MAAKU 4

Yãlɛkↄ̃ana kũ pↄ́wɛfãriio

(Mat 13:1-23, Luk 8:4-15)

1 Yesu ɛ̀ra àtɛn yã dańnɛ sɛ̀bɛɛ sarɛ. Ò kàkarai dasidasi, akũ à gɛ̃̀ à vùtɛ gó'itɛn íla, gbɛ̃nↄ gↄ̃̀ katɛna sĩ̀sĩ bara sɛ̀bɛ lɛ́a ń pínki. 2 À yã dàńnɛ kũ yãlɛkↄ̃ananↄ dasi. Lákũ àtɛn dańnɛ nà à pì: 3 À sã kpá! Búbari ke mɛ́ à kun à bò à gɛ̀ɛ pↄ́wɛ fã. 4 Lákũ àtɛn fã nà, akũ a kenↄ lɛ̀tɛ zɛ́ gũn, bãnↄ sù ò blè. 5 A kenↄ lɛ̀tɛ gbɛ̀ sàraa musu, gu kũ à bùsu vĩ dasiro, akũ ò bùtɛ gↄ̃̀nↄ, kũ bùsuu gègete gwero yãi. 6 Kũ ifãntɛ̃ fùtɛ, akũ ò tɛ́ kũ̀ ò gàga, kũ ò zĩni vĩro yãi. 7 A kenↄ lɛ̀tɛ lɛ̀nↄ gũn, akũ lɛ̀ɛ fùtɛ à nàkaraḿma odi nɛ́ iro. 8 A kenↄ sↄ̃ ò lɛ̀tɛ zĩtɛ mana gũn. Ò bùtɛ ò fùtɛ ò nɛ́ ì, a kenↄ karanaa kɛ̀ baraakurikuri, kenↄ baaakↄ̃kↄ̃, kenↄ basↄsↄↄro. 9 Akũ Yesu pì: Gbɛ̃ kũ à sã vĩ à yã pì ma.

10 Kũ Yesu gòńnɛ gwe à kú ado, akũ a gbɛ̃nↄn kuri awɛɛplanↄ kũ gbɛ̃ kũ ò kúinↄ sù ò yã pìnↄ mìi gbɛ̀kaa. 11 Akũ à pìńnɛ: Luda kpata kũ à bò a kĩnaa asiri kpàáwa àgↄ̃ dↄ̃, ama madì yã sĩnda pínki o gbɛ̃ kparanↄnɛ kũ yãlɛkↄ̃ananↄmɛ,

12 de ògↄ̃ gwagwa pↄ́ke'enaa sari,

ògↄ̃ sã kpákpa a dↄ̀rↄ dↄ̃naa sari,

de òsun arɛ dↄ Ludaa,

à ń durunnanↄ kɛ̃ḿmaro yãi.

13 Akũ Yesu ń lá à pì: Á yã pì dↄ̃roo? Deran áni yãlɛkↄ̃ana ke dↄ̃ↄ? 14 À ma! Búbari pìi Luda yãn àtɛn fã. 15 Gbɛ̃kenↄ de lán zɛ́ gũn pↄ́wɛ bà, gu kũ ò Luda yã fã̀n. Tó ò mà, akũ Setan dì su à Luda yã kũ ò fã̀ ń tɛ́ pì síḿma gↄ̃̀nↄ. 16 Gbɛ̃kenↄ de lán pↄ́wɛ kũ à lɛ̀tɛ gbɛ̀ sàraa musu bà. Tó ò Luda yã mà, òdi sí gↄ̃̀nↄ kũ pↄnnao. 17 Zaakũ ò zĩni vĩro, òdi kɛ gↄrↄ plaro. Tó yã̀'ũmmana ń lé ke tó ò wɛ́ tã̀ḿma yã pì yãi, òdi fumɛ gↄ̃̀nↄ. 18 Gbɛ̃kenↄ de lán pↄ́wɛ kũ à lɛ̀tɛ lɛ̀nↄ gũn bà. Ò Luda yã mà, 19 ama andunia yã damukɛna kũ yena aruzɛkɛiio kũ pↄ́ kparanↄ nidɛnao dì nakaraḿma, akũ yã pìi dì gↄ̃ àree sari. 20 Gbɛ̃kenↄ de lán pↄ́wɛ kũ ò lɛ̀tɛ zĩtɛ manaanↄ bà. Òdi Luda yã ma ò sí, akũ òdi kɛ karana pↄ́ ũ, ń kenↄ baraakurikuri, kenↄ baaakↄ̃kↄ̃, kenↄ basↄsↄↄro.

