1-2 Sinɑ boko Sedesiɑsi u Pɑsuri, Mɑɑkiyɑn bii, kɑ Sofoni, yɑ̃ku kowo Mɑseyɑn bii gɔrɑ Yeremin mi, bu nùn sɔ̃ bu nɛɛ, u bu bikiɑru kuo Yinni Gusunɔn mi, domi Nɛbukɑnɛsɑɑ, Bɑbilonin sinɑ boko, u kɑ bu tɑbu mɔ̀. Sɔrɔkudo Yinni Gusunɔ u koo nùn mɑɑmɑɑki gɑɑ kpɑre ben sɔ̃, kpɑ u wɑ u bu deri. Yerɑ Yinni Gusunɔ u kɑ Yeremi gɑri kuɑ.
3 Mɑ Yeremi u tɔn be wisɑ u nɛɛ, bu doo sinɑ boko Sedesiɑsin mi bu nɛɛ, 4 ɑmɛniwɑ Gusunɔ Isirelibɑn Yinni u geruɑ. U nɛɛ, wee, u koo de ben tɑbu kowo be bɑ kɑ Bɑbilonin sinɑ boko kɑ win tɔmbu sɑnnɑmɔ wuun biruɔ bu duki su bu wurɑ wuu ge sɔɔ. 5 Kpɑ wi, Gusunɔn tii u kɑ be Yudɑbɑ sɑnnɑ kɑ mɔru u bu win dɑm sɔ̃ɔsi, 6 u de bɑrɑ kɔ̃suru tu hunde konibɑ kpuro wɔri tu go wuu ge sɔɔ, tɔmbu kɑ yɑɑ sɑbenu. 7 Yen biruwɑ u koo sinɑ boko Sedesiɑsi, Nɛbukɑnɛsɑɑ nɔmu bɛriɑ, wi kɑ win sɔm kowobu kɑ win tɔn be bɑ wɑ̃ɑ wuu ge sɔɔ, be bɑ gesi yɑrɑ bɑrɑrun di, kɑ tɑbun di, kɑ gɔ̃ɔrun di. Be kpurowɑ Nɛbukɑnɛsɑɑ u koo go. U ǹ ben wɔnwɔndu mɔ̀. U ǹ mɑɑ goo derimɔ.
8 Wee ye Yinni Gusunɔ u mɑɑ Yeremi sɔ̃ɔwɑ win tɔmbun sɔ̃. U nɛɛ, wee, u bu swɑɑ yiru yiiyɑmmɛ, swɑɑ yèn mi wɑ̃ɑrɑ wɑ̃ɑ, kɑ yèn mi gɔɔ u wɑ̃ɑ. 9 Wi u koo gesi yɔ̃rɑ wuu ge sɔɔ, u koo gbiwɑ tɑbu sɔɔ, ǹ kun mɛ kɑ gɔ̃ɔru, ǹ kun mɛ kɑ bɑrɑru. Adɑmɑ wi u yɑrɑ u tii Bɑbilonigibu wɛ̃ be bɑ bu tɑrusi, yɛ̃ro koo win wɑ̃ɑru wɔrɑ. Teyɑ tɑ ko n sɑ̃ɑ win ɑrumɑni ye u kpĩɑ u yɑrɑ. 10 Domi u yɔ̃rɑriwɑ u wuu ge kɔ̃sɑ kuɑ, n ǹ mɔ geɑ. U koo gu Bɑbilonin sinɑ boko nɔmu sɔndiɑwɑ u gu dɔ̃ɔ mɛni.
Gɑri yi Yinni Gusunɔ
u Dɑfidin bweseru sɔ̃ɔwɑ
11 Yinni Gusunɔ u nɛɛ, ɑmɛniwɑ wunɛ Yeremi kɑɑ Yudɑbɑn sinɑ bokon bweseru sɔ̃. A nɛɛ,
