1 Wərkun wəlɔma ɛnayi pac-we kɔ Ananiyas, kɔ wəran kɔn Safira, kɔ ŋaŋcaməs antɔf ŋaŋan. 2 Kətəŋnɛ disrɛ kɔ wəran kɔn, k’Ananiyas embelər kəway ka antɔf ŋaŋɔkɔ, k’ɛŋkɛrɛ kəway kələpəs nkɛ k’ɔŋkɔ pəbocər ki asom a Yesu dəntɔf.

3 Kɔ Piyɛr eyif kɔ: «Ananiyas, ake ’sɔŋɛ ntɛ məwosɛ Sentany səsɔŋ am kəyembər Amera Ŋecempi mɔ? Məmbelər kəway ka dalɛ. 4 Ntɛ dalɛ dandɛ dɛnayɔnɛ dam mɔ, ak’ ɛnasɔŋɛ ta məmɛŋkərnɛ di-ɛ? Ali ntɛ mənacaməs di mɔ, pəsam papɔkɔ, bafɔ pam pɛnayi ba? Ake ’sɔŋ’ am kəyɔ tantɛ-ɛ? Bafɔ afum ŋɔ məyembər de, mba Kanu!»

5 Ntɛ Ananiyas ene moloku mamɔkɔ mɔ, k’ɛntɛmpɛnɛ, k’eŋgbiŋ kifir, k’efi. Kɔ kənesɛ kəpɔŋ kəsumpər akɔ ŋanane ti mɔ fəp. 6 K’atɛmp ŋayɛfɛ kɔ ŋanɛpsər kɔ dəkasaŋke, kɔ ŋaŋkɔ ŋawup.

7 Ntɛ dec maas deŋcepər mɔ, kɔ wəran ka Ananiyas ɛmbɛrɛ, ta ɛŋcərɛ tɔkɔ tɛnacepər mɔ. 8 Kɔ Piyɛr eyif kɔ: «Məlok’ im ma kaŋce: Kəway kaŋkɛ kɔ nəŋcaməs dalɛ ba?»

Kɔ wəran nwɛ oloku «Ɛy, kəway kaŋkɔ yati kɔ.»

9 Kɔ Piyɛr oloku kɔ: «Ake ’sɔŋɛ ntɛ nəntəŋnɛ kɔ nəwak Amera ŋa Wəbɛ mɔ-ɛ? Məcərɛ a aŋɛ ŋawup wos əm mɔ, ŋayi nde dəkusuŋka, kəkekərɛ kɔ ŋander sɔ məna.»

10 Gbəŋcana babɔkɔ k’ɛntɛmpɛnɛ kɔ wɛcək dəntɔf, k’eŋgbiŋ kifir. Kɔ atɛmp ŋambɛrɛ kɔ ŋambəp kɔ pəfi. Kɔ ŋaŋkekərɛ kɔ, kɔ ŋaŋkɔ ŋawup wos kəsək. 11 Kɔ kənesɛ kəpɔŋ kəsumpər kəloŋkanɛ ka alaŋ fəp kɔ akɔ ŋanane moloku mamɔkɔ mɔ.

12 Asom a Yesu ŋaŋc-yɔ mɛgbɛkərɛ kɔ mes mɛwɛy-wɛy mɛlarəm mmɛ mɛnayi afum dacɔ mɔ. Alaŋ fəp ŋanacəmɛ kəfo kin nde akɛr nŋɛ aŋc-wenɛ «Akɛr ŋa Suliman» mɔ. 13 Afum aləpəs ŋaŋc-nesɛ kənɔŋkəl ŋa, mba ŋaŋc-yek-yekəs ŋa. 14 Kənay ka arkun kɔ aran aŋɛ ŋanalaŋ Wəbɛ mɔ, ŋaŋc-la oŋ kəla dəm. 15 Pac-kɛrɛ atɔtamnɛ səpɔ, pac-kɛrɛ ŋa dəyala kɔ dəsəpoko ntɛ tɔsɔŋɛ kɔ Piyɛr ender-ɛ, andulu ŋɔn gbəcərəm ŋɛtam kəbəp wəlɔma. 16 Kənay ka afum aŋɛ ŋanayi sədare nsɛ sənakɛl Yerusalɛm mɔ, ŋaŋc-yɛksɛ kəkɛrɛ Yerusalɛm atɔtamnɛ kɔ afum aŋɛ yɔŋk yɛlɛc yɛnasɔŋ dɛbəc mɔ nde asom a Yesu ŋanayi mɔ, fəp faŋan anataməs ŋa.

