YƆSUA 2

Gu'asirigwarinↄ zĩna Yɛriko

1 Zaa Sitimu Nuni nɛ́ Yↄsua gu'asirigwarinↄ zĩ̀ gbɛ̃nↄn pla asiri gũn à pì: À gɛ́ à wɛ́ kpátɛ bùsuu pìii, atɛ̃nsa Yɛriko. Akũ ò gɛ̀ɛ gwe, ò gɛ̀ɛ ò kìpa karua kũ òdi pinɛ Rahabu bɛn. 2 Akũ ò pì Yɛriko kínanɛ: Isaraila kenↄ gɛ̃̀ la ↄkↄsiala de ò ó bùsu asiri gwa. 3 Akũ kína pì gbɛ̃nↄ zĩ̀ Rahabua ò pì: Ǹ bo kũ gↄ̃gbɛ̃ kũ ò sù n kĩnaanↄ, zaakũ ó bùsu pínki asiri gwana yãin ò sù. 4 Àkũ sↄ̃ nↄgbɛ̃ pì gĩnakɛ à gbɛ̃nↄn pla pìnↄ ùtɛ kↄ̀, akũ à pì: Gbɛ̃ pìnↄ sù ma kĩnaa la yãpuramɛ. Má dↄ̃ gu kũ ò bònlo. 5 Kũ gu sì bĩnizɛtatagↄrↄa, ò bↄ̀tɛ. Má dↄ̃ tó gu kũ ò tànlo. À ń gbɛsɛ likalika, áni ń le. 6 Àkũ sↄ̃ à gĩnakɛ à ń sɛ́ à gɛ̀ɛ kũńwo kpɛ́ musu à ń útɛ bàwisi lí kũ à katɛna gwen kↄ̀. 7 Zĩ̀rinↄ pɛ̀tɛńyĩ zɛ́n ari Yoda bikũkia, akũ ò bĩnizɛ tàta ń kpɛ gↄ̃̀nↄ.

8 Ari gu'asirigwarii pìnↄ gↄ̃ wútɛ, Rahabu dìdi ń kĩnaa kpɛ́ musu 9 à pìńnɛ: Má dↄ̃ kũ Dikiri bùsu díkĩna kpàáwa. Á vĩna ó kũ, akũ bùsu dí denↄ kã gà ń pínki á yãi. 10 O mà lákũ Dikiri Isira Tɛ̃ra zↄ̃̀kↄ̃rɛárɛ nà gↄrↄ kũ a bↄtɛ Misila kũ yã kũ a kɛ̀ Siↄ̃ kũ Oguonɛ, a Amↄrinↄ kína gbɛ̃nↄn pla pìnↄ kɛ̀ dúgudugu Yoda bara dire. 11 Kũ o mà, swɛ̃̀ɛ kɛ̃̀ógu, ó nini kòko á yãi, zaakũ Dikiri á Ludamɛ musu kũ zĩtɛo Luda ũ. 12 Zaakũ ma gbɛ̃kɛ kɛ̀árɛ, ákↄ̃nↄ sↄ̃ à la damɛnɛ sà kũ Dikiri tↄ́o kũ áni gbɛ̃kɛ kɛ ma de bedenↄnɛ. À sèeda kɛmɛnɛ de màgↄ̃ dↄ̃ sãnsãn 13 kũ áni ma de kũ ma dao kũ ma vĩ̀ninↄ kũ ma dakũnanↄ kũ ó gbɛ̃nↄ mì sí ń pínki à ó bo ga lɛ́i. 14 Akũ gↄ̃gbɛ̃ pìnↄ wèa ò pì: Mↄkↄ̃mmɛ ó wɛ̃̀ndi ũ, ókↄ̃nↄmɛ n wɛ̃̀ndi ũ se. Tó ńdi ó yã o gbɛ̃ke màro, tó Dikiri bùsu díkĩna kpàwá, óni gbɛ̃kɛ kɛnnɛ yãpura.

15 Akũ à ń bↄ́tɛ wondoo gũn à ń kípa bĩni kpɛ kũ bàao, zaakũ a bɛ kũ à kun kú wɛ̃tɛ bĩni musumɛ. 16 À pìńnɛ: À mì pɛ́ kpinↄa de á gbɛ̀sɛrinↄ sún dakarɛ kãáoro yãi. Àgↄ̃ utɛna gwe gↄrↄ aakↄ̃ ari á gbɛ̀sɛrinↄ su, gbasa à da zɛ́n. 17-18 Akũ gↄ̃gbɛ̃ pìnↄ pìnɛ: Tó o ɛra o gɛ̃ á bùsun, ǹ wↄ̃nↄ tɛ̃ra díkĩna dↄ wondo kũ ntɛni ó bↄtɛn dia, ǹ n de kũ n dao kũ n vĩ̀ninↄ kũ n dakũnanↄ kũ n de bedenↄ kakaranyĩ ń pínki n kpɛ́ díkĩnan. Tó ńdi kɛ lɛro, ó bàka nigↄ̃ kú ladana kũ n tò o la dànnɛn doro. 19 Tó ń gbɛ̃ke bò n kpɛ́n à gɛ̀ɛ gãnulɛa, à a zĩda dɛ̀n gwe, ó yãn doro. Tó ń gbɛ̃ke kú kũnwo kpɛ́n, akũ ò a dɛ̀, ókↄ̃nↄn a gana yã ni wí ó musu. 20 Tó n ó kↄrↄmↄtↄↄ kɛ̀ gbɛ̃nↄnɛ sↄ̃, ó bàka nigↄ̃ kú ladana kũ n tò o la dànnɛ pìn doro. 21 Akũ Rahabu pì: Àgↄ̃ de lákũ a ò nà. Akũ à ń gbárɛ ò tà. Akũ à wↄ̃nↄ tɛ̃ra pìi dↄ̀ a wondooa.

22 Kũ ò kìpa bĩnia lɛ, ò mìi pɛ̀ kpinↄa, akũ ò ì gwe gↄrↄ aakↄ̃ ari ń gbɛ̀sɛrinↄ gɛ̀ɛ sùo. Ń gbɛ̀sɛrii pìnↄ ń wɛ́tɛ zɛ́ sarɛ pínki odi ń lero. 23 Akũ gbɛ̃nↄn pla pìnↄ dà zɛ́n ò kìpa kpi pìnↄa ò bikũ̀ swaa. Kũ ò kà Nuni nɛ́ Yↄsua kĩnaa, ò yã kũ à ń lé gbã̀nɛ pínki 24 ò pì: Dikiri bùsuu pìi nàwɛrɛ ó ↄĩ pínki. Bùsupidenↄ kã gà ń pínki ó yãi.

<- YƆSUA 1 YƆSUA 3 ->