MATIU 11

Yahaya Da'itɛkɛri zĩ̀rinↄ

(Luk 7:18-35)

1 Kũ Yesu yã birenↄ dà a ìba gbɛ̃nↄn kuri awɛɛplanↄnɛ à làka, à bò gwe, à gɛ̀ɛ waazi kɛ ń wɛ̃tɛnↄ gũn, àtɛn yã dańnɛ.

2 Zaa kpɛ́siran Yahaya Kirisi yãkɛnanↄ mà, akũ à a ìba kenↄ zĩ̀ 3 ò a la, àkũ mɛ́ à gbɛ̃ kũ ani su ũ yá, ke ògↄ̃ wɛ́ dↄ gbɛ̃ pãndeimɛ? 4 Akũ Yesu wèḿma à pì: À gɛ́ yã kũ átɛn ma átɛn e gbã Yahayanɛ à pi, 5 vĩ̀nanↄ tɛn gu e, ɛrɛnↄ tɛn táa o, kusunↄ tɛn werekↄ̃a, sãtonↄ tɛn yã ma, gɛ̀nↄ tɛn vu, takasidenↄ tɛn baaru nna waazi ma. 6 Arubarikademɛ gbɛ̃ kũ àdi fu ma yãaro ũ.

7 Kũ Yaaya zĩ̀rinↄ tà, Yesu Yahaya yã ò parinɛ à pì: Bↄ́n a gɛ gwa gbárannan? Kàpa kũ ĩa tɛn yĩgãn yá? 8 Bↄ́n a gɛ gwa sàa? Gbɛ̃ kũ à pↄ́kasa zãnɛ danan yá? Pↄ́kasamanadarinↄ dìgↄ̃ kú kínabɛamɛ. 9 Bↄ́n a gɛ gwa sàa? Annabiin yá? Lɛmɛ! Matɛn oárɛ, à de annabila se. 10 Zaakũ Yahayan ò a yã kɛ̃̀ Luda yãn ò pì: Mani ma zĩ̀ri gbarɛ n ã de à zɛ́ kɛkɛnnɛ.

11 Yãpuran matɛn oárɛ, nↄgbɛ̃ nɛ́'inaa gũn gbɛ̃ke dí bo à kà Yahaya Da'itɛkɛri ũro. Bee kũ abireo gbɛ̃ kũ à de gbɛ̃ kpɛde ũ kpata kũ à bò Luda kĩnaa gũn deala. 12 Zaa gↄrↄ kũ Yahaya Da'itɛkɛrii nà waazikɛnaaa ari suna gbã̀a, òtɛn kↄ̃dɛ kɛ ò gɛ̃ kpataa pìn, akũ kùgbãnadenↄ tɛn gɛ̃n. 13 Musa kũ annabinↄ pínki gĩnakɛ ò a yã ò ari à gɛ̀ɛ pɛ́ Yahayaa. 14 Tó áni fↄ̃ à sí, Yahaya pì mɛ́ à Iliasu kũ ò pì ani su ũ. 15 Gbɛ̃ kũ à sã vĩ à yã pì ma.

16 Bↄ́n mani gbãragbɛ̃nↄ lɛkↄ̃aoo? Ò de lán nɛ́ kũ ò kú ɛtɛ gũnnↄ bà òtɛn lɛ́ zukↄ̃i 17 òtɛn pi:

O kutɛɛ pɛ̀árɛ, ádi ũ wãro,

o wɛ̃nda lɛ̀ɛ sìárɛ, ádi ↄ́ↄ dↄro.

18 Zaakũ Yahaya sù, adi burodi sóro, adi wɛ̃ miro, akũ ò pì tãnademɛ. 19 Kũ Bisãsiri Nɛ́ sù, àdi pↄ́ ble, àdi í mi, akũ ò pì: Guturu wɛ̃miriimɛ, bɛ'ↄgↄsirinↄ kũ kifirinↄ gbɛ̃nnamɛ! Ama òdi ↄ̃ndↄ̃ dↄ̃ a yãkɛnaaamɛ.

Yesu zukakana wɛ̃tɛ kenↄ denↄi

(Luk 10:13-15)

20 Akũ Yesu fùtɛ à zuka kà wɛ̃tɛ kũ à a daboyã paride kɛ̀nnↄ gbɛ̃nↄi, kũ odi ń nɛ̀sɛ litɛro yãi à pì: 21 Waiyoo Kↄrazĩdenↄ! Waiyoo Bɛtɛsaidadenↄ! Tó ma daboyã kũ ma kɛ̀ á tɛ́nↄ kɛ̀ Taya kũ Sidↄ̃o yã, de wɛ̃tɛpidenↄ pↄ́kasanↄ dàdańla, ò vùtɛ tuburaa à gìi kɛ̀ nɛ̀sɛlitɛna sèeda ũ. 22 Matɛn oárɛ, yãkpatɛkɛgↄrↄ zĩ á wɛ́tãmmana nigↄ̃ de Tayadenↄ kũ Sidↄ̃denↄ pↄ́la. 23 Ákↄ̃nↄ Kapɛnamudenↄ sↄ̃ áni gbã à zↄ̃ Ludaan yá? Oni ↄ zↄ̃ái ari gyãwãnn. Zaakũ tó ò daboyã kũ ma kɛ̀árɛnↄ kɛ̀ Sↄdↄmu yã, de à kun ari kũ a gbãrao. 24 Matɛn oárɛ, yãkpatɛkɛgↄrↄ zĩ á wɛ́tãmmana nigↄ̃ de Sↄdↄmudenↄ pↄ́la.

Kámmabona Yesu kĩnaa

(Luk 10:21-22)

25 Zĩ kũ̀a Yesu pì: Baa, musu kũ zĩtɛo Dikiri, ma n sáabu kɛ̀, kũ n yã birenↄ ùtɛ yãdↄ̃rinↄnɛ kũ ↄ̃ndↄ̃rinↄ, akũ n boo kyódↄ̃risarinↄnɛ. 26 Lɛmɛ, Baa, zaakũ n pↄyenyĩnaamɛ. 27 Ma De pↄ́ sĩnda pínki nàmɛnɛ ma ↄĩ. Gbɛ̃ke Luda Nɛ́ dↄ̃ro, tó adi kɛ De Luda baasiro. Gbɛ̃ke De Luda dↄ̃ro, tó adi kɛ a Nɛ́ kũ gbɛ̃ kũ Nɛ́ pì ye à a mↄńnɛnↄ baasiro.

28 À mↄ́ ma kĩnaa ákↄ̃nↄ kũ á aso sɛna a kpasanↄ pínki, mani á gba zɛ́ à kámma bo. 29 À ma gbãngo sɛ́ à yã dada ma kĩnaa, á laakari ni kpátɛ, zaakũ má busɛ akũsↄ̃ ma nɛ̀sɛ yĩda. 30 Ma gbãngo sɛna zĩ'ũro, ma aso tìkisiro.

<- MATIU 10 MATIU 12 ->