1 Yinni Gusunɔ u nɛɛ,
bɛɛ Isirelibɑ,
ì n kĩ i wurɑmɑ nɛn mi, i ko kpĩ i wurɑmɑ.
Ì n bɛɛn bũu sɑ̃ɑru deri, i ǹ mɑɑ yɑɑyɑɑre mɔ̀,
2 ì n dɑ bɔ̃re gem sɔɔ kɑ gɔ̃ru dɛɛrɔ,
i nɛɛ, kɑ Yinni Gusunɔn wɑ̃ɑru,
sɑɑ yerɑ bwese tukunu nu koo domɑru wɑ nɛn min di,
kpɑ bu woo kɑnɑ nɛn sɔ̃.
3 Nɛ, Yinni Gusunɔwɑ nɑ bɛɛ Yudɑbɑ kɑ Yerusɑlɛmugibu sɔ̃ɔmɔ nɑ mɔ̀,
i gbee kpɑɑnu kɑsirio, i dɑ̃ɑ dɔ̃ɔ go.
I ku rɑ mɑɑ bɛɛn dĩɑnu duure sɑ̃ki sɔɔ.
4 Geemɑ, i bɑngo sɑ̃ɑ wɑsi sɔɔ.
Adɑmɑ n tiewɑ i mɑn tii wɛ̃,
kpɑ nɛn mɔru yu ku rɑɑ yɑburɑ nge dɔ̃ɔ,
wi goo kun kpɛ̃ u go,
domi bɛɛn nuku kɔ̃suru tɑ kpɑ̃.
Bɑ Yudɑbɑ wɔrimɑ
5 Yeremi u nɛɛ,
i Yudɑbɑ sɔ̃ɔwɔ kpɑ i gbɑ̃rɑ Yerusɑlɛmuɔ.
I kɔbɑ soowo tem mɛ kpuro sɔɔ.
I nɔɔgiru suo kɑ dɑm i nɛɛ,
bu mɛnnɑmɑ bu dɑ wuu si su gbɑ̃rɑnu mɔ sɔɔ.
6 Bu gidi bɔrɑ sueyo Siɔni giɑ
bu duki yɑkuro bu ku yɔ̃rɑ.
Domi Gusunɔ u koo de kɔ̃sɑ yu nɑ
sɑɑ sɔ̃ɔ yɛ̃sɑn nɔm geu giɑn di.
7 Yibɛrɛ be bɑ rɑ bwesenu kɑm koosie
bɑ seewɑ ben wɑ̃ɑ yerun di nge gbee sunɔ
ge gɑ tii dɛmiɑmɔ gen bweun di,
bɑ wee bu kɑ tem mɛ kɑm koosiɑ.
Bɛɛ Yudɑbɑ, bɑ koo bɛɛn wusu kɔsuku
kpɑ su ko bɑnsu.
8 I sɑɑki sebuo nuku sɑnkirɑnun sɔ̃
kpɑ i swĩ i weeweenu ko,
domi Yinni Gusunɔn mɔru kun sun doonɑrimɔ.
9 Mɑ Yinni Gusunɔ u nɛɛ,
yen tɔ̃ɔ te sɔɔ,
sinɑ boko kɑ win sinɑ ɑsɑkpɔbu bɑ koo mwiɑ kpɑnɑ
kpɑ yɑ̃ku kowobu bu biti soorɑ,
kpɑ Gusunɔn sɔmɔbu bu nɔsu nɛnɛ,
10 bu nɛɛ, nɛ, Yinni Gusunɔ
nɑ be, Yudɑbɑ kɑ Yerusɑlɛmugibu nɔni wɔ̃kuɑ
ye nɑ nɛɛ, bɑ koo bɔri yɛndu wɑ.
Wee tɛ̃ bɑ woburu sɔndi ben wĩinɔ.
Yibɛrɛbɑ bɑ Yudɑbɑ sikerenɛ
11 Sɑɑ ye sɔɔ, kon bu sɔ̃ n nɛɛ,
wee, woo gɑ wee sɑɑ gbɑburun guunun di,
gu kɑ nɛn tɔmbu Yudɑbɑ swee.
Woo ge, gɑ ǹ sɑ̃ɑ fɛrɛ fɛrɛ
nge ge bɑ koo kɑ dobi sɑrɑ.
12 Gɑ ko n dɑm mɔwɑ.
Nɛ, Yinni Gusunɔwɑ nɑ gu sokusiɑmɔ.
Tɛ̃wɑ kon bu siri.
13 Mɑ Yudɑbɑ bɑ nɛɛ,
gberɑ sun di, domi sɑ kɑm kuɑ.
Wee, wi u koo sun kɑm koosiɑ u sĩimɔ nge guru wiru.
Win tɑbu kɛkɛ yi sɑ̃ɑ nge guru woo.
Mɑ win dumi yi gunɔ bɑkeru sɑ̃ɑbu kere.
14 Yinni Gusunɔ u nɛɛ,
bɛɛ Yerusɑlɛmugibu,
sere sɑɑ yerɑ̀ i kĩ i n kɔ̃sɑ bwisikumɔ.
I bɛɛn gɔ̃rusu dɛɛrɑsio, kpɑ i fɑɑbɑ wɑ.
15 I swɑɑ dɑkio gɑri yi bɑ kɑ nɑ Dɑnun tem di
kɑ Efɑrɑimun guunun di
bɑ nɛɛ, kɔ̃sɑ wee.
