49
Gɑri yi Yinni Gusunɔ u geruɑ
Amɔnibɑn sɔ̃
1 Wee ye Yinni Gusunɔ u geruɑ Amɔnibɑn sɔ̃. U nɛɛ,
mbɑn sɔ̃nɑ bũu wi bɑ mɔ̀ Mɑlikɔmu u Gɑdin tem mwɑ.
Mbɑn sɔ̃nɑ win tɔmbu Amɔnibɑ bɑ Isirelibɑn wusu wɔrɑ.
Isirelibɑ bɑ ǹ bibu mɔwɑ be bɑ koo mu tubi di?
2 Yen sɔ̃ tɛ̃, kon de tɑbun wurenu nu nɔɔrɑ ben wuu mɑroɔ ge bɑ mɔ̀ Rɑbɑ.
Rɑbɑ ye, yɑ koo bɑnsu ko,
kpɑ yen bɑru kpɑɑnu nu dɔ̃ɔ mwɑɑkirɑ.
Nge mɛyɑ Isirelibɑ bɑ koo bu girɑ be, be bɑ rɑɑ bu girɑ.
Nɛ, Yinni Gusunɔwɑ nɑ yeni geruɑ.
3 Bɛɛ, Hɛsibonigibu, i gɔɔ swĩiyɔ.
Domi bɑ koo Ayi kɑm koosiɑ.
Rɑbɑn bɑru kpɑɑnugibu, i nɔɔgiru suo i somiru kɑnɑ.
I sɑɑki deewo nuku sɑnkirɑnun sɔ̃,
kpɑ i n sirenɛ i n gɔɔ sumɔ.
Domi bɑ koo bɛɛn bũu wi bɑ mɔ̀ Mɑlikɔmu suɑ,
kɑ win yɑ̃ku kowobu kɑ win wirugibu bu kɑ doonɑ.
4 Bɛɛ Rɑbɑgibu, bɛɛ be i ku rɑ mɛm nɔ,
wee i tii sue bɛɛn wɔwɑ ye yɑ tem gem mɔn sɔ̃.
Mɑ i bɛɛn dukiɑ nɑɑnɛ sɑ̃ɑ.
Mɑ i mɔ̀, wɑrɑ u koo kpĩ u bɛɛ wɔrimɑ.
5 Gusunɔ, wɔllu kɑ tem Yinni u nɛɛ,
wee kon bɛɛ nɔni swɑ̃ɑru suremɑ.
Tɑ koo nɑwɑ sɑɑ bɑɑmɑn di,
kpɑ i yɑrinɑ.
Goo mɑɑ sɑri wi u koo bɛɛ mɛnnɑ.
6 Adɑmɑ ɑmɛn biru kon de be bɑ yɑrinɛ mi, bu wurɑmɑ.
Nɛ, Yinni Gusunɔwɑ nɑ yeni geruɑ.
Gɑri yi Yinni Gusunɔ u geruɑ
Edɔmubɑn sɔ̃
7 Wee ye Gusunɔ, wɔllu kɑ tem Yinni u geruɑ Edɔmubɑn sɔ̃. U nɛɛ,
bwisi yi kpɑwɑ Temɑniɔ?
Ben bwisigibun bwisi yi kpɑwɑ?
Mɑnɑ yi kpuro yi doonɑ.
8 Bɛɛ Dedɑnigibu, i gɔsiro,
i duki yɑkuro i dɑ i kuke kpee bɑɑbɑ sɔɔ.
Domi kon Esɑugibu nɔni swɑ̃ɑru kpɛ̃ɛ
sɑnɑm mɛ kon bu sɛɛyɑsiɑ.
9 Be bɑ rɑ resɛm sɔri bɑ̀ n nɑ bɛɛn mi,
bɑ rɑ fiiko deri.
Gbɛnɔbu bɑ̀ n tɔmbu wɔri,
bɑ rɑ suewɑ ye bɑ koo kpĩ.
10 Adɑmɑ nɛ, Yinni Gusunɔ,
kon Esɑun bweseru kpuron yɑ̃nu gurɑwɑ.
Kon bu sikiɑmɑ ben kuku yenun di.
Bɑ ǹ kpɛ̃ bu kuke.
Ben bibu kɑ ben dusibu kɑ be bɑ kɑ bu sikerenɛ kpuro bɑ koo gbiwɑ.
Goo kun tiɑrɑmɔ.
11 Bɑɑ bɑ̀ n ben bibu deri bɑ kuɑ gobekubɑ,
nɛnɑ kon de bɑ n wɑ̃ɑ,
kpɑ ben gɔminibu bu mɑn nɑɑnɛ ko.
