1 Timoti 2

Elébé tə̂ŋgɛne âbɛ Dyǒb edúbé

1 Dyam déʼsó, nwéde wɛ aláa nɛ́n mɛɛ́ nyékânnad moosyəə́l. Nyékânnad bad bémpēe. Nyékânne nɛ́n bán Dyǒb álóme nyé bwěm ábe nyétógnɛ́né, nyéságnan-nɛ mɔ́ áyə̄le mboŋ ḿme ábɛnlɛɛ́ nyé ne bad bésyə̄ə̄l. 2 Nyékânnad kə̂ŋ é bad ne bad bésyə̄ə̄l ábe bédé á nkamlɛn. Nɛ́n dɛ́bɛ̌l aloŋgé áde syánē dɛ́bɛ̄ nsaŋ ésebán mehɔ́b médé, débɛlé ngáne Dyǒb áhɛdɛɛ́, débagé-ʼɛ mɔ́ edúbé á menzii mésyə̄ə̄l. 3 Âkânned bad ábóó. Nɛ́n áwógte Dyǒb ádé ásóó syánē menyiŋge. 4 Dyǒb áhɛde aá moosyəə́l ákud eʼsoósoŋ bésôŋtɛn-nɛ mbále echě Eyale é Dyǒb ékalɛɛ́. 5 Ébyɛ́ɛ́né nɛ́n bán Dyǒb ahɔ́g děmpɛn dɔ́ɔ ádé. Mod nhɔ́g mwěmpɛn-naá adé awě apɛɛne Dyǒb ne baányoŋ á nchemtɛn. Ane mod adíi Yesu Krǐstəə. 6 Ambɛ̌ ádē aloŋgé âwɛ́ á nló ḿ moosyəə́l. Ene kwééd echě awédé a nló ḿ moosyəə́l enlúméd á póndé echě etə́ŋgɛ́né nɛ́n bán Dyǒb áhɛde aá moosyəə́l ákud eʼsoósoŋ. 7 Áyə̄le nɛ́n dɔ́ɔ ákə́ə́ boŋ Krǐstəə álōmē mɛ nɛ́ɛ mbapɛɛ a nlómag âkɛ dé akal ḿmē nkalaŋ tə̂ŋgɛne adúbe á Krǐsto ne mbále, wɛ́ɛ bad ábe béesɛ̌ bad bé Israɛl. Dyam áde ńhɔ́bɛɛ́ ádé mbále. Meékālɛ̄ɛ̄ metóm.

8 Né-ɔɔ́ hǒm ké áhéé adé bad bé Krǐsto béladnɛɛ́, nhɛde nɛ́n mɛɛ́ baachóm ábe bébágé échab yə̌l âbɛle Dyǒb bényene mekáá ámīn bébage mekáne. Ábê bad béētə̂ŋgɛnɛɛ́ meliŋgá ahɛ́ á nlém káa béētə̂ŋgɛnɛɛ́ bad abɛ́ ábe bésɛnleʼ. 9 Nhɛde-ʼɛ ámpē nɛ́n mɛɛ́ bebaád béhâg mesaŋ ḿmé bad bɛ́nyīnnē nɛ́n bán métə́ŋgɛ́né. Ḿmāb mesaŋ métə́ŋgɛ́né bɔ́ yə̌l akútɛn bwâm ésebán métēde baachóm nlém á abum. Béenabpé esid é nló nyaa echě etómé áte, béēhāg bwěm éʼ gôl, béēwāāʼ nsáŋ ḿme bébɛ́nlé bǎn bé meláá mé etógnɛ́n, béēhāg-kɛ mbɔ́té éche étómtɛ́né nkun abɛ́. 10 Boŋ pɛn ḿmāb mbeltéd ḿ bwâm ńlúmed nɛ́n bán bédíi bebaád ábe bébenle Dyǒb. 11 Mmwaád atə́ŋgɛ́né ádyɛ̄ɛ̄ piíb, ásūdēd yə̌l boŋ áwōglān ngáne baachóm béyə́gtɛɛ́. 12 Meehɔ́bɛɛ́ nɛ́n mɛɛ́ mmwaád awóó kunze âyə́ged káa âkamlɛn baachóm. Mmwaád atə́ŋgɛ́né ádyɛ̄ɛ̄ piíb. 13 Nhɔ́bé nɛ́n áyə̄le Dyǒb dénsēbē Adamɛ ahəg boŋ áhəgéʼ Ifɛ. 14 Ébyɛ́ɛ́né-ʼɛ nɛ́n bán mmwaád mɔ́ɔ Satanɛ ândogké boŋ abóó mbéndé, saké Adamɛ. Né-ɔɔ́ mmwaád mɔ́ ambóó mbéndé. 15 Boŋ Dyǒb dɛ́sǒŋ aloŋgé dé mmwaád á póndé e achád nzé adíi asumé nlém wɛ́ɛ Krǐstəə alúmté-ʼɛ edəŋge ne bad bémpēe, eewóo-ʼɛ atɔ́n dé mbéb ké ahɔ́g áyə̄l.

<- 1 Timoti 1 1 Timoti 3 ->