሂታኮ ሆረነ ካአጃጃሞን እባዶ ኦሮ ታኮግቴኒ ኡሱ እባዶ ማለ ግቴን።

8 ግዳ ጎአመን ኤንገ፥ አማራንጀ፥ ምጌ፥ መገ ባሳኖ ኦሮኦትስንኮ ትራዬን፤ ካሙሊስራ አዬንሳ ህኢትስንኮ አሮቤኖ። 9 ታዶአን ያዳሊትስን ቃርቴን ማንኮሻፍተታን ማራን እስእሲ ኦሮ ጣራ አሮአዬሴን። [b] 10 ካመጠሮኮት ምዲ ካኡሱባተሮ ማላባኖ ታኢግልሳንተቶ ያዳሊ ሳርሳዬን። [c] 11 ሂካ ጋራይ ግሪኪና አይሁድ፥ ካሀማጺሳመሮና ካሀማጺሳሞን ግሮ፥ ካአጋልሳተሮ አይዛብና ካአጋልሳኖንግሮ አይዛብ፥ ባልችክና ድይክ እባዶ ኦሮ ካሌና ላግቶ፤ ክርስቶሳ ዱባያ፤ ዱባ ኦሮ ግራ።

12 ጎርታ ዋይ ኦአሳባንቴታና ቁሎለ፥ ኦጌላንቴታን ማንኮሌተን ማራን አንጅሬ፥ ኢዳነ፥ እስ የራሳታኖይ፥ ነኔኤይሳታኖ፥ ኦብስ ሳርሳዬን። [d] 13 እስኦሮ እስእሲ ኦብሳ፤ እስንኮ ኮ ካካለ ጉት ቁጠ ካአባ ጎግረ ሀሄሶ አማ፤ ክርስቶሳ እስኑን ሀሄሶ ጎጎአመሮ እስና ሀሄሶ አማ። [e] 14 ካመን ዱባኮ ሮርተ ዱባ ሀንቂና ካሊ ራቶ የልተ ኩኩይሰ ሺተ ታአብተቶ ጌላንጀ ሳርሳዬን። 15 እስን ማር ኮክ ምክታል ሌተዴን ካኮኡማንቴታን ህታ ኖጎዳን ማንኮሌ ማራን ታክርስቶሳ ኖጎዳ ዎዳናትስኒ ሀሬዶ፤ ዋ ኦጋላታታን ላ። 16 ካክርስቶሳ ሃፉራ አማጋመ ዎዳናትስኒ ኦሮ ሀግረ፤ ቃሩማ ዱባይ እስእስኦሮ አጋልሳዬን፥ ሆልቶዬን፥ ማዛሙርና ሳድሳ፥ ታአያና ያዬይ ዎዳናኮ ዋ ጋላታ ዛማራ። 17 ጋራ ካየሱሳነ ዋ ኦዶ ጋላታ ሄኢና ሌረ ፈሎይ ካፈላታን ዱባ ካጎታ የሱሳኮክ መገይ ፈላ፤ ኡሱና ዋ ኦዶ ጋላታ። [f]

18 እስን ኦርጆል! ጎታይ ዶሌ ካዶትሳሮ ማንኮሌ ማራን ኤንተርጆልክስኑን አጃጃማ። [g]

19 እስን ኤንተርጆል! ኦርጆልክስን ጌላየን፤ ኦኦኮኮዋታን አሮሌተን። [h] 20 ይሶ! ሂክ ጎታ ካገጌላይሳሮ ማንኮሌ ማራን ካመን ዱባን እስን ኦኡሙለራዉን አጃጃማ። [i] 21 ይስ ኦኡሙልተታን እስን! ይስክስን አብድ ጎጎ ጎሳኖንኮ ኤንጌይ አሮአማራይሰን። [j] 22 ድዩማኮክ ሴራይ ኦግታን እስን! ካኡሌ ጎቶሌትስኑን ካመን ዱባዉን አጃጃማ፤ ካኮንአጃጃማታና እሶ እስን ማንኮደያራን ማራና እባዶ ማንኮገጌላይሳታን ማራን፥ እባዶን ሙትን አንሌኖን ግራን ጎታ አብሳታኖይና ታኢዳንት ዎዳናይ ሀሌዎ። [k] 23 ካፈላታን ዱባ እባዶን ካፈላታን ኣን አንሌኖን ግራን ጎታ የሱሳን ካፈላታን አን ዎዳናኮ ፈላ። 24 ሂካኑና ጎታ ታዳሩረ ርቲ እስኑን ባርኣራ የል ካስስናሮ ካሳንዋ፤ እስን ካኮንሀንዳታና ጎታ ክርስቶሳንያ። 25 ጎታ ዶሌ ኡሉልሳኖ ማንኮግኖ ማራን ታሜላን ካፈላራ ኦሜላን ፈሎኦቴሳ ማራን ሙሮ አታይናራ። [l]

<- ቆላስያሳ 2ቆላስያሳ 4 ->