Kálag eʼsó eche

Jɔnɛ
Ndibned ń kálag
Metɔte médé mébɛ ḿme mékə́ə́ boŋ Jɔnɛ átēl kálag e eʼsó. Atɔtɛ dé eʼsó ádíi âwéd bad ábe áténlé chɔ́ nlém á abum âbɛl bébɛ̂ mod nhɔ́g ne Dyǒb ne awe Mwǎn, Yesu Krǐstəə.
Metɔte ḿme mélóntɛ́né mébɛ médíi, Jɔnɛ alâŋge bad ábe áténlé chɔ́ aá bétêd póndé ne ayə́ge dé metóm áyə̄le dɛ́bēbēd abɛ́ áde bédíí mod nhɔ́g ne Dyǒb ne Yesu Krǐstəə. Ádê ayə́ge dé metóm áhɔ́be nɛ́n bán ebébtéd épag ne abɛ́ áde moonyoŋ ábágkē á nkǒŋsé tê, bán né-ɔɔ́, Yesuɛ, Mwǎn a Dyǒb eéhɛleʼaá-sɛ ákōŋ moonyoŋ abɛ́. Ábê bemeléede bé metóm béhɔ́be nɛ́n bán nzé mod ǎkǔd eʼsoósoŋ, atə́ŋgɛ́né nɛ́ɛ ábáá mekan mé nkǒŋsé á yə̌l. Béyə́gte ámpē nɛ́n bán eʼsoósoŋ béewóoʼɛ́ dyamdyam âbɛl ne abɛ́ á bwâm ne âwóŋ edəŋge ne nhɔ́g ne aníníí.
Âlúmed aá ádɛ̂ ayə́ge déetə̂ŋgɛnɛɛ́ Jɔnɛ alúmté á kálag tê wɛ́n aá Yesuɛ ankǒŋ moonyoŋ abé akoó-ʼɛ alúmed áte nɛ́n aá bad ábe bédúbpé Yesuɛ boŋ bédə̄ŋ-ʼɛ Dyǒb bétə́ŋgɛ́né nɛ́ɛ bédə́ə́ nhɔ́g ne aníníí.
Nkabtéd ń kálag
Ndibned 1.1-4
Eʼnyínɛn bé ekíde ne ehíntɛ́n 1.5-2.29
Bǎn bé Dyǒb ne bǎn bé Satanɛ 3.1-24
Mbále ne awusé 4.1-6
Chǒm éche edəŋge édíí 4.7-21
Adúbe áde átómé mekan mésyə̄ə̄l áte 5.1-21

Eyale é aloŋgé

1 Ntenleʼ nyé tə̂ŋgɛne ane awě adé Eyale é Dyǒb éche épɛɛneʼ aloŋgé. Abédé se á mbooted, sênwóg mam tə̂ŋgɛne mɔ́, sênnyínɛ́n mɔ́ mǐd, sêmbán mɔ́ dǐd áyə̄l, sêmbán-nɛ mɔ́ ekáá á yə̌l. 2 Mɔ́ awě apɛɛneʼ aloŋgé antǐm moonyoŋ awě bényînnɛɛ́ dǐd, dennyín-nɛ mɔ́. Sêbídeʼ mɔ́ mbóŋ, sélāŋgē-ʼɛ nyé mam tə̂ŋgɛne mɔ́ awě abageʼ aloŋgé áde déemaáʼ, mɔ́ awě ambɛ́ ne Titɛ́ɛ, boŋ átīm abyɛ́ɛ́n átîntê echɛ̂d. 3 Chǒm éche sényíné, éche séwógé-ʼɛ, chɔ́ɔ sélâŋgɛɛ́ nyé, âbɛl boŋ nyébɛ̂ nlatɛ́n ne sé. Ḿmɛ̄d nlatɛ́n-nɛ ńdíi nlatɛ́n ḿme déwóó ne Titɛ́ɛ ne awe Mwǎn Yesu Krǐstəə. 4 Sêtelé enɛ́n kálag, âbɛl boŋ ḿmɛ̄d menyiŋge mélôn mbon.

Aloŋgé á bad ábe bédé á eʼnyínɛn bé ekíde

5 Bɔɔb-pɔɔ́, pɔ́le echě séwógé á nsəl wɛ́ɛ Yesu Krǐstəə boŋ sélāŋgē-ʼɛ nyé edíi nɛ́n, Dyǒb ádíi eʼnyínɛn bé ekíde. Atɔ́n dé mbéb ké ahɔ́g déesaá mɔ́ á yə̌l. 6 Nzé dehɔ́bé bán dedé nlatɛ́n ne mɔ́ áde aloŋgé ádɛ̄d ádíi ádíí aloŋgé dé ehíntɛ́n, né dekale metóm né ḿme syánē mbɛltéd-tɛ méēhīdɛ̄ɛ̄ mbále. 7 Boŋ nzé dewóó aloŋgé dé eʼnyínɛn bé ekíde ngáne Mwěn-nɛ ámpē áwóó, né syánē dɛ́ɛ̄bɛ̄ nlatɛ́n ne nhɔ́g ne aníníí, mekií ḿme Yesuɛ awe Mwǎn, mɔ́-ʼɛ mɛ́wobé ḿmesyánē mbéb ńsyə̄ə̄l.

8 Nzé dehɔ́bé bán deewóoʼɛ́ atɔ́n dé mbéb ké ahɔ́g á yə̌l, né dedogeʼ échɛd yə̌l, né mbále-ʼɛ eésaá syánē áte. 9 Nzé depanleʼ ḿmesyánē mbéb áte, né ǎbɛ̌l ngáne áhɔ́bé, ǎbɛ̌l-lɛ chɔ́ nyaa echě etə́ŋgɛ́né. Ǎlagsɛ́n syánē mbéb, áwōbē-ʼɛ ḿmesyánē mbéb ńsyə̄ə̄l. 10 Nzé dehɔ́bé bán deébɛlɛɛ́ mbéb, né dehɔ́beʼ bán Dyǒb ádíi nkal a metóm, né eyale é Dyǒb éesaá-ʼaá syánē áte.

1 Jɔnɛ 2 ->