1 Ntɛ ŋaŋcepər Aŋfipoli kɔ Apoloni mɔ, kɔ ŋambɛrɛ dare da Tɛsaloni, nde aSuyif ŋanayɔ kəlɔ ka dəkətola Kanu mɔ. 2 Kɔ Pol ɔŋkɔ pəmɔ tɔkɔ ɔŋc-yɔ mɔ, dɔsɔk deŋesəm maas ŋac-gbɛkəlɛnɛ dəyecicəs yecempi kɔ ŋa. 3 Pol ɛŋc-mentər ŋa kəsɔk pɛs dəkitabu a pənamar dis dɔlɔl Krist, a pədeyɛfɛ afi dacɔ. Pol oŋc-loku ŋa: «Yesu nwɛ iŋcamər nu tetɔn mɔ, nkɔn ɔyɔnɛ Krist, wəbɛ nwɛ Kanu kəyɛk-yɛk mɔ.» 4 Anasɛp haŋ kɔ aŋkafəli alɔma ŋa dacɔ kɔ ŋalaŋ ti, kɔ ŋaŋcəmɛ moloku ma Pol kɔ Silas darəŋ, kəbəp ka akor-koru Kanu aKresi alarəm, kəlɛkɛnɛ sɔ aran abeki alɔma.

5 Mba kɔ aSuyif aka dare da Tɛsaloni alɔma ŋayɔ kəraca. Kɔ ŋaloŋka afum alɛc alɔma dɔpɔ dacɔ, kɔ ŋayekti pəyama-yama dare disrɛ. Kɔ ŋaŋkɔ ŋamɛpnɛ kəlɔ ka Yason, ŋac-tɛn Pol kɔ Silas kəkekərɛ ŋa kənay ka afum fɔr kiriŋ. 6 Ntɛ ŋantɔnəŋk Pol kɔ Silas mɔ, kɔ ŋaliŋəs Yason kɔ awɛŋc aŋa alaŋ alɔma fɔr ya abɛ a dare kiriŋ. Ŋac-kulɛ: «Afum akaŋɛ ŋaŋkafəli-kafəli doru dandɛ fəp mɔ, ŋayi oŋ nnɔ, 7 kɔ Yason nkɔn ɛmbaŋ ŋa!» Afum akaŋɛ fəp ŋaŋce moloku mmɛ wəbɛ wəka tɔf ya Rom fəp oloku mɔ, ŋac-loku a wəbɛ wəlɔma eyi, pac-we kɔ Yesu!» 8-9 It’ ɛnasɔŋɛ ŋayekti pəyama-yama kənay ka afum dacɔ. Ntɛ abɛ a dare ŋane ti mɔ, ŋambaŋər Yason kɔ awɛŋc aŋa alaŋ pəsam, kɔ ŋasak ŋa.

10 Pibi papɔkɔ disrɛ kɔ awɛŋc aŋa alaŋ ŋasak Pol kɔ Silas kəkɔ dare da Bere. Ntɛ ŋambɛrɛ di mɔ, kɔ ŋaŋkɔ nde kəlɔ ka dəkətola Kanu da aSuyif. 11 Akakɔ ŋanabɔt mes ŋatas aka Tɛsaloni, kɔ ŋaŋcəŋkəl toloku ta Kanu bel-bel pəbotu disrɛ. Ŋac-kɔkcɛ sɔ kitabu bel-bel dɔsɔk o dɔsɔk kəcərɛ kɔ pəyɔnɛ fɔ moloku min mayi mɔ kɔ tɔkɔ Pol kɔ Silas ŋaŋloku ŋa dəkətola Kanu mɔ. 12 Kɔ afum alarəm ŋa dacɔ ŋayɔnɛ alaŋ, kəlɛkɛnɛ aran aKresi aŋɛ ŋanabɛk dəkəcəmɛ mɔ, kɔ arkun alarəm.

13 Mba ntɛ aSuyif aka Tɛsaloni ŋanadecərɛ a Bere sɔ Pol eyi kəcam toloku ta Kanu mɔ, kɔ ŋander sɔ dəndo kədeyekti pəyama-yama ŋabɛr kənay ka afum mɛr. 14 Kɔ awɛŋc aŋa alaŋ ŋambɛlkər kəkekərɛ Pol kəca ka dəkəba, mba Silas kɔ Timote ŋayi dəndo Bere. 15 Afum aŋɛ ŋanasolɛ Pol mɔ, ŋanakekərɛ kɔ haŋ dare da Atɛn. Dəkəlukus daŋan kɔ Pol osom ŋa nde Silas kɔ Timote ŋayi mɔ, a ŋabɛlər kɔ katəna-katəna.

