1 Dɔsɔk dɔlɔma Piyɛr kɔ Saŋ ŋampɛ nde kəlɔ kəpɔŋ ka Kanu dec dərɔfɔy, dec ndɛ antola Kanu mɔ. 2 Tosurɛnɛ pasarɛ wəbəc nwɛ aŋkomɛ kətɔ-kɔt mɔ. Dɔsɔk o dɔsɔk aŋc-kekərɛ kɔ padəs nde kusuŋka ka kəlɔ kəpɔŋ ka Kanu. Dəndo wəbəc nwɛ oŋc-tolanɛ daka nɔnɔfɔr disrɛ afum aŋɛ ŋaŋc-bɛrɛ kəlɔ kəpɔŋ mɔ. Kusuŋka nkɛ aŋc-we «Kusuŋka Kətɔt». 3 Ntɛ ɛnəŋk Piyɛr kɔ Saŋ aŋɛ ŋaŋc-kɔ kəbɛrɛ kəlɔ kəpɔŋ mɔ, k’ɛyɛfɛ kətola akakɔ nɔnɔfɔr disrɛ. 4 Piyɛr kɔ Saŋ ŋaŋgbətnɛ kɔ, kɔ Piyɛr oloku: «Məgbətnɛ su!» 5 K’ɛŋgbətnɛ ŋa pəc-kar kədesɔtər ŋa paka pɔlɔm.

6 Mba kɔ Piyɛr oloku oŋ: «Ali pəsam iyɔ fɛ, mba mpɛ iyɔ mɔ, ip’ indesɔŋ’ əm: Tewe ta Yesu Krist wəka Nasarɛt, məyɛfɛ, məkɔt!» 7 Gbəŋcana babɔkɔ kɔ ŋasumpər kɔ kəca kətɔt kɔ ŋayekti, wɛcək kɔ mɔgbɔlkɔc mɔn yɛŋcəp. 8 Kəsɔrnɛ katin k’ɛyɛfɛ k’ɛŋcəmɛ, k’ɛlɛk wɛcək kəkɔt. K’osol kɔ ŋa, kɔ ŋambɛrɛ kəlɔ kəpɔŋ ka Kanu disrɛ, pəc-kɔt, pəc-yokɛ, pəc-kor-koru Kanu. 9 Kɔ afum fəp ŋanəŋk wəbəc nwɛ pəc-kɔt, pəc-kor-koru Kanu. 10 Aŋc-nɛpəl kɔ, nkɔn ɛŋc-ndɛ nde kəlɔ kəpɔŋ nde «Kusuŋka Kətɔt» mɔ, pəc-tolanɛ daka nɔnɔfɔr disrɛ. Kənesɛ kɔ pəciyanɛ kəmbəp afum fəp teta tɔkɔ tɛnabəp kɔ mɔ.

11 Ntɛ fum nwɛ ɛnader pəyi oŋ ta ɛŋyɛfɛ Piyɛr kɔ Saŋ dəntɔf mɔ, kənesɛ disrɛ kɔ afum fəp ŋayɛksɛ kəkɔ nde akɛr nŋɛ aŋwenɛ «Akɛr ŋa Suleman», nde Piyɛr kɔ Saŋ ŋanayi mɔ. 12 Ntɛ Piyɛr ɛnəŋk ti mɔ, k’oloku afum: «Aka Yisrayel! Ake ’sɔŋɛ ntɛ tantɛ t’ eŋciyanɛ nu mɔ? T’ake tɔ nəŋgbətnɛnɛ su pəmɔ fənɔntər fosu, kɔ pəyɔnɛ fɛ ti-ɛ, dosoku dosu disrɛ dɔsɔŋɛ fum wəkawɛ kəkɔt? 13 Kanu ka atem asu Abraham, Isiyaka, kɔ Yakuba kəyek-yekəs wəcar kɔn Yesu. Mba nəna nəlɛk, kɔ nəsɔŋ abɛ, nəŋce kɔ fɔr ya Pilat kiriŋ, mba Pilat ɛnacɛm-cɛmnɛ kəsak kɔn. 14 Nəna nənace nwɛ ɔyɔnɛ wəcempi kɔ wəlompu kɔ nəloku a pawosɛ kəsakɛ nu wədifət afum dare disrɛ. 15 Nənadif wəkiriŋ wəka doru, mba Kanu kəyekti kɔ afi dacɔ. Sən’ ɔyɔnɛ atəŋnɛ aka ti. 16 Anasɔŋ fənɔntər fum wəkawɛ nəŋgbətnɛ kɔ nəŋcərɛ mɔ. Kəlaŋ kɔn Yesu gbəcərəm kəsɔŋ fum wəkawɛ fənɔntər. Kəlaŋ kɔn, kəlaŋ Yesu yati kəsɔŋ kɔ kətamnɛ keŋ fəp fɔr yonu kiriŋ.

17 Ndɛkəl oŋ, awɛŋc im aŋa, iŋcərɛ a kətɔ-cərɛ konu kənasɔŋɛ nu kəyɔ tatɔkɔ, nəna kɔ abɛ anu. 18 Kanu kənalas tɔkɔ kənanuŋkɛnɛ kəlokɛ cusu ca sayibɛ-e ɔn fəp mɔ: A pənamar dis dɔlɔl Krist, wəyɛk-yɛk kɔn. 19 Nəsəkpər bəkəc yonu, nəluksərnɛ ntɛ tɔŋsɔŋɛ paŋaŋnɛnɛ kiciya konu mɔ; 20 ntɛ tɔŋsɔŋɛ Wəbɛ Kanu pəkɛrɛ tɛm ta kəŋesəm, pəkɛrɛ nu sɔ Wəyɛk-yɛk kɔn, Yesu, nwɛ ananuŋkɛnɛ kəcam nu mɔ. 21 Nkɔn kɔm kəntɔmpər haŋ tɛm ntɛ mes mmɛ Kanu kənalokɛ tɛm tobol-bolu cusu ca sayibɛ ɔn səcempi mɔ mɛlarɛ. 22 Aŋnabi Musa ɛnaloku: ‹Wəbɛ, Kanu konu, endekɛrɛ nu sayibɛ pəmɔ ina. Fum wəkin wəka awɛŋc anu dacɔ endeyi, nəde nəcəŋkəl moloku mamɔkɔ ende pəc-loku nu mɔ fəp. 23 Nwɛ o nwɛ ɔntɔdecəŋkəl wədəŋk wəkakɔ mɔ, andeləsər kɔ. Endeməlkɛ afum a Kanu dacɔ.›

24 Sayibɛ-e fəp kəyɛfɛ aŋnabi Samiyɛl haŋ aŋɛ ŋanacɔŋc kɔ mɔ, ŋanaloku teta mataka mamɔkɔ, kɔ ŋaŋdəŋk mi. 25 Nəna, awut a sayibɛ-e ŋɔ nəyɔnɛ, kɔ nəyɔnɛ sɔ awut a temer tɔkɔ Kanu kənacaŋəs kɔ atem anu mɔ, kəc-loku Abraham: ‹Afum a doru fəp ŋandesɔtɔ kəpocɛ kətɔt kem teta kəbənda ka dokom dam.› 26 Te tonu tɔ, Kanu kənanuŋkɛnɛ kəyekti wəcar kɔn, k’osom kɔ kədetolanɛ nu, pəsəkpər nu nwɛ o nwɛ abəkəc ŋɔn ŋɛlɛc, ŋɔyɔnɛ kɔ ŋɔtɔt.»

<- Yɛbəc 2Yɛbəc 4 ->