12 Nɑ mɑɑ nɛɛ, be nɑ ǹ dɑɑ sɛɛyɑsiɑmɔ, kon bu sɛɛyɑsiɑ. Yerɑ bɛɛ, Edɔmubɑ, i tɑmɑɑ i yɑrɑ min di? Aɑwo, kon bɛɛ sɛɛyɑsiɑwɑ. 13 Nɑ bɔ̃rumɔ sere kɑ nɛn wɑ̃ɑru mɑ bɛɛn wuu mɑro Bɔtisirɑ gɑ koo bɑnsu ko kpɑ n sɑ̃ɑ sekuru, kpɑ tɔmbu bɑ n dɑ gu sie bɑ̀ n goo bɔ̃rusimɔ. Mɛyɑ mɑɑ bɛɛn wuu si su tie su koo ko bɑnsu sere kɑ bɑɑdommɑɔ. Nɛ, Yinni Gusunɔwɑ nɑ yeni geruɑ.
14 Yinni Gusunɔ u Yeremi lɑbɑɑri yeni sɔ̃ɔwɑ u nɛɛ,
bɑ sɔmɔ goo gɔrɑ bwesenun suunu sɔɔ u nu sɔ̃ u nɛɛ,
nu mɛnnɑmɑ nu Edɔmubɑ wɔri,
nu seewo nu bu tɑbu wɔri.
15 Domi nɛ, Yinni Gusunɔ, kon bu ko dɑ̃ɑkobu bwesenu kpuro sɔɔ,
be tɔmbɑ ko n gɛmɑ.
16 Ben tii suɑbu kɑ ben nɔnigiru tɑ derɑ bɑ kɔ̃ɔrɑ.
Be bɑ wɑ̃ɑ kpee bɑɑbɑ sɔɔ, kɑ sere gungunun wii kpiinɔ,
bɑɑ bɑ̀ n wɑ̃ɑ yenu kuɑ sere wɔllun sɔɔ sɔɔwɔ, nge gunɔ bɑkeru,
kon bu surɑmɑ min di.
Nɛ, Yinni Gusunɔwɑ nɑ yeni geruɑ.
17 Edɔmu yɑ koo kowɑ bɑnsu. Be bɑ sɑrɔ mi, bɑ̀ n ye wɑ, biti yɑ koo bu mwɑ kpɑ bu wiɑ ko ɑsɔrɔ yen sɔ̃. 18 Domi yɑ ko n sɑ̃ɑwɑ nge mɛ bɑ Sodomu kɑ Gomɔrɑ kpeerɑsiɑ kɑ yen bɑru kpɑɑnɔ. Goo kun mɑɑ sinɑmɔ mi.
19 Ko nɑ n sɑ̃ɑwɑ nge gbee sunɔ
ge gɑ yɑrimɑ Yuudɛnin gbee surorun di gɑ dɔɔ gu nim nɔ.
Kpɑ n tɔmbu kpuro yɑrinɑsiɑ subɑru sɔɔ.
Sɑɑ ye sɔɔrɑ kon Edɔmubɑ sunɔ kpɑo wɛ̃ wi nɛn tii nɑ gɔsɑ.
Nge wɑrɑ u kɑ mɑn nɛ.
Wɑrɑ u koo kpĩ u mɑn woodɑ wɛ̃.
Sinɑ boko wɑrɑ u koo kpĩ u yɔ̃rɑ nɛn wuswɑɑɔ.
20 Yen sɔ̃, i swɑɑ dɑkio i nɔ himbɑ ye nɑ kuɑ Edɔmubɑn sɔ̃,
kɑ sere kpunɑɑ ye nɑ yi Temɑnigibun sɔ̃.
Nɑ nɛɛ, kɑm kɑm, kon de bu be kpuro mwɛɛriwɑ nge yɑ̃ɑnu
bu kɑ dɑ tem tukumɔ.
Bɑ koo ben tem kpuro kɑm koosiɑwɑ.
21 Kɑm koo bin wurenu sɔɔ, tem mu koo yĩiri.
Tɔmbɑ koo nɔɔgiru suɑ bu somiru kɑnɑ,
kpɑ ben nɔsu su nɔɔrɑ sere nim wɔ̃kuɔ, ge bɑ mɔ̀ Sɔ̃ɔ.
22 Wee, yibɛrɛbɑ bɑ koo Botisirɑ wukiri nge mɛ yɑberekunu nu rɑ yɑɑ gonu kunisi. Yen dɔmɑ te, Edɔmun tɑbu durɔ dɑmgibu bɑ ko n kpɑsɑ wɔri mɔ̀wɑ nge tɔn kurɔ wi u yiire u kĩ u mɑ.
Gɑri yi Yinni Gusunɔ u geruɑ
Dɑmɑsin sɔ̃
23 Wee ye Yinni Gusunɔ u geruɑ Dɑmɑsin sɔ̃. U nɛɛ,
yen wuu sini, Hɑmɑti kɑ Aɑpɑdi,
sin tɔmbɑ wɑ̃ɑ sekuru sɔɔ.
Bɑ lɑbɑɑri kɔ̃sɑ nuɑ, mɑ bɑ diirimɔ.
Ben lɑɑkɑri yɑ burisinɑ nge nim wɔ̃kun nim,
sere yɑ ǹ kpĩɑ yɑ wurɑmɛ.
24 Dɑmɑsigibu bɑ mwiɑ kpɑnɑ bɑ gɔsirɑ bu kɑ duki su,
ɑdɑmɑ bɑ bɛrum soore.
