LUKU 11

Aduakɛnaa

(Mat 6:9-15, 7:7-11)

1 Zĩkea Yesu tɛn adua kɛ gukea. Kũ à làka, a ìba ke pìnɛ: Dikiri, ǹ aduakɛnaa dadawɛrɛ, lákũ Yahaya dà a ìbanↄnɛ nà. 2 Akũ à pìńnɛ: Tó átɛn adua kɛ, àgↄ̃ pi:

Baa, ǹ tó ògↄ̃ dↄ̃ kũ n tↄ́ adona.

Ǹ tó kpata kũ à bò n kĩnaa bo gupuraa.

3 Ǹ ó gba pↄ́ kũ ónigↄ̃ ble lákũ gu dìgↄ̃ dↄ nà.

4 Ǹ ó durunnanↄ kɛ̃wá,

zaakũ odì kɛ̃ gbɛ̃ kũ ò durunna kɛ̀wɛrɛnↄnɛ ń pínki.

Ǹsun tó ò fu yↄ̃ogwanaaaro.

5 Akũ à pìńnɛ: Ò pì á gbɛ̃ke mɛ́ à gbɛ̃nna vĩ, akũ à gɛ̀ɛ a kĩnaa lizãndo à pìnɛ: Ma su n kĩnaamɛ, ǹ burodi sãkãmɛnɛ mɛ̀n aakↄ̃. 6 Nibↄↄ kìpama tera dí, má pↄ́ke vĩ mà kpáaro. 7 Akũ a gbɛ̃nna pìi wèa zaa kpɛ́ gũn à pì: Ǹsun wari dↄmaro, ma gbàa tà kↄ̀. Ma gɛ̃ kpɛ́n kũ ma nɛ́nↄ, mani fↄ̃ mà futɛ mà pↄ́ke kpámmaro. 8 Matɛn oárɛ, bee tó adi futɛ à kpàa gbɛ̃nnakɛ yãiro, ani futɛ à pↄ́ kũ à yei kpáa, kũ à zɛ̀i dãndãn yãi. 9 Makũ sↄ̃ matɛn oárɛ, à wɛ́ kɛ, Luda ni kpááwa. À wɛtɛ, áni le. À gbà lɛ́, Luda ni wɛ̃árɛ. 10 Zaakũ gbɛ̃ kũ à wɛ́ kɛ̀ɛn òdi kpáa, gbɛ̃ kũ à wɛ̀tɛ sↄ̃ àdi le, gbɛ̃ kũ à gbàa lɛ̀ɛn oni wɛ̃nɛ. 11 Ákↄ̃nↄ kũ á nɛ́nↄ vĩ, tó á nɛ́ kpↄ̀ wɛ́ kɛ̀áwa, á dí mɛ́ ani mlɛ̃̀ sɛ́ à kpáaa? 12 Ke tó à nɛ́ konɛgbĩni wɛ́ kɛ̀áwa, á dí mɛ́ ani fí sɛ́ à kpáaa? 13 Bee kũ á vãnikɛo á pↄ mana kpana á nɛ́nↄa dↄ̃. Oni á De kũ à kú musu Nini kpana gbɛ̃ kũ ò wɛ́ kɛ̀anↄa pↄ́ o dↄ yá?

Tãnagona gbɛ̃nↄa

(Mat 12:22-30, 43-45, Maa 3:20-27)

