MAAKU 5

Tãnanↄ gbarɛna alɛdɛnↄa

(Mat 8:28-34, Luk 8:26-39)

1 Ò kà Gadara bùsun sɛ̀bɛɛ bara. 2 Kũ Yesu bò gó gũn gↄ̃̀nↄ, tãnade ke bò gɛ̀vĩkia à sù à dàalɛ. 3 Àdigↄ̃ kú gbɛ̀wɛɛ kũ à de mira ũnↄ gũn. Bee mↄ̀kakↄ̃anaa dì fↄ̃ à a yĩ̀ doro. 4 Zaakũ òdi a yĩ kũ mↄ̀kakↄ̃anaaomɛ òdi a da lín baala'i, ama àdi mↄ̀ↄ pìnↄ kɛ̃kɛ̃ àdi lí pìnↄ gborogboro. Gbɛ̃ke dì a gbãna fↄ̃ro. 5 Gwãani kũ fãnantɛ̃o pínki àdigↄ̃ kure gɛ̀vĩkin kũ sĩ̀sĩgɛrɛnↄo, àdigↄ̃ wiki lɛ́ àdigↄ̃ a zĩda líli kũ gbɛ̀ɛo.

6 Kũ à Yesu è zãa, akũ à bàa lɛ̀ à sù à kùtɛ a arɛ. 7-8 Kũ Yesu pì tãna pì goa, akũ à wiki gbãna lɛ̀ à pì: Yesu, Luda Musude Nɛ́, bↄ́n ó vĩ kↄ̃ ↄĩi? Ma nannɛ Ludai, ǹsun wɛ́ tãmaro. 9 Akũ Yesu a là à pì: N tↄ́n deraa? Akũ à wèa à pì: Ma tↄ́n Dasi, zaakũ ó dasi. 10 Akũ ò kútɛ kɛ̀ Yesunɛ manamana ò pì àsun pɛ́ḿma bùsuu pìi gũnlo.

11 Alɛdɛ kpàsa zↄ̃kↄ̃ kú gwe, òtɛn pↄ́ ble sĩ̀sĩgɛrɛɛi. 12 Akũ tãna pìnↄ wɛ́ kɛ̀ Yesua ò pì: Ǹ ó gbarɛ alɛdɛnↄ tɛ́ ò diḿma. 13 Yesu ń gbá zɛ́, akũ tãna pìnↄ gòa ò dì alɛdɛɛ pìnↄa. Akũ alɛdɛ kpàsa kũ à kà wàa kuri taka pìnↄ bò kũ bàao ò sòro sĩ̀sĩgɛrɛɛi ò sì sɛ̀bɛn, akũ ò gàga gwe. 14 Akũ alɛdɛdãrinↄ bàa lɛ̀ ò gɛ̀ɛ yã pì bàbańnɛ wɛ̃tɛ gũn kũ buranↄ. Akũ gbɛ̃nↄ bↄ̀tɛ ò gɛ̀ɛ yã kũ à kɛ̀ɛ pì gwa. 15 Kũ ò sù Yesu kĩnaa, ò gↄ̃gbɛ̃ kũ tãna kú a gũn dasi yã pìi è vutɛna gwe, à uta dana à bã̀nn pìi wèrea, akũ vĩna ń kũ. 16 Gbɛ̃ kũ ò yã pìi è kũ wɛ́onↄ yã kũ à tãnade pì lèe òńnɛ kũ alɛdɛnↄ yão. 17 Akũ ò kútɛ kɛ̀ Yesunɛ kũ à bońnɛ ń bùsun.

18 Kũ Yesu tɛn gɛ̃ gó'itɛn, gↄ̃gbɛ̃ kũ à tãnanↄ vĩ yã pì wɛ́ kɛ̀a de à le à tá kãao. 19 Yesu dí wero à pìnɛ: Ǹ tá n bɛa n gbɛ̃nↄ kĩnaa, ǹ yã kũ Dikiri kɛ̀nnɛ ońnɛ pínki, dera à n wɛ̃nda bò nà. 20 Akũ gↄ̃gbɛ̃ pìi tà, àtɛn yã kũ Yesu kɛ̀nɛ kpàkpa kɛ Wɛ̃tɛmɛnkuri bùsun, akũ yã pìi bò gbɛ̃ sĩnda pínki sarɛ.

