1 Wərkun wəlɔma ɛnayi Sesari pac-we kɔ Kɔrneli, pəyɔnɛ wəbɛ ka kəgba ka asɔdar tasar tin (100). Kəgba kaŋkɔ k’aŋc-we «Kəgba Itali.» 2 Nkɔn kɔ aka kəlɔ kɔn disrɛ fəp ŋaŋc-nesɛ Kanu, ŋacəmɛ tɛfaŋ ta ki darəŋ. Kɔ Kɔrneli ɔŋc-yɔnɛ afum nɔnɔfɔr, pəc-tola Kanu tɛm fəp. 3 Dɔsɔk dɔlɔma dec dɔrɔfɔy, k’ɛnəŋk pəsoku pɛs kənəŋk disrɛ, mɛlɛkɛ ma Kanu mɔlɔma mɛbɛrɛ nde kəlɔ kɔn disrɛ, kɔ mewe kɔ: «Kɔrneli!»

4 K’ɛŋgbətnɛ mi, kɔ kənesɛ kəyi kɔ, k’eyif mi: «Acəke Wəbɛ?»

Kɔ mɛlɛkɛ mamɔkɔ moloku kɔ: «Motola mam kɔ kəyɔnɛ kam afum nɔnɔfɔr, mes mamɔkɔ fəp mɛmpɛ nde Kanu fɔr kiriŋ, kɔ kəŋcɛm-cɛmnɛ mi. 5 Məsom oŋ afum dare da Yope ŋakɔwen’ am fum wəlɔma nwɛ aŋwe Simɔŋ mɔ, pac-deŋər kɔ tewe ta ‹Piyɛr›. 6 Ndena Simɔŋ wəlɔma eyi, wəkakɔ wəbəc kata ɔfɔ, kəlɔ kɔn kəyi kəba kəsək.»

7 Ntɛ mɛlɛkɛ mamɔkɔ mɛnalok-lokər kɔ mɔ mɛnadelukus, kɔ Kɔrneli ewe amarəs ɔn mɛrəŋ kɔ wəsɔdar wəcəmɛ mɛfaŋ ma Kanu darəŋ wəlɔma aŋɛ ŋanayi kɔ dəntɔf mɔ. 8 Ntɛ Kɔrneli elip kəlɔmər asɔdar ɔn mes mɔkɔ mɛnacepər nkɔn kɔ mɛlɛkɛ dacɔ mɔ, k’osom ŋa Yope.

9 Dɔckɔsɔk, ntɛ ŋanayi dɔpɔ, a ŋac-lɔtərnɛ dare da Yope mɔ, kɔ Piyɛr ɛmpɛsɛ akɛr ŋa kəlɔ kɔn kakəroŋ kəkɔ-tola Kanu, tɛnatəŋnɛ daŋ dɛc-bəp. 10 Kɔ dor dɔyɔ kɔ, k’ɛfaŋ kədi yeri. Tɛm tɔkɔ anayi kəlompəsɛ kɔ yeri mɔ, kɔ kənəŋk kənder kɔ. 11 K’ɛnəŋk kɔm kəgbitɛ, paka pɔlɔma mpɛ pɛnawurɛnɛ kɔ manta mɔpɔŋ mmɛ anasumpər moŋkubut maŋkəlɛ mɔ, montor haŋ kɔ mɛfəntərɛ dəntɔf. 12 Sɛm dokom fəp yɛnayi manta mamɔkɔ disrɛ, kəyɛfɛ sɛm ya wɛcək maŋkəlɛ, yeliŋɛ-liŋɛ haŋ kəbəp bɛmp ya dareŋc. 13 Kɔ dim dɔlɔma doloku kɔ: «Piyɛr, Məyɛfɛ, mədif, məsɔm!»

14 Kɔ Piyɛr oloku: «Ala Wəbɛ! Tɔlɔm o tɔlɔm tɛntasɔŋɛ f’em kəsɔm paka mpɛ sariyɛ səmɔnɛ mɔ.»

15 Ta mɛrəŋ kɔ dim ndɛ dolok-lokər kɔ sɔ: «Paka mpɛ Kanu kəcempəs mɔ, ta məna məyik-yikəs pi.»

16 Kɔ teyi kəmaas, pəwon fɛ k’ampɛnɛ dəkɔm manta mamɔkɔ mɛnayɔ sɛm mɔ.

17 Kɔ tedisrɛ ta kənəŋk kaŋkɔ teyi Piyɛr yama-yama. Tɛm tatɔkɔ tɔ asom a Kɔrneli, ntɛ amentər ŋa kəlɔ ka Simɔŋ mɔ, kɔ ŋaŋkɔ ki nde dəkusuŋka. 18 Kɔ ŋawe, kɔ ŋayif kɔ pəyɔnɛ fɔ kəlɔ kaŋkɔ kɔ Simɔŋ nwɛ andeŋər tewe ta «Piyɛr» mɔ eyi-ɛ.

