1 Ntɛ səmbaŋərnɛ ŋa mɔ, kɔ səyekti abɛla kəkɔ ka Kɔs. Dɔckɔsɔk kɔ səŋcepər sɔ haŋ Rodu, kɔ səyɛfɛ dəndo kɔ səŋkɔ dare da Patara. 2 Ntɛ səmbəp di abil nŋɛ ŋɛŋc-cali kəba kəkɔ ka ntende atɔf ŋa Fenisi mɔ, kɔ səmbɛkɛ ŋi, kɔ səŋcali. 3 Sənadetɛfərnɛ Sipər, kɔ səsak si kəca kəmeriya, kɔ səŋkɔ kəca ka atɔf ŋa Siri, kɔ səŋkɔ səpɛ dare da Tir nde pənamar abil ŋotorɛ ca yɔkɔ ŋɛnayɔ disrɛ mɔ. 4 Ntɛ sənabəp di acɛpsɛ a Yesu mɔ, kɔ səyi di mata camət-mɛrəŋ. Kəcɔŋəs ka Amera ŋa Kanu disrɛ kɔ ŋaŋgbiŋər Pol a ta pəpɛ Yerusalɛm. 5 Ntɛ kiyi kosu dəndo kənalip mɔ, kɔ səŋkɔ. Kɔ alaŋ fəp ŋaŋcəmbər su, kəyɛfɛ aran kəbəp awut haŋ kɔ səwur dare disrɛ, kɔ səŋkɔ səcəp suwu dəndo dɛgbɛp kətola Kanu. 6 Ntɛ sənalembərnɛ ŋa mɔ, kɔ səmbɛkɛ debil, kɔ ŋa ŋalukus ndaraŋan.

7 Kɔ səna, kələpəs kosu kəkɔt kɔ səmbɛkɛ dare da Tir kəkɔ ka dare da Pətolemay. Nde sənakɔ səyif awɛŋc asu aŋa alaŋ mɔ, kɔ səŋcepərɛnɛ di dɔsɔk din. 8 Dɔckɔsɔk dɔ sənayɛfɛ di kəkɔ dare da Sesari. Dəndo sənabɛrɛ kəlɔ ka Filip, wəcam ka toloku tɔtɔt, nwɛ ɛnayɔnɛ wəkin ka afum camət-mɛrəŋ aŋɛ anayɛk-yɛk Yerusalɛm mɔ. Kɔ səŋcepərnɛ dəndo mata camət-mɛrəŋ. 9 Filip ɛnayɔ awut aran maŋkəlɛ aŋɛ ŋanatɔ-cərɛ arkun mɔ, aŋɛ ŋaŋc-dəŋk moloku mmɛ Kanu kəŋc-mar ŋa kəcam mɔ.

10 Ntɛ sənayi di mataka mɛlarəm mɔ, kɔ sayibɛ səlɔma səntor dare da Sesari kəyɛfɛ ka atɔf ŋa Yude, pac-we kɔ Akabus. 11 Ntɛ eŋc-der nnɔ səyi mɔ, k’ɛlɛk bɛlɛt ba Pol, k’oŋkotnɛ wɛcək kɔ waca. K’oloku: «Nəcəŋkəl ntɛ Amera Ŋecempi ŋa Kanu ŋoloku mɔ: Fum nwɛ ɔyɔ bɛlɛt bambɛ mɔ, tantɛ tɔ abɛ aSuyif alɔma ŋandekot kɔ Yerusalɛm, ŋabɛr kɔ atɔyɔnɛ Suyif dəwaca.»

12 Ntɛ səne toloku tatɔkɔ kɔ afum akɔ ŋanayi su kəsək mɔ, kɔ səlɛtsɛnɛ Pol ta pəpɛ Yerusalɛm. 13 Mba kɔ Pol oluksɛ su: «Ta ake tɔ nəmbokɛ, nəsɔŋ’ em abəkəc kəlɛcɛ-ɛ? Iwosɛ kəkot kem, iwosɛ sɔ kəfi kem Yerusalɛm teta tewe ta Wəbɛ Yesu.» 14 Ntɛ anasɛp kɔ antɔ-tam Pol dəmoloku mɔ, kɔ səŋce kɔ. Kɔ səntola: «Kanu kəsɔŋɛ tɛfaŋ ta Wəbɛ teyi!

