1 Akũ ma Sãnɛ Bↄ̀rↄ pìi è zɛna Zaiↄ̃ kpia. Gbɛ̃nↄn dúbu wàa suppla awɛɛsiikↄ̃ kú kãao. A tↄ́ kũ a De tↄ́o kɛ̃na ń mì'arɛnↄa. 2 Ma kĩni mà à bò ludambɛ lán ísↄ̃kɛna kĩni bà, lán legũpũtãna gbãna bà. Kĩni kũ ma màa pì de lán mↄrↄlɛrinↄ mↄrↄ'ũ bà. 3 Gbɛ̃nↄn dúbu wàa suppla awɛɛsiikↄ̃ pìnↄ tɛn lɛ̀ dufu sí gbà kũ pↄ́ bɛ̃nɛ mɛ̀n siikↄ̃nↄ kũ gbɛ̃ zↄ̃kↄ̃nↄ arɛ. Gbɛ̃ke dí fↄ̃ à lɛ̀ɛ pìi dàdaro, tó adi kɛ gbɛ̃ kũ ò ń bó andunia gũn pìnↄ baasiro. 4 Mↄ́kↄ̃nↄmɛ gbɛ̃ kũ odi gbãsĩ kɛ kũ nↄgbɛ̃nↄronↄ ũ, kũ ò kun lési. Òdigↄ̃ tɛ́ Sãnɛ Bↄ̀rↄↄi gu kũ àdi gɛ́n pínki. Ò ń bó gbɛ̃ káakunↄ ũ Ludanɛ kũ Sãnɛ Bↄ̀rↄↄ pìio. 5 Odi ma ziki kũ ò ɛ́kɛ tòro, akũsↄ̃ ò taari vĩro.
Yãkpatɛkɛgↄrↄ baarukpanaa
6 Akũ ma malaika pãnde è, àtɛn vura musumusu. À baaru nna kũ à kun gↄrↄ sĩnda pínki kũna, de à kpá gbɛ̃ kũ ò kú zĩtɛnↄnɛ, bùsu sĩnda pínki, buri sĩnda pínki, buriyã sĩnda pínki kũ gbɛ̃ sĩnda pínkio. 7 À kòtoo sɛ̀ gbãnagbãna à pì: À vĩna kɛ Ludanɛ, à bɛ̀ɛrɛ línɛ, zaakũ a yãkpatɛkɛna kũ gbɛ̃nↄo gↄrↄ kà. À donyĩ kɛ Luda kũ à musu kũ zĩtɛo kũ ísirao kũ ísɛ̃bokinↄ kɛ̀ɛnɛ.
8 Malaika plade tɛ́ a kpɛ à pì: Babilↄnu gbòro! Wɛra zↄ̃kↄ̃ↄ pìi gbòro! À tò buri sĩnda pínki a pãpãkɛna wɛ̃ gbãna kũ àdi su kũ Luda pↄfɛ̃oo mì.
9 Malaika aakↄ̃de tɛ́ ń kpɛ, à kòtoo sɛ̀ gbãnagbãna à pì: Tó gbɛ̃ donyĩ kɛ̀ nↄ̀bↄ pãsĩ pìinɛ kũ a takao, à a sèedaa sì a mì'arɛa kesↄ̃ a ↄa, 10 àkũ mɛ́ ani Luda pɛ̃tɛ̃ wɛ̃ kũ ò kà atɛ̃nɛ a pↄfɛ̃ tokon mi, ani wãwã ma tɛ́ kũ ifãntɛ̃gbↄ̃ↄo gũn Luda malaikanↄ kũ Sãnɛ Bↄ̀rↄↄo arɛ. 11 Ń wɛ́tãmma túsukpɛ nigↄ̃ bo gↄrↄ sĩnda pínki. Gbɛ̃ kũ ò donyĩ kɛ̀ nↄ̀bↄ pãsĩ pìinɛ kũ a takao, ò a tↄ́ sèedaa kɛ̀nↄn ĩampana vĩro fãnantɛ̃ kũ gwãanio. 12 Abire tɛn o Luda gbɛ̃nↄnɛ ògↄ̃ mɛna vĩ, gbɛ̃ kũ ò yã kũ à dìtɛnↄ kũna, òtɛn Yesu náani kɛnↄ.
13 Akũ ma kòtoo mà, à bò ludambɛ à pì: Ǹ adikĩna kɛ̃. Arubarikadenↄmɛ gbɛ̃ kũ oni ga kunna Dikiri gũn zaa teranↄ ũ. Luda Nini pì: Lɛmɛ! Oni kámma bo kũ ń zĩo, zaakũ ń yãmanakɛna gbɛ̀ tɛ́ńyĩ.
Zĩtɛ pↄ́nↄ kɛ̃kɛ̃naa
14 Akũ ma ludambɛ luku è, pↄ́ke vutɛnaa lán bisãsiri bà. À wura fùra kuna, à kòma lɛ́nna kũna. 15 Akũ malaika pãnde bò Luda kpɛ́n, à lɛ́ gbãna zù gbɛ̃ kũ à vutɛna ludambɛ lukuaai à pì: Ǹ kòma ká pↄ́i ǹ kɛ̃, zaakũ zĩtɛ pↄ́nↄ mà, à kà kɛ̃na. 16 Akũ gbɛ̃ kũ à vutɛna ludambɛ lukua a kòmaa màtɛ zĩtɛ, à zĩtɛ pↄ́nↄ kɛ̃̀kɛ̃.
17 Malaika pãnde bò musu Luda kpɛ́n, à kòma lɛ́nna kũna dↄ. 18 Akũ malaika pãnde kũ à tɛ́ iko vĩ bò sa'okia. À lɛ́ gbãna zù gbɛ̃ kũ à kòma lɛ́nna kũnaa pìii à pì: Ǹ n kòma lɛ́nna ká geepi yↄ̃ kũ ò kú zĩtɛnↄi ǹ zↄ̃zↄ̃, zaakũ ń nɛ́nↄ mà. 19 Akũ malaikaa pì a kòmaa màtɛ zĩtɛ, à geepi yↄ̃nↄ zↄ̃̀zↄ̃, à kà geepi'ifɛ̃ki zↄ̃kↄ̃ kũ à de Luda pↄfɛ̃kipabↄ ũ gũn. 20 Ò gɛ̀sɛɛ pɛ̀tɛpɛtɛ geepi yↄ̃ pìnↄa wɛ̃tɛ kpɛ, akũ aru bↄ̀tɛ geepi'ifɛ̃ki gũn, à dàgula ari kiloo wàa do kpɛ́ basↄↄro, à lei kà sↄ̃ sↄ̃mↄ lɛ́i.