19 Ntɛ Piyɛr eyi kəcɛm-cɛmnɛ tedisrɛ ta kənəŋk kɔn mɔ, kɔ Amera ŋa Kanu ŋoloku kɔ: «Arkun maas ŋayi nde dabaŋka ŋac-tɛn əm. 20 Mətor, nəsol nəkɔ kɔ ŋa, ali kənesɛ ta kəy’ im, bawo In’ osom ŋa.»

21 Kɔ Piyɛr ontor k’eyif arkun aŋɛ: «Ina nəntɛn, ta ake tɔ nənderɛnɛ nnɔ-ɛ?»

22 Kɔ ŋaloku kɔ: «Kɔrneli, wəbɛ wəka asɔdar tasar tin (100), fum wəlompu pəc-nesɛ Kanu, nwɛ aSuyif fəp ŋaŋcərɛ dɔtɔt dɔn akɔ ŋaloku mes mɔn mɔtɔt mɔ, ndɔrɔn Kanu kəsom mɛlɛkɛ mosoku, a pəsak su sədew’ am pəkɔ-cəŋkəl’ əm ntɛ pəmar məloku kɔ mɔ.» 23 Awa kɔ Piyɛr ɛmbɛrsɛ ŋa dɛkɛr, k’ɔsɔŋ ŋa dəkəyi.

Dɔckɔsɔk kɔ Piyɛr ɛyɛfɛ, k’ɔŋkɔ kɔ ŋa. K’awɛŋc alaŋ a dare da Yope alɔma ŋaŋcəmbər kɔ. 24 Kɔ ŋambɛrɛ Sesari dɔckɔsɔk, Kɔrneli pəc-kar ŋa, k’ewe akomɛnɛ ɔn alɔma nde ndɔrɔn kɔ anapa ɔn atɔt. 25 Kəbɛrɛ ka Piyɛr, kɔ Kɔrneli ɔŋkɔ pəfaynɛ kɔ, k’ɛntɛmpɛnɛ kɔ wɛcək dəntɔf. K’ɛŋcəpɛ kɔ suwu. 26 Mba kɔ Piyɛr eyekti kɔ, k’oloku: «Məyɛfɛ, ina sɔ fum iyɔnɛ.»

27 Ŋayi kəlok-loku kɔ Kɔrneli, k’ɛmbɛrɛ k’ɛmbəp afum alarəm ŋaloŋkanɛ. 28 Kɔ Piyɛr oloku ŋa: «Nəŋcərɛ a amɔnɛ aSuyif kəbɔt kɔ acikəra, kɔ pəyɔnɛ fɛ ti-ɛ, pəbɛrɛ ndɔrɔn. Mba Kanu kəmentər im a pəmar fɛ a pakulɛ fum o fum a eyik-yik, kɔ pəyɔnɛ fɛ ti-ɛ, pəmar fɛ sɔ a pakulɛ fum o fum a ɔsɔk fɛ fɔr ya Kanu kiriŋ. 29 It’ ɔsɔŋɛ ntɛ məsom a pakɔ-w’ em mɔ, k’inder ali ta iŋcɛm-cɛmnɛ-ɛ. Ndɛkəl iyif əm, T’ ake tɔ məwen’ em-ɛ?»

30 Kɔ Kɔrneli oloku: «Tɔsɔtɔ mata maŋkəlɛ ic-tola nnɔ nderem, dɔfɔy dendebəp. K’inəŋk fɔr yem kiriŋ wərkun wəlɔma pəbɛrnɛ yamos yomotər-motər. 31 Kɔ fum wəkakɔ oloku: ‹Kɔrneli, Kanu kəmbaŋ kətola kam, k’ɛŋcɛm-cɛmnɛ sɔ kəyɔnɛ kam afum nɔnɔfɔr. 32 Məsom fum dare da Yope pakɔ-wen’ am Simɔŋ nwɛ andeŋər tewe ta «Piyɛr» mɔ, nde kəlɔ ka Simɔŋ, wəbəc kata, nwɛ kəlɔ kɔn kəyi kəba kəsək mɔ.› 33 K’isom katina fum, kɔ məna məsɔtɔ abəkəc ŋɔtɔt kəder. Ndɛkəl oŋ səyi fəp fosu Kanu fɔr kiriŋ, sədecəŋkəl moloku mɔkɔ Wəbɛ osom əm kəloku mɔ.»

