MALAKI 2

1 Makũ Dikiri Zĩ̀karide ma pì: Ákↄ̃nↄ sa'orinↄ á yãn dí sà. 2 Tó ádi ma yã maro, tó ádi da á swɛ̃̀n à ma tↄ́ kpáro, mani láari boáwa de àsun gↄ̃ arubarika vĩro. Ma bòáwa se kↄ̀, zaakũ ádi da á swɛ̃̀n a ma tↄ́ kpàro. 3 À ma! Mani kpãkɛ̃ á burinↄi á yãi, mani dikpɛ sa'opↄnↄ gbↄ̃̀ lↄ́lↄ á ãnnwa, oni á sɛ́tɛ ò á kↄ́tɛ. 4 Ánigↄ̃ dↄ̃ sà kũ ma yã dí dìtɛárɛ de ma bàka kunna kũ Levi burinↄ kpɛ́ kun. Makũ Dikiri Zĩ̀karide makũ mɛ́ ma ò. 5 Ma bàka kunna kũńwo pìi gũn ma wɛ̃̀ndi kũ aafiaao kpàḿma de ògↄ̃ ma vĩna vĩ, akũ ò ma vĩna vĩ, ń nini kòko ma tↄ́ yãi. 6 Yãdannɛna yãpura da ń lɛ́n, odi ɛ́kɛyã ma ń lɛ́nlo. Ò táa ò kũmao kũ lɛ́dokↄ̃nↄo kũ nɛ̀sɛpurao ò gbɛ̃nↄ bò yã vãni gũn dasi. 7 À mana sa'ori gↄ̃ dↄ̃na vĩ de gbɛ̃nↄ le ò yãdannɛna ma a lɛ́i, zaakũ àkũmɛ makũ Dikiri Zĩ̀karide zĩ̀ri ũ. 8 Ákↄ̃nↄ sↄ̃ a zã zɛ́a, á yãdannɛnanↄ tò gbɛ̃nↄ fù dasi, a ma bàka kunna kũ Levi burinↄ gbòro. Makũ Dikiri Zĩ̀karide makũ mɛ́ ma ò. 9 Akũ ma tò ò á gya bò ma á kĩa gbɛ̃ sĩnda pínki kĩnaa, kũ ádi tɛ́ ma ágbairo akũsↄ̃ adì gbɛ̃nↄ tɛ̃̀ bo doka musu.

Yìgidɛna yã

10 À de ó pínki De mɛ̀n domɛɛ? À de Luda dokↄ̃nↄ mɛ́ à ó kɛɛ? Bↄ́ mɛ́ à tò odì yãfutɛ kɛkↄ̃nɛɛ? O Luda bàka kunna kũ ó dizinↄ yã gbòro. 11 Yudanↄ yãfutɛ kɛ̀ ò yã vãni kɛ̀ Isarailanↄ bùsun kũ Yurusalɛmuo, zaakũ ò tãnagbagbarinↄ sɛ̀ nↄ ũ ò Dikiri kpɛ́ kũ à yeii gbã̀a lɛ̀o. 12 Gbɛ̃ kũ à yã dí taka kɛ̀, Dikiri a kɛ̃ Yakubu burinↄa, bee tó dímɛ, bee tó à sù kũ gbanↄ Dikiri Zĩ̀karidenɛ.

13 Yã plade kũ adì kɛn dí. Adìgↄ̃ ↄ́ↄ dↄ àgↄ̃ wiki pɛ́, á wɛ́'i dìgↄ̃ kú Dikiri gbagbakia, kũ adi wɛ́ sɛ́ à gba kũ a suonɛ gwa gbasa à sìro yãi. 14 Adì pi: Bↄ́ mɛ́ à sù kũ yã dioo? Kũ Dikiri mɛ́ à sèedade ũ á dagura kũ n kɛfɛnnakɛgↄrↄ nↄkpammao yãimɛ. Zaakũ n nↄkpamma pìn n gbɛ̃ndo kũ a kↄ̃ yã mà ũ, akũ n yã fùtɛnɛ. 15 À de Dikiri á kɛ mɛ̀ dokↄ̃nↄ ũ de á mɛ̀ kũ á lɛ́o gↄ̃ dokↄ̃nↄ yãimɛɛ? Bↄ́n Luda tɛn pɛ́a á mɛ̀dokↄ̃nↄkɛ pìi musuu? De á nɛ́nↄ le ò a yã ma yãimɛ. Abire yãi àgↄ̃ á zĩda kũna dↄ̃ de àsun yã futɛ á nↄkpammanɛro. 16 Makũ Dikiri Isarailanↄ Luda ma pì, ma zã yìgidɛnan kũ nↄ kpebonaao. Makũ Dikiri Zĩ̀karide makũ mɛ́ ma ò. Àgↄ̃ á zĩda kũna dↄ̃, àsun yã futɛnɛro.

17 A tò Dikiri kpàsa kũ á yã'onaao. Adì pi: Ó yã kpate mɛ́ à a kpàsaa? Kũ adì pi vãnikɛrinↄ mana Dikirinɛ, akũ ń yã dì káagu yãi. Adì pi dↄ Luda kũ àdi yãkpatɛ kɛ kũ gbɛ̃nↄo a zɛ́a pì kú mámɛɛ?

<- MALAKI 1 MALAKI 3 ->