4
1 ɑ sɑ̃ɑwɑ kurɔ burɔ, nɛn kĩnɑsi.
Wunɛn nɔni yi bɑllimɔ nge wɑɑ bɑkɑgii wunɛn sɔnditiɑn wɛ̃rin di.
Wunɛn seri yi sɑ̃ɑ nge boo wuuru te tɑ sɑrɑmɑmɔ Gɑlɑdin guuru wɔllun di.
2 Wunɛn donnu nu buriri nge yɑ̃ɑ nìn sɑnsu bɑ bɔɔrɑ nu nim nɔrum wee.
Nu mɑɑ nɔɔ nɛwɑ swɛɛ swɛɛ, nin gɑrɑ kun kɑnde.
3 Wunɛn nɔɔ gɑ swɛ̃riwɑ nge tom,
mɑ gɑ wɑɑbu wɑ̃.
Wunɛn bɑɑnu nu bɑllimɔwɑ nge dire sɔnsɔm biɑ wunɛn sɔnditiɑn wɛ̃rin di.
4 Wunɛn wĩirɑ wɑ̃wɑ nge Dɑfidin dii bwereku gɑgu
mi bɑ rɑ tɑbu yɑ̃nu bere.
Wunɛn sɑbɑn bɑtɑnibɑ bɑ sɑ̃ɑ nge tɑbu yɑ̃ɑ ni bɑ bwɛ̃ mi.
5 Wunɛn bwɑ̃su sɑ̃ɑ nge yɑɑ kpikun binu yiru ni nu yɑkɑsu dimɔ biibiin suunu sɔɔ.
6 Sere sɔ̃ɔ u kɑ du sɑɑru tu kpɛ̃ɑ,
kon dɑ guuru wɔllɔ mi turɑre ye bɑ mɔ̀ miru kɑ turɑre dɛkɑgiɑ yɑ wɑ̃ɑ.
7 A sɑ̃ɑwɑ kurɔ burɔ, nɛn kĩnɑsi.
A ǹ bɑu gɑgu mɔ.
8 A nɑ su doonɑ sɑɑ Libɑnin guunun di
kɑ Seniri kɑ Hɛɛmɔɔn guurun di
mi gbee sinɑnsu kɑ musuku yɑmbɑrɔsu rɑ n wɑ̃ɑ.
9 Bɛsɛn nɔni yì n yinnɑ, ǹ kun mɛ nɑ̀ n wunɛn sɑbɑn bɑtɑni tiɑ wɑ,
wunɛn kĩrɑ rɑ nɛn gɔ̃ru kpuro mwɛwɑ, nɛn sesu, nɛn kurɔ.
10 Wunɛn kĩru tɑ nuku dobu mɔ nɛn sesu, nɛn kurɔ.
Wunɛn kĩru tɑ tɑm dobu kere.
Mɛyɑ mɑɑ wunɛn turɑren nuburu tɑ do tɑ turɑre kpuro kere.
11 Wunɛn nɔɔ gɑ sɔ̃subu do nge tim bɑu.
Tim kɑ bom mu wɑ̃ɑ wunɛn nɔɔ sɔɔ.
Wunɛn yɑ̃nu nu nuburu dowɑ nge dɑ̃ɑ te bɑ mɔ̀ sɛduru Libɑniɔ.
12 A sɑ̃ɑwɑ nge dɑ̃ɑ gbɑɑru te bɑ kɑrɑ koosi, nɛn sesu, nɛn kurɔ.
A sɑ̃ɑwɑ nge dɔkɔ ye bɑ kɛnuɑ, ǹ kun mɛ nge bwiɑ ye bɑ mɑrɑ.
13 Wunɛn nim mu dɑ̃ɑ gbɑɑrun dɑ̃nu yɛ̃kɑmɔ.
Nin binu ni bɑ sokumɔ gerenɑdi nu do too.
Mɛyɑ lɑlle kɑ nɑɑdi yɑ mɑɑ kpiɑ mi,
14 kɑ sɑfɑrɑni, kɑ yɑkɑ si su nuburu do, kɑ kɑnɛli,
kɑ dɑ̃ɑ ni bɑ rɑ kɑ turɑre dɛkɑgiɑ ko, kɑ miru, kɑ ɑloɛsi,
kɑ sere yɑkɑ si su nuburu dobu bo kpuro.
15 Wunɛ ɑ sɑ̃ɑwɑ nge dɑ̃ɑ gbɑɑrun dɔkɔ
ǹ kun mɛ nge bwiɑ ye yɑ nim sumɔ
mɛ mu wee sɑɑ Libɑnin guunun di.
Kurɔ u nɛɛ,
16 sɔ̃ɔ yɛ̃si yɛ̃sikɑn wosu,
i seewo i nɛn dɑ̃ɑ gbɑɑrun dɑ̃nu kɔ̃,
kpɑ nin nubu duroru tu yɑri kpuro.
I de nɛn kĩnɑsi u du win dɑ̃ɑ gbɑɑru sɔɔ
kpɑ u yen dɑ̃ɑ bii geenu di.
Durɔ u wee