Yãlɛkↄ̃ana kũ fitilao

(Luk 8:16-18)

21 Yesu pìńnɛ: Òdi fitila na ò gbaka kútɛa ke ò ditɛ gádo gbáru yá? fitiladibↄↄ musun òdi dinloo? 22 Asiri ke kun kũ oni gí boaairo. Pↄ́ke kun utɛna kũ ani bo gupuraaro. 23 Gbɛ̃ kũ à sã vĩ à yã pì ma.

24 À pìńnɛ dↄ: À laakari kɛ yã kũ átɛn maa. Zaka kũ adì yↄ̃̀ońnɛn Luda ni yↄ̃oárɛ ani ɛra à karaárɛ dↄ. 25 Gbɛ̃ kũ à pↄ́ vĩ Luda ni karanɛ. Gbɛ̃ kũ à pↄ́ke vĩro sↄ̃, bee a fítinna kũ à vĩ Luda ni sía.

Yãlɛkↄ̃ana kũ pↄ́wɛbutɛnaao

26 À pì dↄ: Kpata kũ à bò Luda kĩnaa de lán pↄ́wɛ kũ gbɛ̃ fã̀ bura bà. 27 Gwãani kũ fãnantɛ̃o bee tó àtɛn i o ke à bɛ̃nɛ, pↄ́wɛ pìi dì butɛ à zↄ̃kↄ̃ kũ, gbɛ̃ pìi dìgↄ̃ dↄ̃ lákũ àdi kɛ nàro. 28 Zĩtɛ mɛ́ àdi pↄ́blewɛ i a zĩda. Àdi kà pá gĩa gbasa à nↄ̀ sí, a gbɛran àdi pia. 29 Tó à mà, akũ òdi kɛ̃ kũ kòmao, zaakũ a kɛ̃gↄrↄ mɛ́ à kà.

Yãlɛkↄ̃ana kũ musadi wɛ́o

(Mat 13:31-32, 34, Luk 13:18-19)

30 À pì dↄ: Bↄ́n kpata kũ à bò Luda kĩnaa bòkↄ̃aoo? Bↄ́n óni le ò lɛkↄ̃aoo? 31 À de lán musadi wɛ́ bà, kũ a wɛ́ kete de pↄ́wɛ kũ òdi tↄ̃nↄla pínki, 32 ama tó ò tↄ̃̀, àdi butɛ à zↄ̃kↄ̃ kũ de dò pↄ́nↄla pínki. Àdi ↄnɛ gègetenↄ kɛ ari bãnↄ dì su ò didi a lá uran.

33 Yesu Luda yã òńnɛ dasi kũ yãlɛkↄ̃ana bire takanↄ ń mana lɛ́n. 34 Adi yãke ońnɛ yãlɛkↄ̃anaa sariro. Tó à kú kũ a ìbanↄ ńtɛ̃nɛ, akũ àdi yã sĩnda pínki bↄkↄtɛńnɛ.

Yesu zàga'ĩa zɛnaa

(Mat 8:23-27, Luk 8:22-25)

35 Kũ ↄkↄsi tɛn kɛ, à pì a ìbanↄnɛ: Ò bikũ bara. 36 Lákũ Yesu kú gó gũn nà, akũ ò gɛ̃̀ kãao lɛɛlɛ ò dà zɛ́n lɛ ò pari tò gwe. Gó pãndenↄ gɛ̀ɛ kũńwo. 37 Akũ zàga'ĩa gbãna fùtɛ. Í tɛn gó yĩpayĩpa àtɛn ká a gũn ari à ye à pa. 38 Yesu kú gó kpɛ kpa, àtɛn i o a mì di mìbↄkↄↄa. Akũ a ìbanↄ a vù ò pìnɛ: Dannɛri! Kũ ótɛn kákatɛ, ńdi bídi kɛroo? 39 Akũ à fùtɛ à pàta ĩaa à pì ínɛ: Ǹ yĩtɛ! Ǹ zɛ tɛɛnɛ! Akũ ĩa kpàtɛ, gu yĩ̀ kítikiti. 40 Akũ à ń lá à pì: À kɛ̀ dera á sika vĩ lɛɛ? Ase á ma náani vĩro ari tera yá? 41 Akũ ò gↄ̃̀ bídi gũn òtɛn kↄ̃ lala ò pì: Dín gbɛ̃ dí ũ sɛ́ɛ? Bee ĩa kũ ío dì a yã mamɛ.

<- MAAKU 3 MAAKU 5 ->