MAAKU 7

Futɛokarayã

(Mat 15:1-9)

1 Farisinↄ kũ ludayãdannɛri kũ ò bò Yurusalɛmu kenↄ sù Yesu kĩnaa, 2 akũ ò è a ìba kenↄ tɛn pↄ́ ble ↄpipinaa sari. 3 Zaakũ Farisinↄ kũ Yudanↄ ń pínki ń dizinↄ futɛokarayã kũnamɛ, òdi pↄ́ ble ↄpipina a zɛ́a sariro. 4 Tó ò bò ɛtɛn ò sù, òdi pↄ́ ble zú'onaa sariro. Ò futɛokarayã pãndenↄ kũna dasi. Lɛmɛ òdi tokonↄ kũ lonↄ kũ butanↄ pípi lɛ. 5 Akũ Farisinↄ kũ ludayãdannɛrii pìnↄ Yesu là ò pì: Bↄ́yãi n ìbanↄ dìgↄ̃ ó dizinↄ futɛokarayã kũnaroo? Òdi pↄ́ ble ↄpipinaa sari. 6 Yesu wèḿma à pì: Isaya annabikɛyã ò á manafikidenↄ yã musu swáswa lákũ à kɛ̃̀ Luda yãn nà à pì:

Buri bire dì bɛ̀ɛrɛ limɛnɛ kũ lɛ́omɛ,

ń swɛ̃̀ kúmaro.

7 Òdigↄ̃ donyĩ kɛmɛnɛ pãmɛ,

bisãsiri yãzɛkpatɛn òdi dańnɛ.

8 A pã kpà Luda yãdannɛnaai, akũ á bisãsiri futɛokarayã kũna. 9 Akũ à pìńnɛ dↄ: A pã Luda yãnɛ de à le àgↄ̃ á futɛokarayã kũna manan yá? 10 Musa pì, àgↄ̃ á de kũ á dao bɛ̀ɛrɛ dↄ̃. À pì dↄ, gbɛ̃ kũ à a de ke a da kpe bò, ò ade dɛ. 11 Ákↄ̃nↄ sↄ̃, adì pi tó gbɛ̃ pì a de ke a danɛ, pↄ́ kũ á vĩ à ń kpe tao bi Kↄↄbãmɛ, 12 à zɛ́ vĩ à a de kũ a dao kpe tao doro. Kↄↄbãmɛ pↄ́ kũ òdi kpá Ludaa ũ. 13 Lɛmɛ adì Luda yã kɛ pã lɛ á futɛokarayã kũ adì dańnɛ yãi. Yã bire takanↄn adì kɛ dasi.

Yã kũ àdi tó ògↄ̃ gbãsĩ

(Mat 15:10-20)

14 Akũ Yesu ɛ̀ra à pari sìsiai à pì: À sã kpá à ma yã ma á pínki. 15 Pↄ́ke kun kũ àdi gɛ̃ gbɛ̃ gũn kũ àdi a gbã̀ lɛ́ro. Pↄ́ kũ àdi bo gbɛ̃ gũn mɛ́ àdi tó àgↄ̃ gbãsĩ. 16 Gbɛ̃ kũ à sã vĩ, à yã pì ma. 17 Kũ à pari tò gwe à tà bɛ, akũ a ìbanↄ a là yã pìi mìii. 18 À pìńnɛ: Á laasun kpɛ́ yĩda se yá? Kũ pↄ́ke kun kũ àdi gɛ̃ gbɛ̃ gũn à tó àgↄ̃ gbãsĩro, á dↄ̃roo? 19 Pↄ́ pìi dì gɛ̃ a swɛ̃̀ɛ gũnlo, sé a gbɛrɛn, gbasa à bo mɛ̀n. Lɛn Yesu pↄ́ble sĩnda pínki kɛ̀ blena pↄ́ ũ lɛ tɛ̃̀ɛ sari. 20 Akũ à pì: Yã kũ àdi bo gbɛ̃ gũn mɛ́ àdi tó àgↄ̃ gbãsĩ. 21 Zaakũ zaa bisãsiri swɛ̃̀ɛ gũn laasun vãni dì bon: Pãpãkɛnaa, kpãni'onaa, gbɛ̃dɛnaa, zinakɛnaa, 22 wãkũu, nɛ̀sɛvãni, manafiki, wé'isariyã, sãnkara, gbɛ̃sↄ̃sↄ̃naa, karambaani kũ mìsariyão. 23 Yã vãni pìnↄ dì bo swɛ̃̀ɛ gũn pínki, àkũ mɛ́ àdi tó gbɛ̃ gↄ̃ gbãsĩ.

Nↄgbɛ̃ zĩ̀tↄ Yesu náanikɛnaa

(Mat 15:21-28)

24 Yesu bò gwe à gɛ̀ɛ Taya bùsun, akũ à kìpa bɛ kea. À ye ò a dↄ̃ro, ama adi le à a zĩda ùtɛro. 25 Nↄgbɛ̃ kũ a nɛ́nↄkpare tãna vĩ Yesu baaruu mà, akũ à sù à wùtɛ a arɛ gↄ̃̀nↄ. 26 Nↄgbɛ̃ pì sↄ̃ Giriki gbɛ̃mɛ ò a ì Siria Fenisia bùsun. À wɛ́ kɛ̀ Yesua de à tãna goarɛ a nɛ́a. 27 Akũ Yesu pìnɛ: Ǹ tó ò pↄ́ble kpá nɛ́nↄa gĩa, zaakũ à mana ò nɛ́nↄ pↄ́ble sɛ́ ò zu gbɛ̃danↄnɛro. 28 Akũ nↄgbɛ̃ pìi wèa à pì: Dikiri, bee gbɛ̃da kũ òdi wútɛńyĩnↄ dì nɛ́nↄ pↄ́ble bùru sɛ́sɛ. 29 Yesu pìnɛ: Kũ n yãwenama mana yãi, ǹ tá, n nɛ́ tãna gòa. 30 Kũ à kà bɛ, à a nɛ́ lè wútɛna pɛ̀ɛa, tãna pìi gòa.

Sãto werekↄ̃anaa

31 Akũ Yesu fùtɛ Taya bùsun à gɛ̀ɛ Sidↄ̃, akũ à bↄ̀tɛ kũ Wɛ̃tɛmɛnkuri bùsuuo ari à gɛ̀ɛ à kà Galili sɛ̀bɛɛi. 32 Akũ ò sùnɛ kũ sãto bebekariio, ò wɛ́ kɛ̀a de à ↄ naa. 33 Yesu bò pari gũn kũ sãto pìio à a ↄnɛterere pɛ̀pɛ a sãn. Kũ à lɛ́'i sù, akũ à ↄ nà sãto pì nɛ́nɛa. 34 À wɛ́ sɛ̀ musu à wesa kàkara à bò, akũ à pìnɛ: Ɛfata. Yã pìi pì ǹ wɛ̃. 35 Zaa gwe gↄ̃̀nↄ gↄ̃gbɛ̃ pì sã wɛ̃̀ a nɛ́nɛ fùtɛ, akũ à yã ò swáswa. 36 Yesu pìńnɛ òsun o gbɛ̃ke maro, ama lákũ àtɛn gíńnɛ nà, lɛmɛ òtɛni a kpàkpa kɛńnɛ lɛ. 37 Yã pìi bò ń sarɛ manamana à gɛ̃̀ onala, akũ ò pì: A yã sĩnda pínki kɛnaa dìgↄ̃ manamɛ. Àdi tó bee sãtonↄ yã ma, akũ àdi tó bebekarinↄ yã o.

<- MAAKU 6 MAAKU 8 ->