17 Wəloŋnɛ wəpɔŋ kɔ asadisi aŋɛ ŋasol mɔ ŋayɛfɛnɛ kəraca. 18 Kɔ ŋantəp asom a Yesu waca kɔ ŋambɛr ŋa dəbili. 19 Pibi papɔkɔ disrɛ kɔ mɛlɛkɛ ma Wəbɛ Kanu meŋgbiti cumba ca bili babɔkɔ, kɔ mowurɛnɛ ŋa. Kɔ mɛlɛkɛ moloku ŋa: 20 «Nəkɔ kəlɔ kəpɔŋ, nəloku afum moloku kɔ mes fəp ma tɔkɔtɛnɛ ta doru dandɛ.»

21 Ntɛ ŋane moloku mamɔkɔ mɔ, kɔ asom a Yesu ŋaŋkɔ bət-bət suy nde kəlɔ kəpɔŋ, kɔ ŋaŋcop kətəksɛ di afum.

Kɔ wəloŋnɛ wəpɔŋ ender kɔ akɔ ɛnasolɛ mɔ. Kɔ ŋawe aboc kiti aləpəs aSuyif kɔ abeki apɔŋ aka Yisrayel fəp, kɔ ŋasom a pakɔ pawurɛnɛ asom a Yesu dəbili, pakɛrɛ. 22 Kɔ asɔdar ŋafɔ ŋakɔ, mba ŋambəp fɛ ŋa dəbili, kɔ ŋalukus. Kɔ ŋaŋkɔ ŋaloku ti abɛ aŋɛ ŋanasom ŋa mɔ, ŋac-loku: 23 «Səŋkɔ səbəp cumba ca bili pacaŋ ci bel-bel, abum a ci ŋacəmɛ dəkəcəmɛ daŋan, mba səŋgbiti ali fum səŋbəp fɛ bili disrɛ.» 24 Ntɛ ŋane moloku mamɔkɔ mɔ, kɔ pəyi wəbɛ ka asɔdar a kəlɔ kəpɔŋ kɔ aloŋnɛ apɔŋ yama-yama te taŋan, kɔ ŋaŋyifnɛ cəke cɔ tes tantɛ tendeləpəsər-ɛ?

25 Kɔ fum wəlɔma ende pəloku ŋa: «Afum aŋɛ nənabɛr dəbili mɔ ŋayi nde kəlɔ kəpɔŋ, ŋac-təksɛ afum.»

26 Asɔdar a kəlɔ kəpɔŋ kɔ wəbɛ kəŋan ŋaŋkɔ kəlɛk asom a Yesu, kɔ ŋaŋkɛrɛ ŋa pəforu disrɛ, bawo ŋananesɛ afum kəcacas ŋa. 27 Ntɛ asɔdar ŋaŋkɛrɛ asom a Yesu mɔ, kɔ ŋaŋcəmbər ŋa fɔr ya aboc kiti aSuyif kiriŋ. Kɔ wəloŋnɛ wəpɔŋ eyifət ŋa, 28 k’oloku: «Bafɔ sənamɔnɛ nu kətəksɛ sɔ afum teta tewe tantɛ ba? Nəlas Yerusalɛm mɛtəksɛ monu! Kɔ nəloku gbɛs a mɛnɛ nəloŋər su pəlɛc pa defi da fum wəkawɛ.»

