1 Tɛm tatɔkɔ doru fəp kusu kin k'aŋc-cɔp, pac-loku, moloku min mayi. 2 K'afum ŋande ŋakɔ kəca nkɛ dec dɛmpɛ mɔ, kɔ ŋanəŋk mɔrɔ atɔf ŋa Siŋhar, kɔ ŋandɛ mi dacɔ. 3 Kɔ ŋalokɛnɛ: «Pasut birik, pacɔf bi!» Kɔ birik bɔcɔf babɔkɔ bɔyɔnɛ ŋa masar, kɔ kɔrtal kəyɔnɛ ŋa dos. 4 Kɔ ŋaloku sɔ: «Paŋkɔn, pacəmbər dare kɔ kəlɔ nkɛ domp da ki dendekɔ haŋ dɔsɔ kɔm mɔ. Ntɛ tɔŋsɔŋɛ pasɔtɔ tewe mɔ, tɔsɔŋɛ su sɔ kətɔsaməsər doru.»

5 Kɔ Kanu Kəpɔŋ kəntor kədemɔmən dare kɔ kəlɔ nkɛ afum ŋaŋc-cəmbər mɔ. 6 Kɔ Kanu kəloku, «Nəmɔmən afum aŋɛ! Fəp faŋan kusu kin kɔ ŋaŋcɔp. Nəmɔmən sɔ ntɛ ŋaŋcop kəyɔ mɔ. Tɔlɔm o tɔlɔm teyi fɛ ntɛ tɔŋmɔnɛ ŋa kəyɔ ka tɛfaŋ taŋan mɔ. 7 Paŋkɔn, pator, panɔŋkəl-nɔŋkəl kusu kəŋan ntɛ tɔŋsɔŋɛ ta ŋanenɛnɛ sɔ mɔ.» 8 Kɔ Kanu kəsaməsər ŋa doru, kɔ ŋasak kəcəmbər dare. 9 Ti t' awenɛ di Babɛl, bawo difɔ Kanu Kəpɔŋ kənanɔŋkəl cusu, kɔ kəsaməsər afum doru.

10 Tecepərɛnɛ ta Semy tɛntɛ: Semy ɛnasɔtɔ meren 100, a pədekom Arpaksadu, teren ta mɛrəŋ ntɛ domun dɛnasak antɔf mɔ. 11 Kəkom ka Arpaksadu kɔ Semy eyi sɔ doru meren 500, mmɛ ɛnakom sɔ awut arkun k'awut aran alɔma mɔ.

12 Arpaksadu ɛnasɔtɔ meren 35, a pədekom Sɛlah. 13 Kəkom ka Sɛlah, Arpaksadu ɛnasɔtɔ sɔ meren 403, mmɛ ɛnakom sɔ awut arkun k'awut aran alɔma mɔ.

14 Sɛlah ɛnasɔtɔ meren 30, a pədekom Hebɛr. 15 Kəkom ka Hebɛr, Sɛlah ɛnasɔtɔ sɔ meren 403, mmɛ ɛnakom sɔ awut arkun k'awut aran alɔma mɔ.

16 Kɔ Hebɛr ɔsɔtɔ meren 34, a pədekom Pɛlɛk. 17 Kəkom ka Pɛlɛk, Hebɛr ɛnasɔtɔ sɔ meren 430, mmɛ ɛnakom sɔ awut arkun k'awut aran alɔma mɔ.

18 Pɛlɛk ɛnasɔtɔ meren 30, a pədekom Rehu. 19 Kəkom ka Rehu, Pɛlɛk ɛnasɔtɔ sɔ meren 209, mmɛ ɛnakom sɔ awut arkun k'awut aran alɔma mɔ.

20 Rehu ɛnasɔtɔ meren 32, a pədekom Seruk. 21 Kəkom ka Seruk, Rehu ɛnasɔtɔ sɔ meren 207, mmɛ ɛnakom sɔ awut arkun k'awut aran alɔma mɔ.

22 Seruk ɛnasɔtɔ meren 30, a pədekom Nahor. 23 Kəkom ka Nahor, Seruk ɛnasɔtɔ sɔ meren 200, mmɛ ɛnakom sɔ awut arkun k'awut aran alɔma mɔ.

24 Nahor ɛnasɔtɔ meren 29 a pədekom Terah. 25 Kəkom ka Terah, Nahor ɛnasɔtɔ sɔ meren 119, mmɛ ɛnakom sɔ awut arkun k'awut aran alɔma mɔ.

26 Terah ɛnasɔtɔ meren 70, a pədekom Abram, Nahor kɔ Haraŋ.

27 Tecepərɛnɛ ta Terah tɛntɛ: Terah okom Abram, Nahor kɔ Haraŋ. Haraŋ okom Lɔt. 28 Haraŋ, fɔr ya kas kiriŋ y' ɛnafi, atɔf nŋɛ anakom kɔ mɔ, nde dare da Ur nde atɔf ŋa Kaldi. 29 Abram kɔ Nahor ŋanɛŋcɛ. Wəran ka Abram aŋc-we Saray kɔ wəran ka Nahor, Milka. Milka, wan ka Haraŋ ɛnayi, ŋapaŋnɛ kas kin kɔ Yiska. 30 Saray ɛnakom fɛ, ɛnasɔtɔ fɛ wan.

31 Kɔ Terah ɛlɛk wan kɔn Abram, kɔ wan-sɔ kɔn Lɔt, wan ka Haraŋ, k'ɛlɛkɛnɛ sɔ Saray wəran ka Abram, kɔ ŋasol fəp faŋan kəwur ka nde dare da Ur nde atɔf ŋa Kaldi kəkɔ ka atɔf ŋa Kanahan. Kɔ ŋambəp atɔf ŋa Haraŋ kɔ ŋandɛ di. 32 Terah ɛnawon doru meren 205, a k'endefi dəndo atɔf ŋa Haraŋ.

<- Dəkəcop 10Dəkəcop 12 ->