Yairu nɛ́ vuna kũ nↄgbɛ̃ kũ à ↄ nà Yesu utaaao

(Mat 9:18-26, Luk 8:40-56)

21 Yesu ɛ̀ra à bikũ̀ sɛ̀bɛɛ bara kũ góo, akũ pari kàkarai sɛ̀bɛ lɛ́a. 22 Aduakɛkpɛ gbɛ̃ zↄ̃kↄ̃ kũ òdi pinɛ Yairu sù gwe. Kũ à Yesu è, à wùtɛ a kùaa a gbá sarɛ, 23 akũ à kútɛ kɛ̀nɛ manamana à pì: Ma nɛ́nↄgbɛ̃ kú ga lɛ́i. Ǹ mↄ́ ǹ ↄ naa de à gbãna kũ àgↄ̃ kú wɛ̃̀ndiio. 24 Akũ Yesu dà zɛ́n kãao. Pari tɛ́i òtɛn nakaraa.

25 Nↄgbɛ̃ ke kú gwe aru dì bↄtɛa à kà wɛ̃̀ kuri awɛɛpla. 26 Ɛzɛdenↄ a kɛ̀ takaside ũ manamana, à a ↄgↄ dɛ̀ pínki. Adi aafia lero, àdi kɛkɛ àgↄ̃ karamɛ. 27 Kũ à Yesu baaruu mà, akũ à nà Yesui pari gũn kpɛ kpa. Akũ à ↄ nà a utaa, 28 zaakũ à pì: Bee tó ma ↄ nà a utaa dé, mani werekↄ̃a. 29 Akũ a arubↄtɛnaa pìi zɛ̀ gↄ̃̀nↄ. À dↄ̃̀ a mɛ̀ɛ gũn a werekↄ̃a kũ a gyã pìio. 30 Zaa gwe gↄ̃̀nↄ Yesu dↄ̃̀ a mɛ̀ɛ gũn gbãna ke bò a gũn, akũ à lìtɛ pari gũn à pì: Dí mɛ́ à ↄ nà ma utaaa? 31 Akũ a ìbanↄ pìnɛ: N è lákũ gbɛ̃nↄ tɛn nakaramma nà, akũ n pì dí mɛ́ à ↄ nàmma yá? 32 Akũ Yesu gbɛ̃nↄ gwà à lìkai de à gbɛ̃ kũ à yã pìi kɛ̀ e. 33 Vĩna nↄgbɛ̃ pìi kũ̀ àtɛn lukaluka, zaakũ à dↄ̃ yã kũ à a lè a mɛ̀ɛ gũn, akũ à sù à wùtɛ a kùaa a gbá sarɛ à a yãpura ònɛ pínki. 34 Akũ Yesu pìnɛ: Nↄgbɛ̃, ma náani kũ n kɛ̀ mɛ́ à n werekↄ̃a. Ǹ tá bɛ aafia, n gyã pìi kɛ̃̀mman gwe.

35 Kũ Yesu kpɛ́ àtɛn yã o, ò bò aduakɛkpɛ gbɛ̃ zↄ̃kↄ̃ↄ pì bɛa ò sù ò ònɛ: N nɛ́ pìi kɛ̀ sari, ǹsun wari dↄ dannɛriia doro. 36 Yesu dí sã kpá ń yãiro, ben à pì gbɛ̃ zↄ̃kↄ̃ↄ pìinɛ: Ǹsun tó swɛ̃̀ kɛ̃nguro, ǹ ma náani kɛ dé. 37 Adi we gbɛ̃ke gɛ́ zɛarɛro, sé Pita kũ Yamisio kũ Yamisi dakũna Yuhanao. 38 Kũ ò kà gbɛ̃ zↄ̃kↄ̃ↄ pì bɛa, Yesu è òtɛn ↄ́ↄ dↄ òtɛn wiki gbãna lɛ́ òtɛn ń zĩda kɛ̃kɛ̃ manamana. 39 Kũ à gɛ̃̀ kpɛ́n, à ń lá à pì: Bↄ́yãi átɛni á zĩda kɛ̃kɛ̃ átɛn ↄ́ↄ dↄↄ? Nɛ́ pì dí garo, àtɛn i omɛ. 40 Kũ òtɛni a lalandi kɛ, akũ à pɛ̀ḿma ò bↄ̀tɛ bàai ń pínki. Sé nɛ́ pì de kũ a dao kũ a ìba kũ ò kú kãaonↄ, mↄ́kↄ̃nↄmɛ à ń sɛ́ à gɛ̃̀ kũńwo gu kũ nɛ́ pì kunwa. 41 Akũ à nɛ́ pì ↄ kũ̀ à pìnɛ: Talita kum! Yã pìi pì, nɛ́nↄkpare, ǹ futɛ. 42 Zaa gwe gↄ̃̀nↄ nɛ́ pìi fùtɛ à táa ò. Nɛ́ pì sↄ̃ à kà wɛ̃̀ kuri awɛɛpla. Yã pìi bò ń sarɛ manamana. 43 Akũ Yesu gìńnɛ sãnsãn òsun o gbɛ̃ke maro. Akũ à pì ò pↄ́ble kpáa à ble.

<- MAAKU 4 MAAKU 6 ->