LUKU 14

Yesu kunna Farisi ke bɛa

1 Kámmabogↄrↄ ke zĩ Yesu gɛ̀ɛ pↄ́ ble Farisinↄ gbɛ̃ zↄ̃kↄ̃ ke bɛa, akũ gbɛ̃ kũ ò kú gwenↄ tɛni a kpákpa. 2 Kákagyãkɛri ke kú Yesu arɛ gwe. 3 Akũ Yesu dokadↄ̃rinↄ kũ Farisinↄ là à pì: Òdi gbɛ̃ werekↄ̃a kámmabogↄrↄ zĩ yá ke òdi werekↄ̃aro? 4 Akũ ò gↄ̃̀ yĩtɛna kítikiti. Akũ Yesu gyãre pìi kũ̀, à a wèrekↄ̃a à a gbàrɛ. 5 Akũ à ń lá à pì: Tó á gbɛ̃ke nɛ́ ke zù vĩ à zù lↄ̀gↄn kámmabogↄrↄ zĩ, ani a bo gↄ̃̀nↄroo? 6 Odi fↄ̃ ò wèaro.

7 Yesu è deran gbɛ̃ kũ ò ń sísinↄ tɛn vutɛki mana kũ nà, akũ à yã lɛ̀kↄ̃ańnɛ à pì: 8 Tó ò n sisi nↄsɛ pↄ́blea, ǹsun vutɛ vutɛki mana gũnlo. Tó ò gbɛ̃ kũ à zↄ̃kↄ̃ denla sìsi bi! 9 Tó á sìsirii sù à pìnnɛ: Ǹ futɛ ǹ vutɛki kpá gbɛ̃ pìia, ĩni futɛ ǹ gɛ́ vutɛ kpɛ kpa kũ wé'iomɛ. 10 Tó ò n sisi, ǹgↄ̃ vutɛ kpɛ kpa, de tó n sìsirii sù, ani pinnɛ: Ma gbɛ̃nna, ǹ futɛ ǹ su arɛ la. Abirekũ ni n kɛ bɛ̀ɛrɛde ũ gbɛ̃ kũ á kú lɛɛlɛnↄ arɛ. 11 Gbɛ̃ kũ àdi a zĩda karan Luda ni a busa. Gbɛ̃ kũ àdi a zĩda busa sↄ̃, Luda ni a kara.

12 Akũ Yesu pì a sìsirii pìinɛ: Tó ntɛn gbɛ̃nↄ sísi pↄ́ble fãnantɛ̃ blenaaa ke ↄkↄsi pↄ́, ǹsun n gbɛ̃nnanↄ sísiro ke n vĩ̀ninↄ kũ n dakũnanↄ ke n danɛnↄ ke n ↄgↄde dakenↄ. Tó n kɛ̀ lɛ, oni ɛra ò n sísimɛ se ò fĩna bonnɛ. 13 Tó ntɛn gbɛ̃nↄ sísi pↄ́blea, ǹ takasidenↄ sísi kũ kↄ̃̀nↄdenↄ kũ ɛrɛnↄ kũ vĩ̀nanↄ, 14 arubarikadenↄmɛ á ũ, zaakũ ò pↄ́ke vĩ ò fĩna boonnɛro. Luda mɛ́ ani fĩna bonnɛ gbɛ̃ mananↄ vugↄrↄa.

Yãlɛkↄ̃ana kũ pↄ́ble dasio

(Mat 22:1-14)

