Baá Galesia

Ndibned ń kálag

Békáléʼáá nkalaŋ ḿ bwâm tə̂ŋgɛne Yesuɛ átîntê e bad ábe béesɛ̌ bad bé Israɛl, bad bênkǒb-pɛ mɔ́. Atɔtɛ démbīd áyə̄l e ḿmɛ́n nkalaŋ áde áhɔ́be ké mod atə́ŋgɛ́né mbéndé e Mosɛɛ ahíd âbɛl boŋ ákoŋ mod a Krǐsto abɛ́. Paalɛ alúmté áte nɛ́n aá chǒm éche ékəəʼ boŋ mod âkud aloŋgé áde Krǐstəə ábagɛɛ́ édíi adúbe áde áwóó. Boŋ átîntê e mwembé ḿme ḿbédé a dyad á Galesia, dyad á mbwɔ́g e Roma e Esia Mainɔ, bad bébédé ábe bétə́ŋgánnáá ayə́ge áde Paalɛ, béhɔ̄bē nɛ́n bán mod atə́ŋgɛ́né ahíd mbéndé e Mosɛɛ âbɛl boŋ ákobned áʼsō éʼ Dyǒb.

Kálag echě Paalɛ áténlé mwembé ń Galesia ebédé âbɛl boŋ bad ábe béhídéʼáá ádúbe áde déetə̂ŋgɛne bétim ámbīd béhíde adúbe á mbále.

Paalɛ aboótédé enɛ́n kálag âlumed bad áte kunze echě awóó âbɛ́ mbapɛɛ a nlómag awě Yesu Krǐstəə. Alúmté áte nɛ́n aá abɛ́ áde mɔ́díí mbapɛɛ a nlómag áhúú ne Dyǒb saké ne moonyoŋ. Alúmté-ʼɛ áte nɛ́n aá ḿme nsɔ́n menkoŋ abɛ́ abɛl nsɔ́n átîntê e bad bé Israɛl. Ahɔ́bé-ʼɛ ámpē nɛ́n aá adúbe děmpɛn dɔ́ɔ ákəəʼ boŋ bad békobnéd áʼsō éʼ Dyǒb. Âsóged enɛ́n kálag, Paalɛ alúmté áte nɛ́n aá abɛ́ á mod a Krǐsto ákag ne edəŋge éche ehúú mɔ́ á nlém tê, adúbe áde ádúbpé Krǐstəə.

Nkabtéd ń kálag

Ndibned ń kálag 1.1-10

Kunze echě Paalɛ áwóó âbɛ́ mbapɛɛ a nlómag 1.11-2.21

Nkalaŋ ḿ bwâm mé nsimé ń Dyǒb 3.1-4.31

Kunze e mod a Krǐsto ne chǒm éche átə́ŋgɛ́né abɛl 5.1-6.10

Nsógtɛn 6.11-18

1 Mɛ Paalɛ, mbapɛɛ a nlómag nhɔ́g, mɛ-ɛɛ́ ntelé enɛ́n kálag. Saké baányoŋ bépwɛ́dé mɛ âbɛ́ mbapɛɛ a nlómag. Meébɛnlád-taá kunze e moonyoŋ. Boŋ ḿmêm mpwɛdtéd ńhúú ne Yesu Krǐstəə bɔ́ Dyǒb Titɛ́ɛ, awě apuúdté mɔ́. 2 Mměn ne bad bé Krǐsto bésyə̄ə̄l ábɛ bédé ne mɛ hɛ́n, sêlômmeʼ mwembé ńsyə̄ə̄l ḿme ńdé á Galesia melɛntɛn. 3 Nsimé ne nsaŋ ń Dyǒb Titɛ́ɛ awɛ̂d bɔ́ Sáŋgú Yesu Krǐstəə ḿbɛ̂ ne nyé. 4 Nyêbíí bán Yesu Krǐstəə abagé eche yə̌l âwɛ́ áyə̄l e ḿmɛd mbéb âbɛl boŋ áhûd syánē á mbɛltéd mé mbéb ḿme ńdé á nkǒŋsé-te chii. Abɛlé nɛ̂ áyə̄le nɛ̂ dɔ́ɔ Dyǒb Titɛ́ɛ ántīīʼɛ́. 5 Mekɛnag mébɛ̂ ne Dyǒb á ngíndé ne á ngíndé. Ébɛ̂ nɛ̂.

