1 Nɛbukɑnɛsɑɑ, Bɑbilonin sinɑ boko, u Yerusɑlɛmu kɑ Yudɑn wusu tɑbu wɔri. Sɑɑ ye sɔɔ, win tɑbu kowobu kpuro bɑ wɑ̃ɑ mi, kɑ hɑnduniɑn sinɑmbun tɑbu kowobu kpuro kɑ sere mɑɑ be u tɑbu di. Sɑɑ yerɑ Yinni Gusunɔ u Yeremi sɔ̃ɔwɑ 2 u nɛɛ, nɛ Gusunɔ, Isirelibɑn Yinni, nɑ nun sɔ̃ɔmɔ, ɑ doo ɑ Sedesiɑsi, Yudɑbɑn sinɑ boko deemɑ kpɑ ɑ nùn sɔ̃, wee ye nɛ, Yinni Gusunɔ nɑ nùn sɔ̃ɔmɑ. Kon Yerusɑlɛmu Bɑbilonin sinɑ boko nɔmu bɛriɑ u ye kɑm koosiɑ u dɔ̃ɔ mɛni. 3 Mɛyɑ wi, Sedesiɑsi u ǹ nùn kisirɑrimɔ. U koo nùn mwɑ kpɑ bu wɑɑnɑ nɔni kɑ nɔni bu gɑri gerunɑ u sere kɑ nùn dɑ Bɑbiloniɔ.

4 Yen sɔ̃, u nɛn gɑri swɑɑ dɑkio yi nɑ gerumɔ. Nɑ nɛɛ, u ǹ gbimɔ tɑbu sɔɔ, 5 u koo gbiwɑ bɔri yɛndu sɔɔ kpɑ bu win gɔɔ ko nge mɛ bɑ win sikɑdo sinɑm be bɑ nùn gbiiyegii kuɑ. Bɑ koo nùn turɑre dɔ̃ɔ dokeɑ kpɑ bu nùn gɔɔ wuri yini kuɑ bu nɛɛ, wɑnyo! Sinɑ boko u gu! Nɛ, Yinni Gusunɔwɑ nɑ yeni geruɑ.

6 Mɑ Yeremi u dɑ u gɑri yi Sedesiɑsi, Yudɑbɑn sinɑ boko sɔ̃ɔwɑ Yerusɑlɛmu mi. 7 N deemɑ sɑɑ ye sɔɔ, Bɑbilonin sinɑ bokon tɑbu kowobu bɑ Yerusɑlɛmu kɑ Yudɑbɑn wusu kpuro wɔri. Wuu gbɑ̃rɑrugii si su rɑɑ tie, siyɑ Lɑkisi kɑ Asekɑ.

8 Yinni Gusunɔ u mɑɑ kɑ Yeremi gɑri kuɑ sɑnɑm mɛ Sedesiɑsi u kɑ Yerusɑlɛmugibu nɔɔ tiɑ kuɑ bu ben yobu kpuro yɑkiɑ. 9 Sɑɑ ye sɔɔ, bɑɑwure wi u win Heberusi mɔ yoo, tɔn kurɔwɑ? A, tɔn durɔwɑ? U koo yɛ̃ro kɑrɑwɑ u yɑri yorun di. Goo u ku mɑɑ win winsim yoru mwɑ u sɔmburu koosiɑ. 10 Mɑ Yerusɑlɛmun wirugibu kɑ tɔn be bɑ tie kpuro bɑ wurɑ bɑtumɑ sɔɔ bu ku mɑɑ ben yobu sɔmburu koosiɑ. Bɑ koo bu kɑrɑwɑ bɑ n tii mɔ. Mɑ ben bɑɑwure u win yobu kɑrɑ bɑ doonɑ. 11 Adɑmɑ ɑmɛn biru tɔn be, bɑ gɑri yi yinɑ. Bɑ ben yoo be nɑɑ swĩi bɑ mwɑɑmɑ bɑ yoo sɔmɑ koosiɑ kɑ tilɑsi.

