31
Isirelibɑ
bɑ koo gɔsirɑmɑ yɛnuɔ
1 Yinni Gusunɔ u nɛɛ, sɑɑ gɑɑ sisi yè sɔɔ kon mɑɑ ko Isirelibɑn bwesenu kpuron Yinni, kpɑ be, bɑ n mɑɑ sɑ̃ɑ nɛn tɔmbu.
2 Sɑnɑm mɛ bɑ wɑ̃ɑ gbɑburɔ,
nɑ bu nɛn durom sɔ̃ɔsi,
ben be bɑ yɑrɑ tɑbun di,
bɑ wee bu wɛ̃rɑ sere kɑ bɑɑdommɑɔ.
3 Bɛɛ Isirelibɑ, nɑ bɛɛ nɛn tii sɔ̃ɔsi sɑɑ yellun di.
Nɑ bɛɛ kĩwɑ sere kɑ bɑɑdommɑɔ.
Yen sɔ̃nɑ nɑ bɛɛ nɛn durom derie.
4 Bɛɛ Isirelibɑ, kon mɑɑ wure n bɛɛ swĩi,
kpɑ i yɔ̃rɑ.
Kon de i bɛɛn bɑrɑnu so,
kpɑ i yɑri i n yɑɑmɔ be bɑ nuku dobu mɔ̀n suunu sɔɔ,
5 i ko i mɑɑ resɛmbɑ duure Sɑmɑrin guunɔ,
kpɑ i yen binu wɑ i sɔri.
6 Sɑɑ yɑ sisi yè sɔɔ wuun kɔ̃sobu bɑ koo nɔɔgiru suɑ
Efɑrɑimun guuru wɔllun di
bu nɛɛ, i seewo su dɑ Siɔniɔ
mi Gusunɔ bɛsɛn Yinni u wɑ̃ɑ.
7 Yinni Gusunɔ u mɑɑ nɛɛ,
i Yɑkɔbun bweseru tɑki kuo kɑ nuku dobu.
I yɛ̃ɛrio ten sɔ̃ te tɑ sɑ̃ɑ bwesenun wiru.
I nɔɔgiru suo kpɑ i siɑrɑbun womusu ko.
I nɛɛ, Yinni Gusunɔ u win tɔmbu Isireli be bɑ tie fɑɑbɑ mɔ̀.
8 Wee nɑ kɑ bu wee sɑɑ sɔ̃ɔ yɛ̃sɑn nɔm geu giɑn di.
Nɑ bu mɛnnɑmɔ hɑnduniɑn goonu nnɛn di.
Tɔn be, bɑ dɑbi.
Be sɔɔ, wɔ̃kobɑ wɑ̃ɑ kɑ yɛmɔbu kɑ gurigibu,
kɑ be bɑ yiire bɑ kĩ bu mɑ.
9 Be wee bɑ wee kɑ swĩi, bɑ mɑn kɑnɑmɔ.
Mɑ nɑ bu kpɑre nɑ kɑ dɔɔ nim bwerɔ
kɑ swɑɑ ye yɑ nɔɔ nɛ sɔɔ,
mi bɑ ǹ sokurɑmɔ.
Domi nɑ sɑ̃ɑwɑ Isirelin bweserun Bɑɑbɑ.
Mɑ tɑ mɑɑ sɑ̃ɑ nɛn bii yerumɑ.
10 Bɛɛ bwese tukunu, i nɛ, Yinni Gusunɔn gɑri swɑɑ dɑkio,
kpɑ i yi kpɑrɑ
i kɑ dɑ sere mi n tomɑ.
I nɛɛ, nɛ wi nɑ Isirelibɑn bweseru yɑrinɑsiɑ,
nɑ kon mɑɑ tu mɛnnɑ,
kpɑ n tu kɔ̃su nge mɛ yɑ̃ɑ kpɑro u rɑ win yɑ̃ɑnu kɔ̃su.
