10
Bũnu kɑ Yinni Gusunɔ
1 Bɛɛ Isirelibɑ, i swɑɑ dɑkio i nɔ ye Yinni Gusunɔ u bɛɛ sɔ̃ɔmɔ. U nɛɛ,
2 i ku bwese tukunun yirɑ swĩi.
I ku wururɑ wɔllun yĩre nin sɔ̃,
ni bwese tukunu nù n wɑ,
nu rɑ nɑnde.
3 Domi bwese nin sɑ̃ɑru tɑ sɑ̃ɑwɑ kɑm dirum.
Nu rɑ sewɑ nu dɑ dɑ̃ɑ sɔ̃ɔwɔ nu dɑ̃ɑ burɑ.
Kpɑ dɑ̃ɑ dɑ̃ko u kɑ ye bwɑ̃ɑroku ko.
4 Kpɑ bu gu burɑru kuɑ,
bu gu sii geesu kɑ wurɑ pote.
Kpɑ bu girɑ bu kulumbɑ kpɑre kɑ mɑtɑlɑkɑ,
gu ku kɑ wɔrumɑn sɔ̃.
5 Bwɑ̃ɑrokunu nu rɑ n sɑ̃ɑwɑ
nge nɑre ye bɑ rɑ ko gberɔ.
Nu ǹ gɑri mɔ̀, bɑ rɑ n nu sɔɔwɑwɑ,
domi nu ǹ kpɛ̃ nu kɑ tii sĩ.
Yen sɔ̃, i ku nin bɛrum ko.
Nu ǹ kpɛ̃ nu bɛɛ kɔ̃sɑ ǹ kun mɛ geɑ kuɑ.
6 Mɑ Yeremi u Gusunɔ siɑrɑ u nɛɛ,
Yinni Gusunɔ, ɑ kpɑ̃.
Goo sɑri wi u kɑ nun weenɛ.
Mɑ ɑ yĩsiru yɑrɑ wunɛn dɑm sɑɑbu.
7 Wunɑ ɑ sɑ̃ɑ bwesenu kpuron sinɑ boko.
Wɑrɑ u ǹ koo nun nɑsiɑ.
Wunɑ ɑ yiiko kpuro mɔ.
Bwesenu kpuron bwisigibu sɔɔ,
goo sɑri wi u kɑ nun weenɛ.
8 Be kpuro bɑ ǹ bwisi mɔ.
Ben yɛ̃ru tɑ sɑ̃ɑwɑ kɑm.
Domi dɑ̃rɑ bɑ rɑ dɑ̃ku bɑ n sɑ̃ɑmɔ.
9 Kpɑ bu tu sii geesu pote, si bɑ kɑ nɑ Tɑɑsisin di,
ǹ kun mɛ wurɑ ye yɑ wee Ufɑsin di,
kpɑ bu tu yɑbe gɑɑdurɑgiru kɑ wunɔmgiru sebusiɑ.
Yebɑ kpuro yɑ sɑ̃ɑwɑ tɔnun nɔmɑn sɔmburu.
10 Adɑmɑ wunɛ Yinni Gusunɔ,
ɑ sɑ̃ɑwɑ Yinni, wunɑ n weenɛ bu sɑ̃.
A wɑ̃ɑwɑ. Kɑɑ n mɑɑ bɑndu diiwɑ sere kɑ bɑɑdommɑɔ.
Wunɛn mɔru yɑ̀ n seewɑ,
tem mu rɑ yĩiriwɑ,
kpɑ bwesenu kpuro nu kpɑnɑ nu yɔ̃rɑ wunɛn wuswɑɑɔ.
11 Bɛɛ bwese tukunu, i swɑɑ dɑkio i nɔ, bɛɛn bũu ni, nu ǹ wɔllu kɑ tem tɑkɑ kue. Nin tii nu koo kɑm kowɑ mɑm mɑm.
12 Yinni Gusunɔwɑ u tem tɑkɑ kuɑ
kɑ win dɑm, kɑ win yɛ̃ru,
mɑ u wɔllu tɛriɑ kɑ win bwisi.
