1 Kũ Azo kína Yabĩ a baaruu mà, à gbɛ̃nↄ zĩ̀ Madↄ̃ kína Yobabua kũ Simirↄnu kínao kũ Akasafa kínao 2 kũ kína kũ ò kú gugbãnduru kpanↄ ń pínki, kína kũ ò kú gukpidenↄ kũ sɛ̃̀ntɛpↄrↄtu kũ à kú Galili gɛ̀nↄmidↄki kpao kũ gusarao kũ Dↄru gusĩsĩde kũ à kú ifãlɛtɛ kpao. 3 Akũ à ɛ̀ra à gbɛ̃nↄ zĩ̀ dↄ Kanaa kũ ò kú ifãboki kpanↄa kũ ifãlɛtɛ kpanↄ ń pínki, Amↄrinↄ kũ Itinↄ kũ Pɛrizinↄ kũ Yebusi kũ ò kú gukpidennↄ kũ Ivi kũ ò kú Mizipa bùsun Ɛmↄ gbɛ̀ sarɛnↄo. 4 Ò bↄ̀tɛ kũ ń zĩ̀karinↄ ń pínki dasidasi lán ísiralɛ bùsu'atɛ̃ bà. Ń sↄ̃nↄ kũ ń sↄ̃gonↄn dasi. 5 Akũ kína pìnↄ kↄ̃ kàkara ò sù ò bùraa kàtɛ lɛɛlɛ Mɛromu ínↄ sarɛ, de ò zĩ̀ ká kũ Isarailanↄ.

6 Akũ Dikiri pì Yↄsuanɛ: Ǹsun vĩna kɛńnɛro. Zia mandara'i mani ń na Isarailanↄnɛ ń ↄĩ ò ń dɛdɛ. Ǹ ń sↄ̃nↄ gbátĩnↄ zↄ̃zↄ̃ ǹ ń sↄ̃gonↄ kpata. 7 Akũ Yↄsua kũ a zĩ̀karinↄ gɛ̀ɛńyĩ kũ zĩ̀io kãnto ń pínki ò dàńla Mɛromu ínↄ sarɛ gwe. 8 Dikiri ń náńnɛ ń ↄĩ, akũ ò ń dɛdɛ ò pɛ̀ ń gbɛ̃kenↄa ari Sidↄ̃ wɛ́ran kũ Misirefomaimuo kũ Mizipa guvutɛ kũ à kú ifãboki kpao. Ò ń dɛdɛ, ń gbɛ̃ke dí boro. 9 Yↄsua kɛ̀ńnɛ lákũ Dikiri ònɛ nà, à ń sↄ̃nↄ gbátĩnↄ zↄ̃̀zↄ̃ à ń sↄ̃gonↄ kpàta.

10 Zĩ pìia Yↄsua lìtɛ à gɛ̀ɛ à Azo sì, akũ à a kína dɛ̀ kũ fɛ̃nɛdao. Azo pìmɛ kína pìnↄ wɛ̃tɛ mìde ũ gↄrↄ birea. 11 Isarailanↄ gbɛ̃ kũ ò kunnↄ dɛ̀dɛ kũ fɛ̃nɛdao ò ń kákatɛ, ń gbɛ̃ke dí gↄ̃ro, akũ ò tɛ́ sↄ̃̀a. 12 Yↄsua wɛ̃tɛ pìnↄ sì pínki kũ ń kínanↄ, à ń dɛdɛ kũ fɛ̃nɛdao à ń kákatɛ lákũ Dikiri zↄ̀bleri Musa ò nà. 13 Ama Isarailanↄ dí tɛ́ sↄ̃ wɛ̃tɛ kũ ò ɛ̀ra ò kàtɛ ń bɛzĩ gbɛ̀nnↄaro, séde Azo kũ Yↄsua tɛ́ sↄ̃̀aa pìi baasiro. 14 Isarailanↄ wɛ̃tɛ pìnↄ pↄ́nↄ nàkↄ̃a ń pↄ́ ũ kũ ń pↄ́kãdenↄ ò tào. Ò ń gbɛ̃nↄ dɛ̀dɛ kũ fɛ̃nɛdao ń pínki ari ò ń kákatɛ, odi gbɛ̃ke tó bɛ̃nɛro. 15 Yã kũ Dikiri ò a zↄ̀bleri Musanɛ, Musa yã pìi ò Yↄsuanɛ, akũ Yↄsua kɛ̀ lɛ pínki, adi yã kũ Dikiri ò Musanɛ ke tó kpɛro.

16 Lɛn Yↄsua bùsuu pìi sì lɛ pínki, a gukpide kũ Nɛgɛvio pínki kũ Gosɛ̃ bùsuuo pínki kũ gusarao kũ sɛ̃̀ntɛpↄrↄtuo pínki. À Isaraila gukpide kũ gusaraoo sì 17 sɛna zaa Alaki gbɛ̀ kũ à kú Sei bùsun ari à gɛ̀ɛ pɛ́ Baali Gada kũ à kú Lɛbana bùsu guvutɛn Ɛmↄ gbɛ̀ɛ sarɛ. À ń kínanↄ kũ̀kũ ń pínki à ń dɛdɛ. 18 À zĩ̀kanaa gìi kɛ̀ kũ kína pìnↄ ń pínki. 19 Ivi kũ ò kú Gibiↄ̃nↄ baasiro wɛ̃tɛ ke dí kↄ̃ yã mà kũ Isarailanↄro, ò ń blé kũ zĩ̀io pínki. 20 Dikiri mɛ́ à tò ń sã gbã̀gbã, akũ ò zĩ̀i kà kũ Isarailanↄ, de Isarailanↄ le ò ń kakatɛ ń wɛ̃ndagwanaa sari, à láka kũńwo mámmam lákũ à ò Musanɛ nà.

21 Gↄrↄ pìian Yↄsua gɛ̀ɛ à Anakinↄ dɛ̀dɛ gukpiden kũ Ɛblↄnuo kũ Dɛbio kũ Anabuo. À ń kákatɛ à ń wɛ̃tɛnↄ kɛ̀ dúgudugu Yuda gukpiden kũ Isaraila gukpideo pínki. 22 Anaki buri ke dí gↄ̃ Isarailanↄ bùsun doro, séde Gaza kũ Gatao kũ Asadↄdio. 23 Yↄsua bùsuu pìi sì pínki lákũ Dikiri ò Musanɛ nà, akũ à kpà Isarailanↄa à kpàatɛtɛńnɛ danɛdanɛ túbi ũ. Akũ bùsuu pìi gↄ̃̀ katɛna aafia zĩ̀i sari.

<- YƆSUA 10YƆSUA 12 ->