14 Yesu tɛn tãna sãto kpáturuku go gbɛ̃a. Kũ tãna pìi gòa, sãto pìi nà yã'onaaa, akũ yã pìi bò pari sarɛ. 15 Akũ ń gbɛ̃kenↄ pì: Àdi tãna goḿma kũ tãnanↄ kína Bɛlɛzɛbubu gbãnaomɛ. 16 Akũ gbɛ̃ pãndenↄ a yↄ̃̀ ò gwà, ò a gbɛ̀ka à sèeda ke kɛńnɛ kũ Luda gbãnao. 17 Kũ Yesu ń laasun dↄ̃̀, akũ à pìńnɛ: Kpata kũ a gbɛ̃nↄ ibɛrɛɛ sɛ̀ kũ kↄ̃o ni kakatɛ. Ɔn kũ a gbɛ̃nↄ ibɛrɛɛ sɛ̀ kũ kↄ̃o ni gↄ̃ bɛzĩ ũmɛ. 18 Tó Setan ibɛrɛɛ sɛ̀ kũ a gbɛ̃nↄo, deran a kpata ni gì kɛɛ? Ma ò lɛ kũ átɛn pi madì tãna goḿma kũ Bɛlɛzɛbubu gbãnao yãimɛ. 19 Tó Bɛlɛzɛbubu gbãnan madì tãna gooḿma, á gbɛ̃nↄ dì goḿma kũ dí gbãnaomɛɛ? Lɛmɛ á zĩda gbɛ̃nↄ á ɛ́kɛ bò lɛ. 20 Tó ma tãnagoḿmana bi Luda ↄgbɛɛmɛ, àgↄ̃ dↄ̃ kũ kína kũ Luda kàa sù à á lén gwe. 21 Tó gↄ̃sa gbãna zĩ̀kabↄnↄ kũna àtɛni a ↄn dãkpão, a aruzɛkɛnↄ dìgↄ̃ aafiaamɛ. 22 Ama tó gbɛ̃ kũ a gbãna deala sù à gɛ̃̀i à gbãna mↄ̀nɛ, ani a gↄ̃kɛbↄ kũ à a náani vĩnↄ sɛ́tɛ, ani a aruzɛkɛ kpaatɛtɛńnɛ. 23 Gbɛ̃ kũ à kú kũmaoro bò ma kpɛ. Gbɛ̃ kũ àdi pↄ́ kakara kũmaoro dì fãkↄ̃amɛ.

24 Tó ò tãna gò gbɛ̃a, àdigↄ̃ likara zↄ̃ gukorin àgↄ̃ vutɛki wɛtɛ. Tó adi lero, akũ àdi pi: Mani ɛra mà tá ma bɛ zĩamɛ. 25 Tó à kà gwe, àdi le à warana swáswa zɛ́azɛa, 26 akũ àdi gɛ́ tãna kũ ń pãsĩ dealanↄ sɛ́tɛ mɛ̀n suppla à su kũńwo, òdi gɛ̃ ò vutɛn. Lɛmɛ ade gwena kpɛkpɛ vãni dìgↄ̃ de a káakupↄla.

Arubarika yã

27 Kũ Yesu tɛn o lɛ, nↄgbɛ̃ ke pũ̀tã zàa gũn à pì: Nↄgbɛ̃ kũ à n i à yↄ̃ kpàmma arubarika vĩ. 28 Akũ Yesu pì: Oi! Arubarikadenↄn gbɛ̃ kũ ò Luda yã mà ò kũnanↄ ũ.

Sèeda gbɛkana Yesua

(Mat 12:38-42)

29 Kũ pari tɛn kara, akũ Yesu pì: Gbãragbɛ̃nↄn zara. Òdi sèeda gbɛkama, ama mani sèeda ke kɛńnɛro, sé Inusa pↄ́. 30 Lákũ Inusa de sèeda ũ Ninɛvadenↄnɛ nà, lɛn Bisãsiri Nɛ́ nigↄ̃ de sèeda ũ gbãragbɛ̃nↄnɛ lɛ. 31 Yãkpatɛkɛgↄrↄ zĩ gɛ̀nↄmidↄki kpa saraunia ni vu à yã dí gbãragbɛ̃nↄa, zaakũ à bò zaa andunia lɛ́a, à sù Sulemanu ↄ̃ndↄ̃yã ma, akũ gbɛ̃ kũ à de Sulemanula kú la sà. 32 Yãkpatɛkɛgↄrↄ zĩ Ninɛvadenↄ ni futɛ ò yã da gbãragbɛ̃nↄla, zaakũ kũ Ninɛvadenↄ Inusa waazi mà ò nɛ̀sɛɛ lìtɛ, akũ gbɛ̃ kũ à zↄ̃kↄ̃ de Inusala kú la sà.

Wɛ́mɛ mɛ̀ fitila ũ

(Mat 5:15, 6:22-23)

33 Òdi fitila na ò ditɛ gukpado ke ò gbaka kútɛaro. Òdi di a dibↄↄ musumɛ, de gbɛ̃ kũ òtɛn gɛ̃nↄ gupura e yãi. 34 N wɛ́mɛ n mɛ̀ fitila ũ. Tó n wɛ́ aafia, n mɛ̀ pínki nigↄ̃ gupura ũ. Tó n wɛ́ gbãnaro sↄ̃, n mɛ̀ pínki nigↄ̃ gusira ũ. 35 Abire yã mɛ́ à tò, ǹ laakari kɛ, de gupura kũ ntɛn da ń vĩ súngↄ̃ de gusira ũro. 36 Tó n mɛ̀ pínki gupura vĩ, a ke kú gusira gũnlo, anigↄ̃ gu pura kũ swáswa lándↄ̃ fitila'i dↄmma bà.