11 Domi nɛ, Yinni Gusunɔ nɑ Yɑkɔbun bweseru yɑkiɑ,
nɑ tu wɔrɑ sɑɑ wi u tu dɑm keren nɔmun di.
12 Bɑ koo nɑ Siɔnin guuru wɔllɔ,
bɑ n nuku dobu mɔ̀ kɑ kuuki.
Bɑ koo duki nɑ ɑrumɑni ye nɛ, Yinni Gusunɔ nɑ bu wɛ̃n sɔ̃.
Yeyɑ, dobi kɑ resɛm kɑ olifi ye bɑ rɑ kɑ gum ko, kɑ yɑ̃ɑnu kɑ nɛɛ.
Ben bwɛ̃rɑ koo yɛmiɑwɑ nge dɑ̃ɑ gbɑɑru te tɑ nim wɑɑmɔ.
Bɑ ǹ koo mɑɑ wɑhɑlɑ ko.
13 Wɔndiɑbɑ bɑ koo nuku dobu ko, bɑ n yɑɑmɔ.
Mɛyɑ mɑɑ ɑluwɑɑsibɑ kɑ durɔ tɔkɔnu ko n yɛ̃ɛrimɔ.
Domi kon ben nuku sɑnkirɑnu gɔsiɑ nuku dobu,
n bu nukuru yɛmiɑsiɑ.
Kpɑ n mɑɑ ben nɔni swɑ̃ɑru gɔsiɑ bɔri yɛndu.
14 Kon de nɛn yɑ̃ku kowobu bu dĩɑ geenu di bu debu,
kpɑ nɛn tɔmbu bu debu nɛn ɑrumɑnin sɔ̃.
Nɛ, Yinni Gusunɔwɑ nɑ yeni geruɑ.
15 Amɛniwɑ Yinni Gusunɔ u geruɑ. U nɛɛ,
bɑ swĩi gɛɛ nɔɔmɔ Rɑmɑɔ.
Yɛ̃ro u sumɔ u weeweenu mɔ̀.
Ase, Rɑsɛliwɑ u sumɔ win bibun sɔ̃.
Mɑ u yinɑmɔ bu nùn suuru kɑnɑ
domi bii be kpurowɑ bɑ gu.
16 Adɑmɑ nɑ nɛɛ,
u mɑrio,
u win nɔni yĩresu woko.
Domi u koo ɑre wɑ ye u win bibu kuɑn sɔ̃.
Bɑ koo wurɑmɑ yibɛrɛbɑn tem di.
17 Nɛ, Yinni Gusunɔ nɑ nɛɛ, win siɑ yɑ koo wɛ̃rɑ,
domi win bibɑ koo wurɑmɑ ben temɔ.
18 Nɑ Isirelibɑn nɔɔ nɔɔmɔ bɑ weeweenu mɔ̀, bɑ mɔ̀,
n de bu wurɑmɑ nɛn mi kɑ gem.
Bɑ sɑ̃ɑwɑ nge nɑɑ buu ge gɑ gen tii kpɑre,
mɑ nɑ bu sɛɛyɑsiɑ.
Domi nɛnɑ nɑ sɑ̃ɑ Gusunɔ ben Yinni.
19 Ye ben lɑɑkɑri yɑ wurɑmɑ, mɑ bɑ tuubɑ kuɑ.
Ye bɑ ben torɑnu giɑ,
mɑ bɑ tukɑ kɑ sekuru
ye bɑ kuɑ sɑɑ ben ɑluwɑɑsirun din sɔ̃.
20 Isirelin bweseru tɑ sɑ̃ɑwɑ nge nɛn bii kĩnɑsi.
Mɛyɑ nɑ mɑɑ tu kĩru sɔ̃ɔsi.
Domi nge mɛ̀n nɔru nɑ ten gɑri mɔ̀,
nge mɛyɑ ten kĩru tɑ rɑ n wɑ̃ɑ nɛn gɔ̃ruɔ.
