MAAKU 3

1 Yesu ɛ̀ra à gɛ̀ɛ aduakɛkpɛn. Gↄ̃gbɛ̃ ke kú gwe a ↄ do íbana. 2 Gbɛ̃kenↄ tɛn Yesu tàasi ká, tó ani a werekↄ̃a kámmabogↄrↄ zĩ, de ò yã le ò dia. 3 Akũ Yesu pì gbɛ̃ kũ a ↄ íbanaa pìinɛ: Ǹ futɛ ǹ zɛ zàa gũn. 4 Akũ à ń lá à pì: Kámmabogↄrↄ zĩ à zɛ́ vĩ ò a mana kɛn yá, ke a vãni? Ò gbɛ̃ mì sín yá, ke ò dɛmɛ? Akũ odi yãke oro. 5 Yesu ń gwá pↄfɛ̃o à lìkai, zaakũ a pↄ yàka ń sãgbãna yãi. Akũ à pì gↄ̃gbɛ̃ pìinɛ: Ǹ n ↄ pìi poro. Kũ à pòro, akũ a ↄ pìi kɛ̀ a gbɛ̀n. 6 Akũ Farisinↄ bↄ̀tɛ ò gɛ̀ɛ ò yã gↄ̃gↄ̃ kũ kína Hɛrↄdu gbɛ̃nↄ gↄ̃̀nↄ, deran oni kɛ nà ò Yesu dɛ.

Dasi kↄ̃kakarana sɛ̀bɛ lɛ́a

7 Yesu kũ a ìbanↄ ń zĩda gàńnɛ gwe ò gɛ̀ɛ sɛ̀bɛ lɛ́a. Akũ pari bò Galili ò tɛ̀i. 8 Gbɛ̃kenↄ bò Yudea dↄ kũ Yurusalɛmuo kũ Ɛdↄmu bùsuuo kũ Yoda barao kũ Tayao kũ Sidↄ̃o ò sù a kĩnaa dasidasi, kũ ò yã kũ àtɛn kɛnↄ baaruu mà yãi. 9 Pari yãi Yesu ò a ìbanↄnɛ ò gó'itɛ soru kɛarɛ, de òsun nakaraawaro yãi. 10 Zaakũ Yesu gbɛ̃nↄ wèrekↄ̃a dasi yãi, akũ gyãrenↄ tɛn nakaraa dasi de ò le ò ↄ naa. 11 Tãnadenↄ sↄ̃, tó ò a wɛ́ è, òdi su ò wútɛ a arɛmɛ, òdi wiki lɛ́ ò pi: Mↄkↄ̃mmɛ Luda Nɛ́ ũ. 12 Akũ Yesu dì gíńnɛ ò o gbɛ̃ kũ á de a ũ.

Yesu zĩ̀ri gbɛ̃nↄn kuri awɛɛplanↄ ditɛnaa

(Mat 10:1-4, Luk 6:12-16)

13 Kũ Yesu dìdi kpia, à gbɛ̃ kũ à yeinↄ sìsiai, akũ ò sù a kĩnaa. 14 Akũ à gbɛ̃nↄn kuri awɛɛplanↄ dìtɛ ògↄ̃ kú kãao, de àgↄ̃ ń zĩ waazi kɛ, 15 ògↄ̃ iko vĩ ò tãnanↄ goḿma. À tↄ́ kpàńnɛ zĩ̀rinↄ. 16 Ń tↄ́n dí: Simↄ kũ à tↄ́ kpànɛ Pita. 17 Zebedi nɛ́ Yamisi kũ a dakũna Yuhanao. À tↄ́ kpàńnɛ Bↄanɛgɛ. Tↄ́ bire pì surapatammarinↄ. 18 Abire gbɛra Anduru, Filipi, Batↄlↄmiu, Matiu, Tomasi, Alafeu nɛ́ Yamisi, Tadeu, Simↄ Kokaride 19 kũ Yudasi Isikariↄti kũ à bò a kpɛo.

Tãnagona gbɛ̃nↄa

(Mat 12:22-32, Luk 11:14-23)

20 Kũ Yesu tà bɛ, akũ gbɛ̃nↄ ɛ̀ra ò kàkara dↄ dasi, akũ Yesu kũ a ìbanↄ dí zɛ́ le ò pↄ́ blè sero. 21 Kũ a bedenↄ yã pìi mà, ò dà zɛ́n ò a gbɛsɛ, zaakũ òtɛn pi ĩa kàamɛ.

22 Ludayãdannɛri kũ ò bò Yurusalɛmu ò sùnↄ pì: À Bɛlɛzɛbubu vĩ, tãnanↄ kína pì gbãnan àdi tãna gooḿma. 23 Akũ Yesu ń sísiai à yãlɛkↄ̃ana òńnɛ à pì: Setan ni fↄ̃ à a zĩda goḿma yá? 24 Tó kpata gbɛ̃nↄ ibɛrɛɛ sɛ̀ kũ kↄ̃o, kpata pì ni gì kɛ yá? 25 Tó bɛ kɛ̃̀kↄ̃a lɛu pla, akũ ibɛrɛ kú ń dagura, bɛ pì ni gì kɛ yá? 26 Tó Setan ibɛrɛɛ sɛ̀ kũ a zĩda gbɛ̃nↄ ò kɛ̃̀kↄ̃a, ani gì kɛro, ani mì dɛmɛ. 27 Gbɛ̃ke ni fↄ̃ à gɛ̃ gↄ̃sa gbãna kpɛ́n à a pↄ́nↄ sɛ́tɛro, séto à a yĩ̀ gĩa, gbasa à a kpɛ́ wara.

28 Yãpuran matɛn oárɛ, Luda ni gbɛ̃nↄ durunnanↄ kɛ̃ḿma kũ a tↄ́ vãni kũ òdi sísinↄ pínki, 29 ama tó gbɛ̃ Luda Nini tↄ́ vãni sìsi, ani kɛ̃aro, zaakũ ade durunna kũ àdi sí kɛ̃ḿmaro kɛ̀mɛ. 30 Yesu ò lɛ kũ ò pì à tãna vĩ yãimɛ.

Yesu danɛnↄ

(Mat 12:46-50, Luk 8:19-21)

31 Kũ a da kũ a dakũnanↄ kà, ò zɛ̀ bàai, akũ ò gbɛ̃ zĩ̀ ò a sísi. 32 Gbɛ̃nↄn vutɛna ò likai dasi, akũ ò pìnɛ: Ǹ gwa! N da kũ n dakũnanↄ zɛ bàai òtɛni n gbɛka. 33 Akũ à wèḿma à pì: Dín ma da kũ ma dakũnanↄ ũu? 34 Akũ à gbɛ̃ kũ ò vutɛnaainↄ gwà à pì: Ma da kũ ma dakũnanↄn dí. 35 Gbɛ̃ kũ àdi Luda pↄyenyĩna kɛmɛ ma dakũna kũ ma dãreo kũ ma dao ũ.

<- MAAKU 2 MAAKU 4 ->