Yesu ludayãdannɛrinↄ kũ Farisinↄ bobona ń dàn

(Mat 23:1-36, Maa 12:38-40, Luk 20:45-47)

37 Kũ Dikiri yã ò à làka, akũ Farisi ke a sìsi à mↄ́ à pↄ́ ble kãao, akũ à gɛ̃̀ à vùtɛ. 38 Kũ Farisi pìi è adi ↄ da ín gbasa ò pↄ́ blero, à bò a sarɛ. 39 Akũ Dikiri pìnɛ: Ákↄ̃nↄ Farisinↄ adì gbãsĩ bo tokonↄ kpɛ kũ tanↄ, ama wãkũ kũ yãvãnikɛnaao mɛ́ à á nɛ̀sɛɛ pà. 40 Yↄ̃nkↄnↄ! Luda kũ à pↄ́ kpɛ kɛ̀ mɛ́ à a gũn kɛ̀ seroo? 41 À pↄ́ kũ à kú á tanↄ gũn dã wɛ̃ndadenↄnɛ, á ta pìnↄ ni gↄ̃árɛ gbãsĩ sari.

42 Waiyoo ákↄ̃nↄ Farisinↄ! Adì tofenↄ tↄkↄtɛdo kũ kpè'akão kũ dò pↄ́nↄ pínki kuride kpá Ludaa, akũ adì pã kpá yãzɛdei kũ yena Ludaiio. Yã birenↄ mɛ́ à de àgↄ̃ kũna pãkpana a kparanↄi sari. 43 Waiyoo ákↄ̃nↄ Farisinↄ! Adìgↄ̃ ye à vutɛ aduakɛkpɛ vutɛki mananↄn, adìgↄ̃ ye ògↄ̃ fↄ kpákpaáwa ɛtɛnↄn. 44 Waiyoo ákↄ̃nↄ! Á de lán mira kũ òdigↄ̃ táa oa a yãdↄ̃naa sari bàmɛ.

45 Akũ dokadↄ̃ri ke pìnɛ: Dannɛri, tó n ò lɛ, ntɛni ó sↄ̃sↄ̃mɛ se. 46 Yesu pì: Waiyoo ákↄ̃nↄ dokadↄ̃rinↄ sↄ̃! Adì gbɛ̃nↄ da asosɛna zĩ'ũn, akũ adì ↄ daḿma kũ a sɛnaaoro, bee ↄnɛɛ. Waiyoo ákↄ̃nↄ! 47 Adì pↄ́ bo annabi kũ á dizinↄ ń dɛdɛnↄ miranↄa ń yã dↄngu yãi. 48 Lɛmɛ a sì kũ a zɛ kũ á dizinↄ yãkɛnanↄomɛ. Ò annabinↄ dɛ̀dɛ, akũ adì pↄ́ bo ń miranↄa. 49 Abire yãi Luda wɛ́zɛ̃ gũn à pì, áni annabinↄ kũ zĩ̀rinↄ zĩáwa. Áni ń gbɛ̃kenↄ dɛdɛ, áni wɛ́ tã ń gbɛ̃kenↄa. 50 Lɛmɛ annabi kũ ò ń dɛdɛ zaa andunia naanagↄrↄ ari gbãranↄ yã ni wí teradenↄ musu lɛ, 51 sɛna zaa Habila dɛna ari à gɛ̀ɛ pɛ́ Zakari kũ ò a dɛ̀ sa'oki kũ Luda kpɛ́o daguraa. Ee, matɛn oárɛ, yã birenↄ pínki ni wí teradenↄ musumɛ. 52 Waiyoo ákↄ̃nↄ dokadↄ̃rinↄ! A dↄ̃naa gbà mↄ̀nɛ wòto. Ádi gɛ̃ a gũnlo, akũ a kpa gbɛ̃ kũ ò ye ò gɛ̃ a gũnnↄnɛ. 53 Kũ Yesu bò gwe, ludayãdannɛrinↄ kũ Farisinↄ nàkaraa gbãngbãn, òtɛn yã lalaa dasi, 54 òtɛni a kpákpa, de ò a kũ yã kũ àtɛn o gũn.

<- LUKU 10 LUKU 12 ->