Nɛn bwɛ̃rɑ kun kpunɛ ten sɔ̃.
Kon tu wɔnwɔn bɑkɑru kuɑ.
Nɛ, Yinni Gusunɔwɑ nɑ yeni geruɑ.
21 Bɛɛ Isirelibɑ, i yĩreru koowo bɛɛn swɑɑ sɔɔ
kpɑ i dɑ̃ɑ girɑ.
I swɑɑ ye lɑɑkɑri koowo ye i rɑɑ swĩi.
Bɛɛ Isirelibɑ, i wurɑmɑ bɛɛn wusɔ.
22 Sere sɑɑ yerɑ̀ i ko i n kɔ̃ɔre i n yɑɑyɑɑre mɔ̀, bɛɛ nɑɑnɛ sɑribɑ.
Wee nɛ Yinni Gusunɔ, nɑ gɑ̃ɑ kpɑɑnu kuɑ temɔ.
Tɔn kurɔwɑ u koo durɔ kɑsu.
Arumɑni ye Yinni Gusunɔ
u koo win tɔmbu wɛ̃
23 Gusunɔ Isirelibɑn Yinni wi u wɔllu kɑ tem mɔ u geruɑ u nɛɛ, nɑ̀ n kɑ Isirelibɑ wurɑmɑ sɑɑ yorun di, ɑmɛniwɑ bɑ koo gere Yudɑn tem kpuro sɔɔ bu nɛɛ,
Yinni Gusunɔ u guu te u gɔsɑ Yerusɑlɛmuɔ domɑru kuo,
mi gem mu wɑ̃ɑ.
24 Yudɑbɑ kpuro, kɑ ben gbɑɑ wukobu, kɑ be bɑ rɑ yɑɑ sɑbenu kpɑre bɑ koo wurɑ bu sinɑ ben tem wuu mɑrosɔ kɑ mɛn bɑru kpɑɑnɔ. 25 Domi kon wi nim nɔru gɑ mɔ̀ nim wɛ̃, kpɑ win gɔ̃ru gu yɛmiɑ. Kpɑ n de wi u wɔkɔnu wɔrimɔ gɔ̃ɔrun sɔ̃ u di u debu. 26 Sɑɑ ye sɔɔ, Yeremi u dom yɑndɑ, mɑ u mɛɛrɑ u deemɑ win dosu ge, gɑ dorɑ.
27 Mɑ Yinni Gusunɔ u nɛɛ, wee sɑɑ yɑ sisi yè sɔɔ kon de yɑɑ sɑbenu kɑ tɔmbu bu yibu Isireliɔ kɑ Yudɑɔ. 28 Nge mɛ nɑ rɑɑ bu wukurɑ nɑ sururɑ nge dɑ̃nu, nɑ bu kɔsukɑ nɑ kɑm koosiɑ nge diɑ, nge mɛyɑ kon mɑɑ wure n bu seeyɑ n girɑ. Nɛ, Yinni Gusunɔwɑ nɑ yeni geruɑ. 29 Sɑɑ ye sɔɔ, bɑ ǹ mɑɑ gerumɔ bu nɛɛ,
bɑɑbɑbɑrɑ bɑ resɛm gɔmɑ di,
mɑ ben bibun nɔsu yɑɑyɑ.