15 Kũ gbɛ̃ kũ ò kú lɛɛlɛnↄ doke yã pìi mà, akũ à pì Yesunɛ: Arubarikaden gbɛ̃ kũ ani pↄ́ ble kũ kpata kũ à bò Luda kĩnaa gbɛ̃nↄo ũ. 16 Yesu pìnɛ: Gbɛ̃ke mɛ́ à ye à pↄ́ble kɛ, akũ à gbɛ̃nↄ sìsi dasidasi. 17 Pↄ́blegↄrↄ zĩ à a zĩkɛrii zĩ̀ à o gbɛ̃ kũ à ń sísinↄnɛ ò su, ò pↄ́ sĩnda pínki soru kɛ̀ ò làka sà. 18 Akũ ń baadi tɛn wɛtɛ ò ń kɛ̃. Gbɛ̃ káaku pìnɛ: Ma bú lù, mani gɛ́ gwa. N yã nna, ǹ ma kɛ̃. 19 Gbɛ̃ pãnde pì: Ma zù búbabↄnↄ lù mɛ̀n kuri, mani gɛ́ ń gwa. N yã nna, ǹ ma kɛ̃. 20 Gbɛ̃ pãnde pì: Ma nↄ sɛ̀ dufumɛ. A yã mɛ́ à tò mani le mà suro. 21 Akũ zĩkɛrii pìi ɛ̀ra à tà, à ń lɛ́gbɛɛ ò a dikiriinɛ. Akũ bede pì pↄ fɛ̃̀, à pì a zĩkɛriinɛ: Ǹ gɛ́ wɛ̃tɛ gũn likalika gãnulɛanↄ kũ zɛ́danↄ, ǹ takasidenↄ kũ kↄ̃̀nↄdenↄ kũ vĩ̀nanↄ kũ ɛrɛnↄ kakara ǹ su kũńwo la. 22 Abire gbɛra zĩkɛrii pìi sù à pìnɛ: Dikiri, ma yã kũ n òo kɛ̀, ama vutɛki kpɛ́ kun. 23 Akũ dikirii pìi pì zĩkɛrii pìinɛ: Ǹ gɛ́ zɛ́nↄ gũn kũ zɛ́ térerenↄ pínki, ǹ gã na gbɛ̃nↄa ò gɛ̃, de ma ↄn pa. 24 Matɛn oárɛ, gbɛ̃ kũ ma ń sísi pìnↄ ke ni lɛ́ zↄ̃ ma pↄ́ble pìiaro.

Gↄ̃na Yesu ìba ũ

(Mat 10:37-38)

25 Ò tɛ́ zɛ́n kũ Yesuo dasidasi, akũ à lìtɛ à pìńnɛ: 26 Tó gbɛ̃ sù ma kĩnaa, akũ à ye a dei demala ke a da ke a nanↄ ke a nɛ́nↄ ke a vĩ̀ninↄ ke a dakũnanↄ ke a zĩda, ani fↄ̃ à kɛ ma ìba ũro. 27 Gbɛ̃ kũ adi a lígbãndurukpana sɛ́ àgↄ̃ tɛ́omairo, ade ni fↄ̃ à kɛ ma ìba ũro. 28 Tó á gbɛ̃ke ye à kpɛ́didikↄ̃ana bo, ani vutɛ gĩa à a ↄgↄ dↄdↄ à gwa, tó ani fↄ̃ à zĩ pì kɛroo? 29 Tó adi kɛ lɛro, akũ à ɛ̃ pɛ̀tɛ, tó adi fↄ̃ à a làkaro, gbɛ̃ kũ à è pínki ni a lalandi kɛ 30 ò pi: Gbɛ̃ díkĩna nà kpɛ́bonaaa à fùa à a mì dɛ. 31 Ke tó kína ke ye à gɛ́ zĩ̀ ká kũ kína pãndeo, ani vutɛ gĩa à a laasun lɛ́ à gwa, tó a soza gã̀ kurinↄ ni fↄ̃ ò kù kpá soza gã̀ baro kũ òtɛn sunↄaroo? 32 Tó à è áni fↄ̃ro, ani zĩ̀rinↄ zĩ, de ò lɛ́dokↄ̃nↄkɛna yã gbɛkaa zaade adi ká kãniro. 33 Lɛmɛ dↄ, tó á gbɛ̃ke dí ↄ gbarɛ pↄ́ kũ à vĩnↄi pínkiro, ani fↄ̃ à kɛ ma ìba ũro.

34 Wisi bi pↄ́ nnamɛ, ama tó a í nna tà, deran oni kɛ nà à gↄ̃ nna dↄↄ? 35 À mana zĩtɛ ke zùgbↄ̃katɛkinɛro, òdi kↄ́tɛmɛ. Gbɛ̃ kũ à sã vĩ à yã pì ma.

<- LUKU 13 LUKU 15 ->