15 Ntɛ səŋcepərɛnɛ mataka mamɔkɔ dare da Sesari mɔ, kɔ səlompəsnɛ, kɔ səlɛk dɔpɔ kəpɛ ka Yerusalɛm. 16 Kɔ səsol kɔ acɛpsɛ a Yesu alɔma kɔ sənder kəyɛfɛ ka dare da Sesari. Kɔ ŋaŋkekərɛ su nda fum wəlɔma nwɛ pənamar səyi ndɔrɔn mɔ, pac-we kɔ Manasɔŋ. WəSipər ɛnayi, ɛnayɔnɛ wəcɛpsɛ wəka Yesu darəŋ kəyɛfɛ ntɛ pənawon mɔ.

17 Kəbɛrɛ kosu Yerusalɛm, kɔ awɛŋc asu aŋa alaŋ ŋaselɛnɛ su pəbotu disrɛ. 18 Dɔckɔsɔk kɔ səsol kɔ Pol, kɔ səŋkɔ ndena Sak. Kɔ abeki a kəloŋkanɛ ka alaŋ a Yerusalɛm fəp ŋambəpsɛnɛ dəndo. 19 Kɔ Pol ɛfaynɛ ŋa, k’ɛyɛfɛ kəlɔmər ŋa tin tin tin mes fəp mmɛ Kanu kənamar kɔ kəyɔ aSuyif dacɔ mɔ.

20 Ntɛ ŋalip kəcəŋkəl Pol mɔ, kɔ ŋayɛk-yekəs Kanu. Kɔ ŋaloku Pol: «Məmɔmən, wɛŋc kosu, afum asu wul wɛlarəm ŋayɔnɛ alaŋ Yesu ŋasumpərɛnɛ sɔ sariyɛ waca mɛrəŋ. 21 Awa aSuyif alɔma ŋacɛm-cɛmmɛ kəne a kətəksɛ kam disrɛ a məloku aSuyif aŋɛ ŋayi afum acuru dacɔ mɔ a ŋasak sariyɛ sa Musa: Ta ŋakəŋc awut, ta ŋacəmɛ mɔyɔ mokur ma aSuyif darəŋ. 22 Cəke c’ andeyɔ-ɛ? Bawo ŋaŋkɔ-ne a mənder nnɔ. 23 Awa məyɔ tɔkɔ səndelok’ əm mɔ. Səyɔ nnɔ arkun maŋkəlɛ aŋɛ ŋanasɔŋ Kanu temer mɔ. 24 Məlɛk ŋa, nəkɔ kəlɔ kɔpɔŋ ka Kanu, məsɔkəsnɛ kɔ ŋa. Kɔ məwosɛ-ɛ, məlɛk kəwurɛ pəsam pa kəway kəŋan ka kəloŋnɛ, ntɛ tɔŋsɔŋɛ ŋafonnɛ səbomp mɔ. Ti disrɛ fəp fəndetam kəcərɛ a mes mɔkɔ asɔŋɛ ŋa kəlaŋ tetam mɔ fəp mɔyɔnɛ fɛ kaŋce, a məna sɔ yati məleləs teta sariyɛ sa Musa. 25 Ntɛ tɔyɔnɛ ta atɔyɔnɛ Suyif aŋɛ ŋayɔnɛ alaŋ mɔ, sənəŋk fɔ pəntesɛ kəcicɛ ŋa reka kəbocɛ ŋa tɔŋc: A ta ŋasɔm sɛm nyɛ aloŋnɛnɛ molom mɔ, ta ŋadi mecir, ta ŋasɔm sɛm nyɛ antɔfay mera mɔ, ta ŋasumpər dalakɔ.»

26 Dɔckɔsɔk kɔ Pol ɛlɛk afum aŋɛ, kɔ ŋaŋcop kəsɔkəsnɛ, k’ɛmbɛrɛ kəlɔ kəpɔŋ ka Kanu disrɛ, k’ɔŋkɔ pəboŋc dɔsɔk ndɛ kəsɔkəsnɛ kəŋan kəndelip mɔ, kɔ dɔsɔk ndɛ andeloŋnɛnɛ nwɛ o nwɛ mɔ.

