1 Bɑbilonin sinɑ boko Nɛbukɑnɛsɑɑ u Sedesiɑsi Yosiɑsin bii kuɑ sinɑ boko Yudɑɔ, Yekoniɑ Yoyɑkimun biin ɑyerɔ. 2 Sedesiɑsi wi, kɑ win bwɑ̃ɑbu, kɑ win tɔmbu bɑ ǹ Yinni Gusunɔn gɑri yi swɑɑ dɑki yi Gusunɔn sɔmɔ Yeremi u bu sɔ̃ɔwɑ mi.

3-4 N deemɑ sɑɑ ye sɔɔ, bɑ ǹ ginɑ Yeremi pirisɔm doke. U rɑ dewɑ mi u kĩ, win tɔmbun suunu sɔɔ. Yerɑ sinɑ boko Sedesiɑsi u Yukɑli Selemiɑn bii kɑ Sofoni Mɑɑseyɑn bii wi u sɑ̃ɑ yɑ̃ku kowo gɔrɑ win mi, bu kɑ nùn sɔ̃ u bu Gusunɔ ben Yinni kɑnɑ u kɑ bu nɔnu geu mɛɛri. 5 Sɑɑ yerɑ Bɑbilonigibu bɑ Yerusɑlɛmu tɑrusi. Ye bɑ nuɑ mɑ Egibiti sunɔn tɑbu kowobu bɑ Yerusɑlɛmugii be somiru sisi, yerɑ bɑ yɑrinɑ bɑ doonɑ min di. 6-7 Sɑɑ yerɑ Gusunɔ Isirelibɑn Yinni u Yeremi sɔ̃ɔwɑ u nɛɛ, ɑ Yudɑbɑn sinɑ boko wi u nun gɔrimɑ nɛn mi sɔ̃ɔwɔ ɑ nɛɛ, wee, Egibiti sunɔn tɑbu kowo be bɑ rɑɑ wee bu kɑ nùn somi bɑ gɔsirɔ ben temɔ. 8 Tɛ̃, Bɑbilonigii be, bɑ koo mɑɑ wurɑmɑ bu Yerusɑlɛmu wɔri bu ye mwɑ, bu dɔ̃ɔ sɔku. 9 Yen sɔ̃, ɑmɛniwɑ nɛ, Yinni Gusunɔ nɑ geruɑ. Nɑ nɛɛ, bu ku tii nɔni wɔ̃ke bu nɛɛ, Bɑbilonigii be, bɑ tondɑ. Adɑmɑ bɑ n yɛ̃ mɑ bɑ ǹ gɑm de. 10 Bɑɑ bɑ̀ n Bɑbilonin tɑbu kowo be kɑmiɑ, kpɑ n tie be bɑ mɛɛrɑ kuɑ, kɑ mɛ, bɑ koo se sɑɑ ben kuu bekuruginun di bu wuu ge dɔ̃ɔ mɛni.

11 Sɑnɑm mɛ Bɑbilonigibun tɑbu kowo be, bɑ yɑrinɑ bɑ Yerusɑlɛmu deri Egibiti sunɔn tɑbu kowo ben sɔ̃, 12 yerɑ Yeremi u kĩ u yɑri Yerusɑlɛmun di u dɑ Bɛnyɑmɛɛn temɔ u kɑ win bɑɑ suɑ tubi ye bɑ bɔnu mɔ̀ sɔɔ. 13 Sɑnɑm mɛ u yɑriɔ u kɔnnɔ turɑ ge bɑ mɔ̀ Bɛnyɑmɛɛ, mɑ u deemɑ ben kɔ̃sobun tɔnwero wi bɑ mɔ̀ Yirɛyɑ Selemiɑn bii, Hɑnɑniɑn debubu u yɔ̃ mi. Mɑ u nùn yɔ̃rɑsiɑ u nɛɛ, ɑ tii Bɑbilonigibu wɛ̃.

14 Yerɑ u nɛɛ, ɑɑwo, nɑ ǹ nɛn tii Bɑbilonigibu wɛ̃.

Adɑmɑ durɔ wi, u ǹ win gɑri yi wure. Mɑ u nùn mwɑ u kɑ dɑ wirugibun mi. 15 Yerɑ wirugii ben mɔru yɑ seewɑ bɑ nùn mwɑ bɑ so bɑ pirisɔm doke Yonɑtɑm dirɔ wi u sɑ̃ɑ tire yoro. N deemɑ bɑ win dii te gɔsiɑwɑ pirisɔm diru. 16 Nge mɛyɑ bɑ kɑ nùn pirisɔm doke dirɔ wɔru sɔɔ sere n kɑ tɛ.

17 Sɔ̃ɔ teeru, sinɑ boko Sedesiɑsi u gɔrɑ u nɛɛ, bu Yeremi sokumɑ. Ye u nɑ, mɑ u nùn gɑri bikiɑ ɑsiri sɔɔ u nɛɛ, Yeremi, ɑ gɑri gɛɛ mɔ yi yi wee Yinni Gusunɔn min di ɑ mɑn sɔ̃?

Mɑ u nùn wisɑ u nɛɛ, oo. Yinni Gusunɔ u koo de Bɑbilonin sinɑ boko u nun nɔmɑ turi.

18 Mɑ Yeremi u mɑɑ nùn bikiɑ u nɛɛ, torɑ terɑ̀ nɑ bɛɛ torɑ wunɛ kɑ wunɛn bwɑ̃ɑbu kɑ sere wunɛn tɔmbu kpuro i kɑ mɑn mwɑ i pirisɔm kpɛ̃ɛ. 19 Mɑnɑ bɛɛn sɔmɔ be, bɑ wɑ̃ɑ be bɑ bɛɛ gɑri sɔ̃ɔwɑ bɑ nɛɛ, Bɑbilonin sinɑ boko kun nun wɔrim wee u sere tem mɛ mwɑ.

20 Tɛ̃, nɛn yinni sinɑ boko, ɑ mɑn swɑɑ dɑkio kpɑ ɑ nɛn kɑnɑru nɔ, kpɑ ɑ mɑn kuɑ ye nɑ kĩ. A ku mɑɑ de n wurɑ Yonɑtɑm tire yoron diru mi, kpɑ n ku rɑ kɑ gbi.

21 Yerɑ sinɑ boko Sedesiɑsi u woodɑ wɛ̃ u nɛɛ, bu nùn yiiyo pirisɔm dirun yɑɑrɑɔ kpɑ bɑ n dɑ nùn pɛ̃ɛ kuse teeru wɛ̃ bɑɑdommɑ ye wuun pɛ̃ɛ kowobɑ rɑ ko sere wuu nukurun pɛ̃ɛ yu kɑ kpe. Nge mɛyɑ u kɑ sinɑ pirisɔm dirun yɑɑrɑ mi.

<- Yeremi 36Yeremi 38 ->