Mɑ nuku sɑnkirɑnu kɑ wuriribu bu nɛni
nge tɔn kurɔ wi u yiire u kĩ u mɑ.
25 Wuu gèn sɔ̃ nɑ rɑ n nuku dobu mɔ,
mbɑn sɔ̃nɑ gen tɔmbu bɑ ǹ kpikiru suɑ.
Wuu bɔkɔ ge, ge gɑ yĩsiru yɑrɑ mi,
mbɑn sɔ̃nɑ gen tɔmbu bɑ ǹ gu deri.
26-27 Sɔ̃ɔ teeru bɑ koo gen ɑluwɑɑsibɑ go gen swɛɛ sɔɔ. Bɑ koo mɑɑ gen tɑbu kowobu kpuro kpeerɑsiɑ, kpɑ n de bu gu dɔ̃ɔ mɛni kɑ Bɛni Hɑdɑdin sinɑ kpɑɑru. Nɛ, Gusunɔ, wɔllu kɑ tem Yinniwɑ nɑ yeni geruɑ.
Gɑri yi Yinni Gusunɔ
u geruɑ Kedɑɑgibu
kɑ Hɑsorigibun sɔ̃
28 Wee ye Yinni Gusunɔ u geruɑ Kedɑɑgibun sɔ̃ kɑ bwese ni nu wɑ̃ɑ Hɑsoriɔn sɔ̃, ni Bɑbilonin sinɑ boko Nɛbukɑnɛsɑɑ u kɑmiɑ. U nɛɛ,
i seewo i Kedɑɑgibu wɔri.
I be, sɔ̃ɔ yɑri yerugii be kpuro goowo.
29 I ben kuu bekunuginu kɑ ben yɑɑ sɑbenu kpuro guro,
kɑ ben bekɑ kɑ ben sɔmunu kɑ ben yooyoosu,
kpɑ i kuuki ko bɑɑmɑ i bu bɛrum tiɑ.
30 Bɛɛ Hɑsorigibu i seewo i duki su fuuku,
kpɑ i dɑ i kuke wɔrusu sɔɔ.
Domi Bɑbilonin sinɑ boko Nɛbukɑnɛsɑɑ u kpunɑɑ kuɑ u kɑ bɛɛ wɔri.
Nɛ, Yinni Gusunɔwɑ nɑ yeni geruɑ.
31 U mɑɑ nɛɛ,
i doo i bu wɔri be, be bɑ wɑ̃ɑ bɔri yɛndu sɔɔ, bɑ sɔ̃ sɛ̃ɛ ben yɛnusɔ.
Ben wusu su ǹ gɑmbobɑ kɑ kɔkɔrɔbɑ mɔ,
mɑ bɑ kɑ tɔmbu dɛsire.
32 Yibɛrɛbɑ bɑ koo ben yooyoosu mwɛɛri
kɑ sere mɑɑ ben yɑɑ sɑbenu yɑ n dɑbi.
Kon bu yɑrinɑsiɑ bɑɑmɑ,
be, be bɑ rɑ ben wii bɑɑnu kɔni beri berikɑ.
Kon de yibɛrɛbɑ bu nɑ bɑɑmɑn di bu bu kɑm koosiɑ.
Nɛ, Yinni Gusunɔwɑ nɑ yeni geruɑ.
33 Hɑsorin wuu gɑ koo ko bɑnsu,
kpɑ gɑ n sɑ̃ɑ gbeeku bɔ̃nun wɑ̃ɑ yeru sere kɑ bɑɑdommɑɔ.
Goo kun mɑɑ sinɑmɔ mi.
Gɑri yi Yinni Gusunɔ u geruɑ
Elɑmun sɔ̃
34 Wee ye Yinni Gusunɔ u win sɔmɔ Yeremi sɔ̃ɔwɑ Elɑmun sɔ̃. Sɑɑ ye sɔɔ, Sedesiɑsi, Yudɑbɑn sinɑ bokon bɑndun torewɑ mi. 35 Gusunɔ, wɔllu kɑ tem Yinni u nɛɛ,
wee, kon Elɑmugibun tɛnnu bɔɔku
ni nu sɑ̃ɑ ben dɑm nuuru.
36 Kon bu hɑnduniɑn goonu nnɛ kpuron woo kpɑremɑ, kpɑ n bu yɑrinɑsiɑ bɑɑmɑ. Tem gɑm sɑri mi bɑ ǹ ko n wɑ̃ɑ.
37 Kon de Elɑmugibu bu diiri
ben yibɛrɛbɑ kɑ be bɑ kɑsu bu bu gon wuswɑɑɔ.
Nɛn mɔrun sɑɑbu kon bu nɔni swɑ̃ɑ bɑkɑru kpɛ̃ɛ.
Tɑbɑ kon kɑ bu go n kpe,
38 kpɑ n ben sinɑmbu kɑ ben wirugibu go
kpɑ n nɛn tiin bɑndu swĩi.
Nɛ, Yinni Gusunɔwɑ nɑ yeni geruɑ.
39 Adɑmɑ tɔ̃ru gɑrɑ wee tè sɔɔ kon de