12 Sɑɑ yerɑ Yinni Gusunɔ u Yeremi sɔ̃ɔwɑ u nɛɛ, ɑ tɔn be sɔ̃ɔwɔ ɑ nɛɛ, 13 wee, nɛ Gusunɔ ben Yinni, nɑ kɑ ben sikɑdobɑ ɑrukɑwɑni bɔkuɑ sɑnɑm mɛ nɑ bu yɑrɑmɑ Egibitin di, mi bɑ rɑɑ yoru dimɔ. 14 Nɑ nɛɛ, bɑɑwure wi u win Heberusi dwɑ yoo, mɑ yoo wi, u nùn sɔmburu kuɑ wɔ̃ɔ nɔɔbɑ tiɑ, yen nɔɔbɑ yiruse u koo nùn kɑrɑwɑ yoo ten di, u n tii mɔ. Adɑmɑ ben sikɑdo be, bɑ ǹ mɑn swɑɑ dɑki bu sere nɛn gere nɔ. 15 Wee tɛ̃ bɑ wurɑmɑ ben dɔɔ sɔɔ mɑ bɑ geɑ kuɑ nɛn nɔni sɔɔ. Domi bɑ nɔɔ tiɑ kuɑ bɑ nɛɛ, bɑɑwure wi u yoo mɔ u nùn kɑro u n tii mɔ. N deemɑ nɛn sɑ̃ɑ yerɔwɑ bɑ nɔɔ tiɑ kuɑ. 16 Yen biruwɑ bɑ gɑri yi yinɑ mɑ bɑ nɛn yĩsiru sɑnkɑ. Ben bɑɑwure u win yoo nɑɑ dɑ. Bɑ mɑɑ wure bɑ bu kuɑ ben yobu kɑ tilɑsi.

17 Yen sɔ̃, wee ye nɛ, Yinni Gusunɔ nɑ gerumɔ. N dɑɑ weenɛwɑ ben bɑɑwure u win yobu kɑrɑ bɑ n tii mɔ. Adɑmɑ bɑ yinɑ, bɑ ǹ mɑn mɛm nɔɔwɛ. Yen sɔ̃nɑ kon bu yɔ̃su tɑbu sɔɔ kpɑ n bu bɑrɑnu kɑ gɔ̃ɔru kpɛ̃ɛ kpɑ bwese ni nu tie nù n bu wɑ nu biti ko.

18-20 Wee tɛ̃, Yudɑbɑn wirugibu kɑ Yerusɑlɛmun wirugibu kɑ yɑ̃ku kowobu kɑ sunɔn sɔm kowobu kɑ sere tɔn be bɑ tie, be, be bɑ rɑɑ kɑ mɑn ɑrukɑwɑni bɔkuɑ bɑtumɑ sɔɔ sere bɑ nɑɑ buu go bɑ bɛrɑnɑ, mɑ bɑ duɑ gen bɛsi yin suunu sɔɔ bu kɑ ben ɑrukɑwɑni ye sire, bɑ ǹ ye mɛm nɔɔwɛ, bɑ ǹ ben nɔɔ mwɛɛ te yibie. Yen sɔ̃, kon bu ben yibɛrɛ be bɑ kɑsu bu bu go nɔmu bɛriɑ, kpɑ yɑberekunu kɑ gbeeku yɛɛ yi ben gonu di. 21 Mɛyɑ kon Sedesiɑsi Yudɑbɑn sinɑ boko kɑ win sinɑ ɑsɑkpɔbu kuɑ. Kon bu yibɛrɛbɑ nɔmu bɛriɑ be bɑ kɑsu bu bu go. Kon bu Bɑbilonin tɑbu kowobu nɔmu bɛriɑ bɑɑ bɑ̀ n kɑ bu tonde. 22 Kon de bu nɑ bu wuu ge wɔri bu dɔ̃ɔ mɛni kpɑ Yudɑn wusu su ko bɑnsu. Nɛ, Yinni Gusunɔwɑ nɑ yeni geruɑ.

<- Yeremi 33Yeremi 35 ->