16 I ye bwesenu kpuro nɔɔsio.
Kpɑ i ye Yerusɑlɛmugibu sɔ̃ i nɛɛ,
yibɛrɛbɑ bɑ wee sɑɑ tontonden di.
Bɑ koo Yudɑbɑn wusu tɑbun kuuki koosi.
17 Kpɑ bu Yerusɑlɛmu sikerenɑ
nge be bɑ gberu kɔ̃su.
Domi yen tɔmbu bɑ mɑn seesi.
Nɛ, Yinni Gusunɔwɑ nɑ yeni geruɑ.
18 Bɛɛ Yudɑbɑ, geemɑ wɑhɑlɑ yɑ bɛɛ nɔni sɔ̃ɔwɑ sere bɛɛn woo sɔndɔ.
Adɑmɑ yɑ sɑ̃ɑwɑ bɛɛn kom kɔ̃sum kɑ bɛɛn nuku kɔ̃surun ɑre.
Yeremi u wɑsikirɑmɔ
win tɔmbun wɑhɑlɑn sɔ̃
19 Yeremi u nɛɛ,
nɛn nuki mɑn wuririmɔ mɑ nɛn tororɑ kɑrɑ.
Nɑ ǹ kpɛ̃ n nɔɔ mɑri wɑhɑlɑ yenin sɔ̃.
Nɑ tɑbun kɔbɑ nɔɔmɔ. Bu wee.
20 Bɑ sun nɔɔsiɑmɔ mɑ bɑ wuu dɑbinu kɔsukɑ.
Tem mɛ kpuro mu kɑm kobu dɔɔwɑ.
Subɑru sɔɔrɑ bɑ nɑ bɑ bɛsɛn tɑbu kowobun kuu bekuruginu wukurɑ.
Mɑ bɑ nu gurɑ bɑ kɑ doonɑ.
21 Sere dommɑ nɑ kon yibɛrɛbɑn gidi bɔrɑ wɑɑmɔ,
kpɑ nɑ n kɔbɑn swĩi nɔɔmɔ tɑ̃ɑ tɑ̃ɑ.
22 Mɑ Yinni Gusunɔ u nɛɛ,
wee, nɛn tɔmbu bɑ ǹ bwisi mɔ.
Mɛyɑ bɑ ǹ mɑn yɛ̃.
Bɑ sɑ̃ɑwɑ gɑri bɑkɑsu.
Bɑ kɔ̃sɑn kobun bwisi mɔ,
ɑdɑmɑ bɑ ǹ geɑn kobu yɛ̃.
Kɑm kobu wee
23 Nɑ tem mɛɛrɑ mɑ mu sɑ̃ɑ bitɑm,
gɑ̃ɑnu sɑri mɛn wɔllɔ.
Nɑ mɑɑ wɔllu mɛɛrɑ,
nɑ deemɑ yɑm bururɑm sɑri mi.
24 Nɑ guunu mɛɛrɑ, nɑ wɑ wee,
nu wɔrumɑ. Mɑ gungunu nu bɑ̃ɑrimɔ.
25 Nɑ mɑɑ mɛɛrɑ nɑ wɑ wee,
tɔnu sɑri tem sɔɔ.
Mɑ gunɔsu su yɑrinɑ kpuro.
26 Nɑ tem mɛɛrɑ mɛ mu rɑɑ sɑ̃ɑ tem gem.
Nɑ deemɑ wee, mu kuɑ tem sɑɑrɑm.
Mɑ wuu si su wɑ̃ɑ mi, su wɔrukɑ.
Yinni Gusunɔwɑ u ye kuɑ win mɔrun sɑɑbu.
27 Yinni Gusunɔ u nɛɛ,
u koo tem mɛ gɔsiɑ tem sɑɑrɑm,
ɑdɑmɑ u mɑɑ nɛɛ,
u ǹ derimɔ mu n sɑ̃ɑ mɛ kɑ bɑɑdommɑɔ.
28 Yen sɔ̃, tem mu ko n gɔɔ wooru sɔ̃,
kpɑ wɔllu tu yɑm tĩrɑ.
Domi u himbɑ yi kɔ, u ǹ mɑɑ biru wurɔ.
29 Ye wusu kpuron tɔmbu bɑ mɑɑsɔbu kɑ tɛn towobun wɔkinu nuɑ,
yerɑ bɑ duki yɑkikirɑ kpuro.
Gɑbɑ wɔriki dɑ̃ɑ sɔ̃sɔ mɑ gɑbɑ duɑ kpee bɑɑbɑ sɔɔ.
Bɑ wuu si deri su kuɑ bɑnsu.
30 Wunɛ Yerusɑlɛmu, burɑru mbɑ kɑɑ mɑɑ tii kuɑ.
Kɑɑ tii beku wunɔmgiru kɑsuɑwɑ ɑ dewe,
kpɑ ɑ wurɑn sɑbɑ sebe, kpɑ ɑ kiro doke?
Kɑm sɔɔrɑ kɑɑ tii burɑru kuɑ.
Wee wunɛn kĩnɑsibu bɑ nun tusɑ
bɑ kɑsu bu nun go.
31 Nɑ wuri kɑ weeweenu nɔɔmɔ
nge tɔn kurɔ wi u yiire u kĩ u win bii gbiikoo mɑ.
Ase Yerusɑlɛmun nɔɔwɑ gɑ nɔɔrɑmɔ mi.
Yɑ wom gɑbɑmɔ, yɑ nɔmɑ dɛmiɛ yɑ mɔ̀,
yɑ kɑm kuɑwɑ.