34 Awa kɔ Piyɛr ɛlɛk moloku, k’oloku: «Kaŋce: Iŋcərɛ oŋ a Kanu kəyi fɛ kəsək kin. 35 Mba afum fəp dacɔ məna nwɛ məŋnesɛ Kanu, məcəmɛ pəlompu darəŋ mɔ, Kanu kəmbaŋ əm. 36 Kanu kənakenɛ aka Yisrayel toloku, pəc-loku ŋa moloku mɔtɔt ma pəforu mpɛ Yesu Krist ɛŋkɛrɛ afum fəp mɔ: Nkɔn ɔyɔnɛ Wəbɛ ka afum fəp. 37 Nəna nəŋcərɛ tɔkɔ teyi Yude fəp mɔ, Kalile tɛnacop, ntɛ Saŋ ɛnacam kəgbət dəromun mɔ. 38 Kanu kənabɔy Yesu wəka Nasarɛt Amera Ŋecempi ŋɔn kɔ fənɔntər. Nnɔ o nnɔ eŋc-cepər mɔ, ɔŋc-yɔ pətɔt, pəc-taməs afum fəp aŋɛ amera ŋɛlɛc ŋɔŋc-tɔrəs mɔ, bawo Kanu kənayi kɔ nkɔn Yesu.

39 Səyɔnɛ atəŋnɛ a mes fəp mmɛ Yesu ɛnayɔ nde atɔf ŋa aSuyif kɔ Yerusalɛm mɔ. Nkɔn nwɛ ŋananim, ŋacaŋ kɔ dəkətɔk mɔ, 40 mba Kanu kənatimi kɔ tataka tɔn ta maas. Kɔ kəsɔŋ kɔ kəmentərnɛ, 41 bafɔ nnɔ afum fəp ŋayi mɔ, mba nnɔ atəŋnɛ mes aŋɛ Kanu kənanuŋkɛnɛ kəyɛk-yɛk, kɔ səna aŋɛ sənadi yeri, səmun kɔ nkɔn ntɛ ɛnayɛfɛ afi dacɔ mɔ. 42 K’osom su kəloku afum, səmentər a nkɔn Yesu, nkɔn ɔ Kanu kəŋcəmbər kəyɔnɛ nwɛ endebocɛ afum afi kɔ ayi wəyeŋ kiti mɔ. 43 Sayibɛ-e fəp sənaloku tetɔn: Nwɛ o nwɛ ɛgbɛkər kəlaŋ kɔn Yesu mɔ, endesɔtɔ nde Kanu kəyi mɔ kəŋaŋnɛnɛ ka mes mɔn mɛlɛc teta tewe ta Yesu.»

44 Moloku mamɔkɔ mɔ Piyɛr ɛnayi kəloku, ntɛ Amera Ŋecempi ŋa Kanu ŋɛnatorər afum akɔ ŋaŋc-cəŋkəl moloku mɔn mɔ. 45 Cusu cənawos alaŋ a Kanu, akəŋc akɔ ŋanader kɔ Piyɛr mɔ, kənəŋk a kəpocɛ ka Amera Ŋecempi kənasaməsər kəbəp haŋ acikəra aŋɛ ŋantɔyɔnɛ aSuyif mɔ, 46 bawo ŋaŋc-ne ŋa kəkor-koru Kanu cusu c’ acikəra.

Awa kɔ Piyɛr ɔŋgbɔkərɛ: 47 «Antam kəfatɛnɛ kəgbət afum dəromun nnɔ akaŋɛ ŋasɔtɔ Amera Ŋecempi pəmɔ səna mɔ ba?» 48 K’oloku a pagbət akakɔ dəromun tewe ta Yesu Krist. Kɔ ŋalɛtsɛnɛ Piyɛr kəyi dəndo mataka mɔlɔma.

<- Yɛbəc 9Yɛbəc 11 ->