Sɑ̃ɑrun Woodɑ 21

Yɑ̃ku kowobun woodɑbɑ

1. Woodɑ ye yɑ kɑ

yɑ̃ku kowon tii yɑ̃

1 Yinni Gusunɔ u Mɔwisi sɔ̃ɔwɑ u nɛɛ, ɑ Aroni kɑ win bibu sɔ̃ɔwɔ ɑ nɛɛ, yɑ̃ku kowo u ku rɑɑ tii disi doke u wigii goon goru bɑbɑ 2 mɑ n kun mɔ win mɛro kɑ win tundon goru kɑ win tiin biigiru kɑ win wɔnɔ kɑ win mɔɔgiru 3 kɑ sere win sesu wi u kun durɔ yɛ̃giru wi bɑ ǹ ginɑ sue. 4 Isirelibɑn suunu sɔɔ, yɑ̃ku kowo wi, u sɑ̃ɑwɑ ben guro guro. Yen sɔ̃, u ǹ koo tii disi doke kɑ ben goon goru.

5 Goo ù n gu, yɑ̃ku kowobu bu ku rɑɑ ben wii suunun seri kɔni, bu ku rɑɑ mɑɑ ben toburun beri berikɑ kɔni. 6 Mɛyɑ bu ku rɑɑ mɑɑ tii muriri wɑsi sɔɔ. Bɑ ko n wɑ̃ɑwɑ nɛ Gusunɔ ben Yinnin sɔ̃. Bɑ ǹ nɛn yĩsiru sɑnkumɔ. Domi beyɑ bɑ ko n dɑ mɑn yɑ̃kunu kue ni nu sɑ̃ɑ nɛn dĩɑnu. Yen sɔ̃, bɑ ko n dɛɛrewɑ.

7 Bɑ ǹ koo kurɔ tɑnɔ ǹ kun mɛ wi bɑ gɑbɑ bɑ kɑ kpunɑ suɑ kurɔ. Bɑ ǹ mɑɑ kurɔ wi u win durɔ yinɑ suɑmɔ. Domi bɑ ko n dɛɛrewɑ bɑ n wɑ̃ɑ nɛ, Yinni Gusunɔn sɔ̃. 8 Isireli bɑɑwurewɑ u koo yɑ̃ku kowo gɑrisi tɔn dɛɛro. Domi wiyɑ u rɑ kɑ bɛɛn yɑ̃kunu nɛ, nɛ, Yinni Gusunɔn mi. Yen sɔ̃, bɑ ko n dɛɛrewɑ, domi nɛ, Yinni Gusunɔ nɑ dɛɛre. Nɛnɑ nɑ bɛɛ gɔsɑ i n kɑ mɑɑ dɛɛre.

9 Yɑ̃ku kowo goon bii wɔndiɑ ù n tii sekuru dokemɔ u kurɔ tɑnɑru dimɔ, win tundowɑ u sekuru dokemɔ. Bɑ koo bii wɔndiɑ wi dɔ̃ɔ mɛniwɑ.

10 Yɑ̃ku kowo wi bɑ gum tɑ̃re wirɔ u kuɑ yɑ̃ku kowo tɔnwero, mɑ bɑ nùn sɑ̃ɑ yɑ̃nu dokeɑ, u ku mɑɑ win seri sɑnku goon gɔɔn sɔ̃. Mɛyɑ u ku mɑɑ win yɑ̃nu gɛ̃ɛku. 11 U ku rɑɑ goru gɑru susi u tii disi doke, bɑɑ ǹ n win tundo ǹ kun mɛ win mɛron gorun nɑ. 12 U ǹ mɑɑ yɑriɔ nɛn kurun di goon gorun sɔ̃, u ku kɑ kuu te disi doken sɔ̃. Domi bɑ nùn gum tɑ̃re u n kɑ sɑ̃ɑ nɛnɛm. Nɛ, Yinni Gusunɔwɑ nɑ ye geruɑ.

13 Wɔndiɑ wi u kun durɔ yɛ̃wɑ yɑ̃ku kowo tɔnwero u koo suɑ kurɔ. 14 U ǹ koo gɔmini goo suɑ kurɔ ǹ kun mɛ kurɔ wi bɑ yinɑ ǹ kun mɛ kurɔ wi bɑ gɑbɑ bɑ kɑ kpunɑ ǹ kun mɛ kurɔ tɑnɔ. Adɑmɑ wɔndiɑ wi u kun durɔ yɛ̃wɑ u koo suɑ win dusibu sɔɔ. 15 Kpɑ u ku rɑɑ bwese tukuru doke win bweseru sɔɔ. Nɛ Yinni Gusunɔwɑ nɑ nùn gɔsɑ u n kɑ dɛɛre.

2. Wi u kun kpɛ̃

u ko yɑ̃ku kowo

16 Yinni Gusunɔ u mɑɑ Mɔwisi sɔ̃ɔwɑ u nɛɛ, 17 ɑ Aroni kɑ win bibu sɔ̃ɔwɔ ɑ nɛɛ, bɑɑ kɑ win bibun bweserɔ goo ù n ɑlebu gɑɑ mɔ win wɑsi sɔɔ, yɛ̃ro kun kpɛ̃ u dɑ nɛn kuu te sɔɔ u nɛ, Yinni Gusunɔ dĩɑnu gɑnu yɑ̃kuru kuɑ. 18 Alebugii goo kun kpɛ̃ u nɛn sɔmbu te ko, ɑɑ wɔ̃kowɑ? Aɑ kɔ̃ri bɑrɔwɑ? Ǹ kun mɛ yɛ̃ron wuswɑɑ yɑ kɔsikirewɑ? 19 Ǹ kun mɛ yɛ̃ron nɑɑsu ǹ kun mɛ win gɑ̃serɑ bɔɔrewɑ? 20 Ǹ kun mɛ yɛ̃ro u kundu kpiɑwɑ? Ǹ kun mɛ u sɑ̃ɑwɑ tɔn kɔmiɑkubu? Ǹ kun mɛ yɛ̃ron nɔni kpiɑwɑ? Ǹ kun mɛ yɛ̃ro tɑɑtɑɑru ǹ kun mɛ debu mɔwɑ? Ǹ kun mɛ win tĩɑ bii kɔsikirɑ? 21 Wi u ɑlebu gɑɑ mɔ wɑsi sɔɔ gesi Aronin bweseru sɔɔ, u ǹ kpɛ̃ u nɛ, Yinni Gusunɔ yɑ̃kuru kuɑ. U ǹ mɑɑ kpɛ̃ u kɑ dĩɑnu gɑnu nɑ u kɑ yɑ̃kuru ko nɛn kuu te sɔɔ. 22 Adɑmɑ u koo kpĩ u nɛ, Yinni Gusunɔn dĩɑ dɛɛrɑnu di. 23 Win ɑlebun sɔ̃nɑ u ǹ kpɛ̃ u susi yɑ̃ku yerɔ kɑ kuu ten beku kɑre ten mi. Kpɑ u ku rɑɑ nɛn kuu te disi doke. Nɛ, Yinni Gusunɔwɑ nɑ rɑ yɑ̃ku kowobu gɔsi bɑ n kɑ dɛɛre.

24 Mɑ Mɔwisi u Aroni kɑ win bibu kɑ Isirelibɑ kpuro gɑri yi sɔ̃ɔwɑ.

<- Sɑ̃ɑrun Woodɑ 20 Sɑ̃ɑrun Woodɑ 22 ->