1 Yerɑ Yonɑsin mɔru seewɑ gɑ̃ɑ ni Gusunɔ u Ninifugibu kuɑn sɔ̃. 2 Mɑ u Yinni Gusunɔ sɔ̃ɔwɑ u nɛɛ, Yinni Gusunɔ, yenibɑn bɛrumɑ nɑ mɔ̀ sɑnɑm mɛ nɑ wɑ̃ɑ nɛn temɔ. Yen sɔ̃nɑ nɑ dukɑ yɑkurɑ fuuku nɑ dɔɔ Tɑɑsisiɔ. Nɑ yɛ̃ mɑ ɑ sɑ̃ɑwɑ wɔnwɔndugii, ɑ mɑɑ suuru mɔ. Wunɛn kĩru tɑ kpɑ̃. A rɑ tɔnu kɔ̃sɑ wĩɑri ye ɑ rɑɑ gɔ̃ru doke ɑ nùn kuɑ. 3 Tɛ̃, ɑ de n gbi, domi n burɑm bo n gbi ye ko nɑ n kɑ wɑ̃ɑ.

4 Yinni Gusunɔ u nɛɛ, ɑ ǹ gem mɔ Yonɑsi, ɑ kɑ mɔru yenin bweseru ko.

5 Yerɑ Yonɑsi u yɑrimɑ Ninifu yen min di u dɑ u wɑ̃ɑ yen sɔ̃ɔ yɑri yeru giɑ, u kuru girɑ mi. Miyɑ u mɑrɑ u wɑ ye yɑ koo wuu ge deemɑ. 6 Mɑ Yinni Gusunɔ u dɑ̃ɑ kiku gɑgu kpiisiɑ gɑ Yonɑsi gunum kere, gu kɑ nùn sɑɑru kuɑ, kpɑ win bwɛ̃rɑ yu kpunɑ. Yerɑ n Yonɑsi dore too too. 7 Adɑmɑ sisiru bururu, Gusunɔ u mɑɑ derɑ kɔkɔru gɑrɑ nɑ tɑ dɑ̃ɑ te di. Mɑ tɑ gberɑ. 8 Sɑnɑm mɛ sɔ̃ɔ yɑrɑ, u derɑ woo sum gɑ nɑ sɑɑ sɔ̃ɔ yɑri yerun di. Mɑ sɔ̃ɔ wi, u Yonɑsi so wirɔ sere u wɑsikirɑ. Mɑ u nɛɛ, n burɑm bo u gbi ye u ko n kɑ mɑɑ wɑ̃ɑ.

9 Yerɑ Gusunɔ u nùn sɔ̃ɔwɑ u nɛɛ, ɑ ǹ gem mɔ ɑ kɑ mɔru ko dɑ̃ɑ kiku gen sɔ̃.

Mɑ Yonɑsi u nɛɛ, nɑ gem mɔ n kɑ mɔru ko too too sere n gɔɔ kɑnɑ.

10 Mɑ Yinni Gusunɔ u wisɑ u nɛɛ, ɑ ǹ sɔmburu gɑru kue dɑ̃ɑ ten sɔ̃. N ǹ wunɛ ɑ tu kpiisiɑ. Wee tɑ kpɛ̃ɑ wɔ̃ku teeru, mɑ tɑ gu wɔ̃ku kpɑɑru. Kɑ mɛ, wee ɑ tu wɔnwɔndu kuɑmmɛ. 11 Ninifu wuu bɔkɔ gen tɔmbu bɑ sɑ̃ɑwɑ tɔmbu nɔrɔbun subɑ wunɑɑ teeru (120.000), bɑ ǹ mɑɑ geɑ kɑ kɔ̃sɑn wunɑnɔ yɛ̃. Yerɑ ɑ ǹ kĩ n be kɑ ben yɑɑ sɑbe dɑbinu wɔnwɔndu kuɑ?

<- Yonɑsi 3