30 Adɑmɑ wi u win resɛm gɔmɑ di, win nɔɔwɑ gɑ koo yɑɑyɑ. Wi u mɑɑ durum kuɑ, wiyɑ u koo gbi.
31 Nɛ, Yinni Gusunɔ nɑ nɛɛ, tɔ̃nu gɑnu sisi nì sɔɔ kon kɑ Isirelibɑ kɑ Yudɑbɑ ɑrukɑwɑni kpɑɑ bɔke. 32 Adɑmɑ yɑ ǹ ko n sɑ̃ɑ yèn bweseru nɑ rɑɑ kɑ ben bɑɑbɑbɑ bɔkuɑ sɑnɑm mɛ nɑ bu nɔmu nɛnuɑ nɑ yɑrɑmɑ Egibitin di. Bɑ ǹ ye mɛm nɔɔwɛ, bɑɑ mɛ nɛ, Yinni Gusunɔ nɑ sɑ̃ɑ ben Yinni. 33 Tɛ̃, ɑrukɑwɑni kpɑɑ ye wee, ye kon kɑ Isirelibɑ bɔke. Nɛ, Yinni Gusunɔ, kon de nɛn woodɑbɑ bɑ n wɑ̃ɑ ben bwisikunu sɔɔ, kpɑ n ye yorusi ben gɔ̃rusɔ. Kpɑ nɑ n sɑ̃ɑ ben Yinni, kpɑ be, bɑ n mɑɑ sɑ̃ɑ nɛn tɔmbu. 34 Domi tɔmbu kpurowɑ bɑ ko n mɑn yɛ̃ sɑɑ bibun di sere kɑ bukurobɔ. Goo kun mɑɑ win winsim ǹ kun mɛ win mɛro bisi goo keu mɔ̀ u kɑ Gusunɔ giɑ. Kon bu ben durum wɔkɑ, kpɑ n ku mɑɑ ye yɑɑyɑ.
35 Yinni Gusunɔwɑ u sɔ̃ɔ kuɑ u kɑ yɑm dɛɛrɑsiɑ sɔ̃ɔ sɔɔ.
Mɑ u suru kɑ kperi yi yi, yi kɑ yɑm dɛɛrɑsiɑ wɔ̃kuru.
U rɑ mɑɑ de nim kurenu nu se nim wɔ̃kun di, kpɑ nu wɔki.
Win yĩsirɑ Yinni Gusunɔ wi u wɔllu kɑ tem mɔ.
Wiyɑ u geruɑ u nɛɛ,
36 tɑkɑ koorɑ yenibɑ kpuro yɑ̀ n koo kpe,
Isirelibɑn bweserɑ koo mɑɑ kpe,
kpɑ tɑ kun mɑɑ wɑ̃ɑ.
37 U mɑɑ geruɑ u nɛɛ,
mɑ bɑ kpĩɑ bɑ wɔllun kpɑ̃ɑru yĩirɑ bɑ giɑ,
mɑ bɑ duɑ temɔ bɑ mɛn kpɛɛkpɛɛkun ɑsɑnsi giɑ,
sɑɑ yerɑ u koo mɑɑ Isirelin bweseru kpuro yinɑ kɔ̃sɑ ye bɑ kuɑn sɔ̃.
38 Wee sɑɑ yɑ sisi yè sɔɔ bɑ koo mɑn bɛɛrɛ wɛ̃ bu Yerusɑlɛmu bɑni sɑɑ Hɑnɑnɛɛlin di sere n kɑ dɑ wuun gbɑ̃rɑrun kɔnnɔwɔ ge bɑ mɔ̀ gɑni gɔmburun kɔnnɔ. 39 Kpɑ bu mɑɑ wɛ̃ɛ dɛmiɑmɑ min di bu yĩire bu kɑ dɑ Gɑrɛbun gungurɔ, kpɑ bu besirɑ bu dɑ sere Goɑtiɔ. 40 Wɔwɑ ye kpuro mi bɑ rɑ gonu sike kpɑ bu kubɑnu yɑri mi, kɑ gbeɑ ye yɑ wɑ̃ɑ berɑ mi sere n kɑ dɑ Sedoronin dɑɑrɔ, kɑ kɔnnɔ ge gɑ wɑ̃ɑ sɔ̃ɔ yɑri yeru giɑ, mìn di dumi yi rɑ kɑ du, yebɑ kpurowɑ yɑ ko n sɑ̃ɑ nɛ, Yinni Gusunɔgiɑ. Bɑ ǹ mɑɑ ye kɔsukumɔ sere kɑ bɑɑdommɑɔ.
<- Yeremi 30Yeremi 32 ->