Yeremi 18

Yeremi u dɑ mɔmɔn yɛnuɔ

1 Yinni Gusunɔ u Yeremi sɔ̃ɔwɑ u nɛɛ, 2 ɑ seewo kpɑ ɑ dɑ mɔmɔn yɛnuɔ. Miyɑ kon nun gɑri sɔ̃.

3 Mɑ u seewɑ u dɑ mɔmɔn yɛnu mi. U deemɑ wee u wekeru mɔ̀. 4 Weke te u mɔ̀ mi, tɑ ǹ geɑ kue. Mɑ u ten sɔn te suɑ u kɑ weke kpɑɑru kuɑ te tɑ nùn wɛ̃re. 5 Yerɑ Yinni Gusunɔ u nɛɛ, 6 mbɑn sɔ̃nɑ nɑ ǹ kpɛ̃ n kɑ bɛɛ Isirelibɑ ko nge mɛ. Wee nge mɛ mɔmɔ wi, u sɔndu suɑ u nɛni win nɔmuɔ, nge mɛyɑ i mɑɑ wɑ̃ɑ nɛn nɔmuɔ. 7 Gɑsɔ, nɑ rɑ gere bweseru gɑrun sɔ̃ n nɛɛ, kon tu wukɑ n surɑ nge dɑ̃ɑ, kpɑ n tu kɑm koosiɑ. 8 Adɑmɑ bwese te, tɑ̀ n ten dɑɑ kɔsɑ tɑ nuku kɔ̃suru deri, nɑ rɑ tu deriwɑ nɑ kun mɑɑ tu kɔ̃sɑ kue. 9 Mɛyɑ gɑsɔ, nɑ rɑ mɑɑ gere bweseru gɑrun sɔ̃ n nɛɛ, kon tu seeyɑ. 10 Adɑmɑ bwese te, tɑ̀ n kɔ̃sɑ mɔ̀ mɑ tɑ ǹ nɛn gere swɑɑ sue, nɑ ku rɑ mɑɑ tu geɑ ye kue ye nɑ rɑɑ gɔ̃ru doke mi. 11 Yen sɔ̃, ɑ Yudɑbɑ kɑ Yerusɑlɛmugibu sɔ̃ɔwɔ ɑ nɛɛ, nɛ, Yinni Gusunɔ nɑ sɔɔru mɔ̀ n kɑ bu kɔ̃sɑ kuɑ. Nɑ yen kpunɑɑ yi. Ǹ n mɛn nɑ, ben bɑɑwure u win dɑɑ kɔ̃sɑ derio u wurɑmɑ nɛn mi.

12 Adɑmɑ bɑ koo gere bu nɛɛ, mbɑn sɔ̃nɑ bɑ koo kɔsi. Ben bɑɑwure u koo win bwisiku kɔ̃sunu swĩiwɑ u ko ye u kĩ.

Isirelibɑ bɑ Gusunɔ yinɑ

13 Yinni Gusunɔ u nɛɛ,

Isirelibɑ bɑ gɑ̃ɑ kɔ̃sunu kuɑ n sɑrɑ.

I bwesenu kpuro bikio,

wɑrɑ u yenin bweseru nɔɔre.

14 Nim mu rɑ kokubu kpe Libɑnin guunu wɔllun di?

Dɑɑ te tɑ kokumɔ,

tɑ rɑ nim gem kpe?

15 Adɑmɑ nɛn tɔmbu bɑ mɑn duɑri

bɑ dɑ bɑ bũnu turɑre dɔ̃ɔ dokeɑmmɛ.

Yɑ derɑ bɑ ǹ yɛ̃ ye bɑ mɔ̀ ben swɛɛ sɔɔ.

Bɑ ben yellun swɑɑ dosu derimɔ,

mɑ bɑ swɑɑ kisi swĩi.

16 Bɑ derɑ ben tem mu sɑnkirɑ.

Mɑ tɔmbu bɑ bu yɛ̃ɛmɔ bɑɑdommɑ.

Wi u sɑrɔ mi gesi, ù n mu wɑ,

u rɑ wiru kpɑrewɑ.

17 Yen sɔ̃nɑ kon de bu yɑrinɑ yibɛrɛbɑn wuswɑɑɔ

nge tuɑ ye sɔ̃ɔ yɑri yerun woo gɑ yɑrinɑsiɑ.

Kon bu biru kisi.

Nɑ ǹ bu mɛɛrimɔ sɑnɑm mɛ bɑ nɔni sɔ̃ɔre.

Bɑ nɔɔ tiɑ kuɑ

bu kɑ Yeremi mwɑ

18 Yerɑ tɔn be, bɑ nɛɛ, su Yeremi nɔɔ tiɑ kuɑ su nùn mwɑ. Domi woodɑ kun gbimɔ bɑɑ yɑ̃ku kowobu bɑ̀ kun wɑ̃ɑ. Bwisi kun kpeemɔ bɑɑ bwisigibu bɑ̀ kun wɑ̃ɑ. Gusunɔn gɑri kun gbimɔ yèn sɔ̃ win sɔmɔbɑ sɑri. Ǹ n mɛn nɑ, i nɑ su nùn wɔri su yɑɑ kɑsiki, kpɑ su ku mɑɑ win gɑri nɔ su sere yi lɑɑkɑri ko.

19 Sɑɑ yerɑ Yeremi u Yinni Gusunɔ kɑnɑ u nɛɛ,

Yinni Gusunɔ,

ɑ mɑn swɑɑ dɑkio.

A nɛn yibɛrɛbɑn gɑri yi nɔɔwɔ.

20 Kɑɑ de geɑ yu gɔsirɑ kɔ̃sɑ?

Wee bɑ dɔkɔ kpiriru gbɑ

bu kɑ mɑn kpɛ̃ɛ sɔɔ.

A yɑɑyo mɑ nɑ yɔ̃rɑ wunɛn wuswɑɑɔ ben sɔ̃,

nɑ kɑ nun gɑri kuɑ

kpɑ ɑ ku mɑɑ kɑ bu mɔru ko.

21 Yen sɔ̃, ɑ de gɔ̃ɔru tu ben bibu go.

A de bu gbisuku tɑbu sɔɔ,

kpɑ kurɔbu bu durɔbu kɑ bibu biɑ,

kpɑ bu ko gɔminibu.

A de bɑrɑnu nu durɔ be go,

kpɑ bu ben ɑluwɑɑsibɑ go tɑbu sɔɔ.

22 A de tɑbu kowo wuunu nu bu wɔri.

Kpɑ wuri yi nɔɔrɑ ben yɛnusɔ.

Domi bɑ dɔkɔ kpiriru gbɑ

bu kɑ mɑn kpɛ̃ɛ te sɔɔ.

Bɑ mɑn yinɑ bɛriɑ nɛn swɑɑ sɔɔ.

23 Adɑmɑ wunɛ, Yinni Gusunɔ,

ɑ ben nɔɔsinɑɑ kpuro yɛ̃,

ye bɑ kuɑ bu kɑ mɑn go.

Yen sɔ̃, ɑ ku bu ben torɑnu wɔkɑ.

A ku ben durum ye duɑri.

A de bu fukurɑ wunɛn wuswɑɑɔ.

A bu sɛɛyɑsio wunɛn mɔrun sɑɑ sɔɔ.

<- Yeremi 17 Yeremi 19 ->