29 Piyɛr kɔ asom a Yesu ŋaloku: «Kəcəŋkəlɛ Kanu kəŋcepər ka afum! 30 Kanu ka atem asu kəntimi Yesu nwɛ nənacaŋ dəkətɔk kəpandən kɔ nəmələk kɔ mɔ. 31 Kanu kəndəs kɔ kəca kɔn kətɔt pəmɔ ntɛ ɔyɔnɛ wəkiriŋ kɔ wəyac mɔ, ntɛ tɔŋsɔŋɛ pəsɔŋ aka Yisrayel kəsəkpər bəkəc ŋacəmɛ dɔpɔ da Kanu darəŋ, paŋaŋnɛnɛ ŋa kiciya kəŋan mɔ. 32 Səna səyɔnɛ atəŋnɛ a moloku kɔ mes mamɔkɔ fəp, səna kɔ Amera Ŋecempi nŋɛ Kanu kəsɔŋ aŋɛ ŋaleləs kɔ ŋawosɛ toloku tɔn mɔ.»

33 Pənatɛlɛ aboc kiti aŋɛ ŋaŋc-cəŋkəl ŋa mɔ haŋ pəcepərər, kɔ ŋafaŋ kədif ŋa. 34 Mba wəFarisi wəlɔma ɛnayi ŋa dacɔ, pac-we kɔ Kamaliyel. Wətəksɛ sariyɛ ɛnayi, nwɛ afum fəp ŋanabɔtər mɔ. K’ɛyɛfɛ aboc kiti aSuyif dacɔ, k’oloku a pawurɛnɛ afum akaŋɛ kərɛsna, 35 k’oloku: «Arkun a Yisrayel! Nəkembərnɛ bel-bel ntɛ nəndeyɔ afum akaŋɛ mɔ. 36 Towon fɛ, Tudas ɛnalɛknɛ, afum masar maŋkəlɛ (400) ŋanacɛk kɔ darəŋ. Mba anamələk kɔ, afum akɔ ɛnasolɛ mɔ fəp k’ambɛləs ŋa. Ali wəkin anasak fɛ. 37 Ntɛ tatɔkɔ teŋcepər mɔ, kɔ Yudas wəKalile ɛyɛfɛ tɛm ntɛ aŋc-lɔm afum a dɔtɔf mɔ. K’osolɛ sɔ afum alarəm. Nkɔn sɔ anamələk kɔ, aŋɛ ɛnasɛp kəkafəli kəcəmɛ kɔ darəŋ mɔ fəp, kɔ ŋasaməsər. 38 Ndɛkəl ic-lok’ un, ta nəcɛpsər afum akaŋɛ, nəsak ŋa ŋakɔ. Kɔ pəyɔnɛ fɔ mɛfaŋ, kɔ pəyɔnɛ fɛ ti mɔyɔ maŋan nda fum mɛŋyɛfɛ-ɛ, mendesɔlɛ. 39 Mba kɔ pəyɔnɛ fɔ nda Kanu mɛŋyɛfɛ-ɛ, nəfɔdetam kəsɔlɛnɛ mi de! Nəkɛmərnɛ kədeyɛfərɛnɛ kɔ Kanu de!» Kɔ ŋane moloku mamɔkɔ Kamaliyel ɛnasɛp kəloku ŋa mɔ.

40 Kɔ ŋawe asom a Yesu, kɔ ŋasut ŋa, kɔ ŋamɔnɛ ŋa kətɔsɔ-lok-lokɛ tewe ta Yesu, kɔ ŋasak ŋa.

41 Kɔ asom a Yesu ŋawur ŋa aboc kiti dacɔ. Kɔ pəmbɔt ŋa kətɔrəs kəŋan teta kəleləs ka tewe ta Yesu. 42 Dɔsɔk o dɔsɔk pəyɔnɛ nde kəlɔ kəpɔŋ ka Kanu kɔ pəyɔnɛ fɛ ti nde wɔlɔ waŋan, ŋanasak fɛ kəc-təksɛ kɔ kəcam moloku mɔtɔt: A Yesu ɔyɔnɛ Krist, wəbɛ nwɛ Kanu kəyɛk-yɛk mɔ.

<- Yɛbəc 4Yɛbəc 6 ->