16 Ntɛ Pol ɛŋc-kar Silas kɔ Timote nde dare da Atɛn mɔ, kənəŋk ka dare dadɔkɔ dɛlarɛ mɛrəŋka kənabɛr-bɛrɛ Pol dɛbəkəc. 17 Pol ɛŋc-gbɛkəlɛnɛ kɔ aSuyif kɔ alɔma akɔ ŋanader kəkor-koru nde kəlɔ ka dəkətola Kanu mɔ, pəc-gbɛkəlɛnɛ sɔ dɔsɔk o dɔsɔk kɔ afum akɔ ŋaŋc-yi nde abaŋka ŋa dare mɔ. 18 Acɛpsɛ mɛtəksɛ ma Epikuru kɔ ma Seno darəŋ alɔma ŋander ŋacaŋ kɔ moloku. Alɔma ŋac-loku: «Wəlok-loku ɔfɔ wəkawɛ! Cəke c’ ɛfaŋ kəloku tantɛ?» Akɔ ŋac-loku: «Wəkawɛ pəwurɛnɛ pəmɔ ntɛ endecam teta canu cəcikəra mɔ!» Ŋanaloku ti bawo toloku tɔtɔt ta Yesu kɔ kəyɛfɛ kɔn afi dacɔ kɔ Pol oŋc-loku.

19 Awa kɔ ŋalɛk Pol, kɔ ŋaŋkekərɛ kɔ tɛpɛsa mpɛ aŋc-we Areyopako mɔ kəroŋ, kɔ ŋayif Pol: «Məloku su kətəksɛ kəfu kaŋkɛ məyi kəloku ta ki mɔ, 20 bawo moloku mamɛ məyi kəloku mɔ, mɔyɔnɛ ləŋəs yosu mofu. Səfaŋ kəcərɛ tedisrɛ ta mi.» 21 Awa dəmɔyɔ ma aka dare da Atɛn kɔ acikəra aŋɛ ŋanayi di mɔ fəp, ŋaŋc-cepərɛnɛ di tɛm taŋan fəp kəc-loku, kɔ pəyɔnɛ fɛ ti-ɛ, ŋac-cəŋkəl moloku mofu.

22 Pol pəcəmɛ tɛpɛsa ta Areyopako kəroŋ, k’oloku: «Arkun a dare da Atɛn, inəŋk a afum asumpər dinɛ bel-bel ŋɔ nəyɔnɛ. 23 Ntɛ indenakɔt dare donu mɔ, k’inəŋk mɛrəŋka monu, k’iŋkɔkcɛ aŋgbip ŋonu ŋɔlɔma pacic ŋi ntɛ: ‹Ta kanu nkɛ antɔcərɛ mɔ.› Awa tes tɔkɔ nəŋkor-koru ta nəŋcərɛ ti mɔ, tatɔkɔ yati t’ inder kəlok’ un.

24 Kanu nkɛ kəlompəs doru kɔ daka ndɛ dɔyɔ mɔ fəp, nkɔn nwɛ ɔyɔnɛ Wəbɛ wəka kɔm kɔ antɔf ɔfɔtam kəyi kəlɔ kəpɔŋ nkɛ alompəsɛ waca wa fum teta kəkor-koru kɔn mɔ. 25 Waca wa fum wɔfɔtam kəmar Kanu kəyi, pəmɔ ntɛ kəŋfaŋər fum tɔlɔm mɔ. Nkɔn ompocɛ afum yeyinɛ yaŋan doru, kəpɛnɛ kifir kɔ kətorɛ, kəbəp ka ca yɛləpəs nyɛ fəp. 26 Dəfum wəkin ɔ Kanu kəwurɛ tɔf ya afum aləpəs a doru aŋɛ fəp, ntɛ tɔŋsɔŋɛ ŋandɛ antɔf fəp kəroŋ mɔ. Kɔ Kanu kənanuŋkɛnɛ kəcic cələŋcər ca tɔf yayɔkɔ fəp. Kɔ kəlompəs dɛrən kɔ kətən teren o teren disrɛ. 27 Kanu kənayɔ ti ntɛ tɔŋsɔŋɛ ŋatɛn kɔ haŋ ŋanəŋk kɔ kəbuma-buma disrɛ mɔ, bawo Kanu kəmbɔlɛ fɛ nwɛ o nwɛ. 28 Ntɛ tɔ nəne moloku mamɛ: ‹Nkɔn ɔsɔŋɛ su kəyi doru, nkɔn ɔŋsɔŋɛ su kəcepɛ, nkɔn ɔsɔŋɛ su kəyi tantɛ ayi mɔ.› Itɔ aleŋsɛ anu alɔma ŋaloku:

‹Kəbənda ka dokom da Kanu kɔ səna sɔ səyi.›