13 Wiyɑ u rɑ de bukɔ gu se wɔllɔ,
kpɑ u woo seeyɑmɑ sɑɑ gen wɑ̃ɑ yerun di,
kpɑ guru winu nu nim kpɑɑsinɑ,
kpɑ guru mɑɑkinu nu koorɑ, kpɑ gurɑ yu nɛ.
14 Tɔnu ù n ye kpuro mɛɛrɑ, u rɑ biti soorewɑ.
Sekuru tɑ rɑ mɑɑ sekobu mwɛwɑ
bɑ̀ n ben bwɑ̃ɑroku ni wɑ.
Domi nu ǹ kpɛ̃ nu ko mɛ, nu ǹ wɛ̃siɑru mɔ.
15 Bɑ nu kuɑwɑ bu kɑ tɔmbu nɔni wɔ̃ke.
Nu ǹ sɑ̃ɑ gɑ̃ɑnu. Nu koo kɑm ko sɔ̃ɔ teeru,
dɔmɑ te Yinni Gusunɔ u koo nu siri.
16 Gusunɔ, Isirelibɑn Yinni u ǹ sɑ̃ɑ nge ni.
Domi wiyɑ u kpuro tɑkɑ kuɑ.
Wiyɑ u sɑ̃ɑ win tɔmbun ɑrumɑni.
Win yĩsirɑ Gusunɔ, wɔllu kɑ tem Yinni.
Yerusɑlɛmun wɔrumɑɑ
yɑ turuku kuɑ
17 Yeremi u nɛɛ,
bɛɛ Yerusɑlɛmugibu, wee, yibɛrɛ bɑ bɛɛ tɑrusi.
I seewo i bɛɛn yɑ̃nu kpɑɑsinɑ.
18 Domi Yinni Gusunɔ u nɛɛ,
u koo de yibɛrɛ be, bu bɛɛ wɔri,
kpɑ bu bɛɛ gurɑ bu kɑ bɛɛ dɑ mi n tomɑ.
19 Yerusɑlɛmugibu bɑ wuri wɔri bɑ mɔ̀,
sɑ kɑm kuɑ. Wee, bɛsɛn bosu kpɛ̃ɑ,
bɛsɛn nɔni swɑ̃ɑrɑ bɑndɑ.
Sɑ rɑɑ nɛɛ, kɔ̃sɑ yɑ̀ n sun deemɑ,
sɑ ko kpĩ su ye mɑ.
20 Adɑmɑ bɛsɛn diɑ yɑ wɔrukɑ.
Yen wɛ̃ɛ kpuro kɑsikirɑ.
Mɑ bɑ bɛsɛn bibu gurɑ kpuro.
Goo sɑri wi u koo mɑɑ bɛsɛn wuu seeyɑ.
21 Yerɑ Yeremi u nɛɛ,
bɛɛn kpɑrobu bɑ kuɑ gɑri bɑkɑsu.
Bɑ ǹ Yinni Gusunɔ kɑsu.
Yen sɔ̃nɑ bɑ ǹ kuure,
mɑ bɛɛ kpuro i yɑrinɑ.
22 Wee dɑmu gɑgu gɑ nɔɔrɑmɔ.
Tɔn dɑbirɑ wee sɑɑ sɔ̃ɔ yɛ̃sɑn nɔm geu giɑn di,
bu kɑ Yudɑbɑn wusu kpeerɑsiɑ,
kpɑ su ko gbeeku bɔ̃nun wɑ̃ɑ yeru.
Yeremi u kɑnɑru mɔ̀
kɑ win tɔmbun yĩsiru
23 Yinni Gusunɔ, nɑ yɛ̃
mɑ tɔnu kun kpɛ̃ u win tii kpɑrɑ
nge mɛ n weenɛ.
Goo sɑri wi u koo kpĩ u win tii swɑɑ geɑ sure.
24 Yinni Gusunɔ, ɑ mɑn sɛɛyɑsio sɑkɑ sɔɔ,
n kun kɑ mɔru, kpɑ ɑ ku rɑ mɑn kɑm koosiɑ.
25 A wunɛn mɔru sureo
bwese ni nu ǹ nun mɛm nɔɔwɑmmɛn mi,
ni, ni nu ǹ nun sɑ̃ɑmɔ.
Domi nu wunɛn tɔmbu Yɑkɔbun bweseru kpeerɑsiɑmɔ,