27 Dəkələpəsər da mataka mamɔkɔ camət-mɛrəŋ, ntɛ aSuyif alɔma aŋɛ ŋayɛfɛ atɔf ŋa Asi ŋanəŋk Pol kəlɔ kəpɔŋ ka Kanu disrɛ mɔ, kɔ ŋampɛnɛ bəkəc ya afum fəp, kɔ ŋasumpər kɔ. 28 Ŋac-kulɛ-kulɛ: «Arkun a Yisrayel, nəder nəmar su! Wəkawɛ ɛntəksɛ afum fəp kəfo o kəfo tɔkɔ tɔntɔtesɛ afum asu, sariyɛ sosu, kɔ nnɔ kəfo kaŋkɛ mɔ! Ali aKresi ɛmbɛrsɛnɛ ŋa nnɔ kəlɔ kəpɔŋ ka Kanu, k’eyik-yikəs kəfo kəsoku kaŋkɛ!» 29 Ŋanabokɛnɛ ntɛ bawo tɔcɔkɔ-cɔkɔ ŋananəŋk Pol kɔ Tirofimo wəka Efesi ŋasol dare disrɛ, kɔ ŋaŋcɛm-cɛmnɛ a Pol ɛnabɛrsɛnɛ kɔ kəlɔ kəpɔŋ ka Kanu disrɛ.

30 Kɔ dare məl-məl deyi yama-yama, kɔ afum ŋayɛfɛ waca fəp kɔ ŋasumpər Pol, kɔ ŋaliŋəs kɔ kəwurɛnɛ abaŋka ŋa kəlɔ kəpɔŋ ka Kanu disrɛ, k’aŋcaŋəs cumba katina. 31 Ntɛ ŋanayi kəsɛp kədif kɔ mɔ, k’aŋkɔ paloku wəbɛ wəsɔdar wəRom a pəyama-yama peyi Yerusalɛm fəp. 32 Gbəŋcana babɔkɔ kɔ wəbɛ wəsɔdar wəpɔŋ nwɛ ɛlɛk asɔdar kɔ abɛ aŋan alɔma kɔ ŋayɛksɛ kəkɔ di. Ntɛ aSuyif ŋanəŋk asɔdar aŋɛ kɔ abɛ aŋan mɔ, kɔ ŋasak kəsut Pol.

33 Kɔ wəbɛ wəpɔŋ wəsɔdar nwɛ ɔŋcɔŋnɛ, k’osumpər Pol, k’osom a pakotɛ kɔ gbekce mɛrəŋ. K’eyif fum nwɛ ɔyɔnɛ mɔ, kɔ tɔkɔ ɔyɔ mɔ. 34 Kənay kaŋkɔ dacɔ, alɔma ŋac-kulɛ ntɛ, akɔ ŋac-kulɛ tɔkɔ. Ntɛ ɛnader pəyi oŋ ta eŋne tɔlɔm o tɔlɔm teta pəyama-yama papɔkɔ mɔ, kɔ wəbɛ oloku a pakekərɛ Pol dəkədirɛ da asɔdar. 35 Ntɛ Pol ɛmbəp dəkusuŋka mɔ, kɔ asɔdar ŋasipnɛ kɔ, bawo ŋananesɛnɛ kɔ pəlec pɔkɔ afum ŋanafaŋ kəyɔ kɔ mɔ. 36 Kənay ka afum kənacəmɛ Pol darəŋ, ŋac-kulɛ: «Pamələk kɔ!»

37 Tɛm ntɛ anadekɔ-faŋ kɔ kəbərsɛnɛ dəkədirɛ da asɔdar mɔ, kɔ Pol eyif wəbɛ wəsɔdar cəKresi: «Aŋwos’em kəlok’ əm tes tɔlɔma ba?» Kɔ wəbɛ eyif kɔ: «Məŋcərɛ kəcɔp cəKresi ba? 38 Bafɔ wəMisira məyɔnɛ, wəkɔ ɛntɛp kəc-sɔŋɛ pəyama-yama kəyi mɔ, məkɛrɛ adifət afum wul maŋkəlɛ (4000) nde dətɛgbɛrɛ ba?»

39 Kɔ Pol oloku: «Awoŋ! Ina, wəSuyif iyɔnɛ, dare da Tarəs atɔf ŋa Silisi aŋkom im, fum wəka dare dɔpɔŋ de! Intol’ am, məwosɛ ilok-lokər afum.»

40 Kɔ wəbɛ wəsɔdar owosɛ kɔ ti. Kɔ Pol ɛmpɛ k’ɛŋcəmɛ dəkusuŋka, k’ɛfɛk afum kəca. Kɔ afum fəp ŋaŋcaŋk, k’olok-lokər ŋa cəArame, kusu ka aSuyif aka di.

<- Yɛbəc 20Yɛbəc 22 ->