6 Dyǒb ápwɛ́dé nyé âbɛ́ ábē bad ámbīd e nsimé ḿme Yesu Krǐstəə ábɛ́nlé nyé. Boŋ édé mɛ eʼkɔ̂mtɛn éʼ yə̌l-áte ânyín nɛ́n bán nyêwámsɛ́né Dyǒb atɛde, nyêhíde ayə́ge démpēe ádě nyéwémtɛ́né bán ádé nkalaŋ ḿ bwâm. 7 Nkalaŋ ḿ bwâm mémpēe méesaá. Baahɔ́g bédé ábe bépuutad nyé. Béhɛde nkalaŋ ḿ bwâm ḿme Yesu Krǐstəə ahəŋlɛn. 8 Boŋ ńláa nyé nɛ́n mɛɛ́, nzé ké sé, kéʼɛ ángɛl ehúú ádyōb boŋ ekǎnlé nyé nkalaŋ ḿ bwâm ḿme ńdé nhəŋlɛ́n ne ḿme sênkalɛ́ɛ́ nyé, eʼdim éʼbɛ̂ ne mɔ́. 9 Sêmmǎd nyé aláa, nlâŋge-ʼɛ nyémpē mɛɛ́, kénzɛ́ɛ́ awě akǎnlé nyé nkalaŋ ḿ bwâm ḿme ńdé nhəŋlɛ́n ne ḿme sênkalɛ́ɛ́ nyé, boŋ nyékōb-pɛ, eʼdim éʼbɛ̂ ne ane mod. 10 Ngáne ńhɔ́bɛɛ́ nɛ́n, nyéewémtán nɛ́n bán nhɛdeʼ mɛɛ́ baányoŋ béchəgeʼ mɛ dǐn á bwâm. Meéhɛ̄dɛ̄ɛ̄ nɛ̂. Dyǒb dɔ́ɔ ńhɛdɛɛ́ mɛɛ́ áchəgeʼ mɛ dǐn á bwâm. Nzé émbɛ̄ nɛ́n bán ndíi nhɛde mɛɛ́ baányoŋ béchəgeʼ mɛ dǐn á bwâm, né meésaá mbəledɛ awě Krǐstəə.

11 A-baányaŋ, nhɛdeʼ mɛɛ́ nyébíi nɛ́n bán nkalaŋ ḿ bwâm ḿme ńkánlé nyé, méēhūuʼɛ́ ne moonyoŋ. 12 Moonyoŋ ké nhɔ́g eelâŋgɛɛ́ mɛ ḿmê nkalaŋ, modmod eeyə́gteʼáa mɛ. Boŋ Yesu Krǐstəə mwěn mɔ́ɔ alúmté mɛ ḿmê mekan áte. 13 Nyêwógé ngáne ádêm aloŋgé démbɛ̄ɛ̄ ngen eʼsó ádě ńhídéʼáá mbɛltéd ḿ bad bé Israɛl. Nyêwógé nɛ́n bán ntagtéʼáá bad bé Krǐsto ne nhel ńsyə̄ə̄l. Nhɛdéʼáá mɛɛ́ ḿmad bɔ́ moosyəə́l. 14 Nhídéʼáá ayə́ge á bad bé Israɛl tómaa bɛ̌d bésyə̄ə̄l ábe syáābɔ̄ɔ sêbédé kɔ̂d. Menwóŋ-ʼɛ kə́n áte bwâmbwam âhíd elem éche ábɛ̄d betaa. 15 Boŋ kénɛ́ɛ ébédé nɛ̂, Dyǒb démmǎd mɛ apwɛd né béēchyááʼɛ́ mɛ. Anchɛ́lé mɛ ne ḿmē nsimé, âbɛle mɔ́. 16 Anlúméd mɛ awe Mwǎn âbɛl boŋ ńkanle bad ábe béesɛ̌ bad bé Israɛl nkalaŋ ḿ bwâm ḿme ane Mwǎn. Áde ábɛ́lé nɛ̂, menkêntánné modmod mɛɛ́ áyə́ged mɛ dyam áde ńtə́ŋgɛ́né abɛl. 17 Boŋ ábwɔ̄g-ábwɔ̄g menkɛ̌ á mbwɔ́g e Arebia. Ámbīd e póndé, mentǐm ámbīd á dyad á Damaskɔs. Menkênkaá-ʼaá ké á Jerusalɛm âkɛ dɛ́nyīn bad ábe bénsēbē bembapɛɛ bé nlómag abɛ́. 18 Ámbīd e mwɛ̌ ńláán dɔ́ɔ nkíí á Jerusalɛm ânyín Petro.*Petro: Kálag éʼsó éwóó Sɛpasɛ. Ádé dǐn ádíi melemlem nɛ́ɛ Petro. Membɛ́ ne mɔ́ áwed dyôm dé eʼpun ne éʼtáan. 19 Menkênyínné mbapɛɛ a nlómag ampée ké nhɔ́g ésebɛ́ Jemsɛ, Sáŋgú Yesuɛ mwǎnyaŋ. 20 Mam ḿme ńtenlɛɛ́ nyé médé mbále. Dyǒb ábíí aá saké metóm mɔ́ɔ ńkalɛɛ́. 21 Áde ńhúú á Jerusalɛm, menkɛ̌ á mbwɔ́g e Siria ne á mbwɔ́g e Silisia. 22 Ene póndé né bad bé Krǐsto bé mwembé mé myad mé mbwɔ́g e Judeya béēbīīʼɛ́ me. 23 Béwógéʼáá wógɛ́n bán, “mod awě ahágéʼáá bad bé Krǐsto á meséb mwěn atimé bɔɔb akanle bad aá bad bédúbe Yesu Krǐstəə, melemlem mé adúbe ḿme áhɛ́déʼáá abɔ́ded.” 24 Dyam áde Dyǒb ábɛ́nlé mɛ dêmbɛ̌l békɛ́néʼáá Dyǒb.

Galesia 2 ->