1 Ma gbɛ̃nↄ, àsun kɛ yãdannɛrinↄ ũ dasiro, zaakũ á dↄ̃ kũ Luda ni wɛ́ piti ókↄ̃nↄ yãdannɛrinↄa yãkpatɛkɛgↄrↄ zĩ de gbɛ̃ kparanↄla. 2 Ó pínki odìgↄ̃ zã yãa baala'imɛ. Tó gbɛ̃ lɛ́ dì a ásaru kɛro, taarisaridemɛ, ani fↄ̃ à a mɛ̀ pínki gbãna fↄ̃. 3 Odì sↄ̃mↄ ká sↄ̃nɛ de à ó yã ma yãimɛ, akũ odì a milɛ ble. 4 Kesↄ̃ à gó'itɛ gwa ísirala. Bee kũ a zↄ̃kↄ̃kɛo kũ zàga'ĩa gbãna kũ àdi a yĩpao, a fĩbↄ de fítinlemɛ. Àkũ mɛ́ àdi a milɛ ble, akũ a fĩ̀rii dì a pↄyeina danɛ. 5 Lɛmɛ sↄ̃, nɛ́nɛ bi mɛ̀gu fítinlemɛ, akũ àdi ĩa dã kũ yã zↄ̃kↄ̃ↄo.

À gwa lákũ tɛ́ fíti dì sɛ̃̀ dasi kpáta nà. 6 Nɛ́nɛ de lán tɛ́ bàmɛ, àkũmɛ andunia vãni ũ ó mɛ̀ɛ gũn. Àdi tó gbãsĩ gↄ̃ kpá ó mɛ̀ɛa pínki. Gyãwãn tɛ́ mɛ́ àdi nakara nɛ́nɛa, akũ nɛ́nɛ dì tɛ́ kpá ó andunia kunan. 7 Bisãsiri nↄ̀bↄsɛ̃ntɛnↄ tùtuu kɛ̀ pínki kũ bãnↄ kũ pↄ́ kũ òdi táa o kũ kùaonↄ kũ kpↄ̀nↄ, à kpɛ́ àtɛn kɛ ari tera, 8 ama gbɛ̃ke dì fↄ̃ à a nɛ́nɛ tùtu kɛro. Àkũmɛ pↄ́ vãni kũ àdi zɛ tɛniro ũ. À pana kũ sɛwɛtɛ̃o, 9 nɛ́nɛn odì Dikiri ó De sáabu kpáo, akũ odì ɛra ò bisãsiri kũ à a kɛ̀ lán a bà káo dↄ. 10 Lɛ́dokↄ̃nↄ pìin sáabukpana kũ gbɛ̃kanaao dì bon. Ma gbɛ̃nↄ, àsungↄ̃ de lɛro. 11 Íboki dì í nna kũ í kyã̀kyãao bo wɛ̀ɛ dokↄ̃nↄ gũn yá? 12 Ma gbɛ̃nↄ, kaka lí ni nɛ́ i kù ũ yá? Geepi lí ni nɛ́ i kaka ũ yá? Lɛmɛ dↄ bia í sùkusukude ni í nna boro.

13 Á tɛ́, dí mɛ́ à yãdↄ̃ri ↄ̃ndↄ̃de ũu? À mↄńnɛ a kunna mana gũn kũ a yãkɛnanↄ kũ zĩdabusana kũ àdi bo ↄ̃ndↄ̃ gũnwo. 14 Tó á nɛ̀sɛgↄ̃ba pãsĩ kũ denlawɛtɛnaao vĩ á swɛ̃̀ɛ gũn sↄ̃, àsun ĩa dãro, àsun gí yãpurairo. 15 Ɔ̃ndↄ̃ bire taka dì bo musuro, andunia pↄ́mɛ, á dà pↄ́mɛ, Ibilisi pↄ́mɛ. 16 Zaakũ gu kũ nɛ̀sɛgↄ̃ba kũ denlawɛtɛnaao kún, gwen kↄ̃yãmasari kũ yã bɛ̃̀nɛ pínkio dìgↄ̃ kún. 17 Tó gbɛ̃ ↄ̃ndↄ̃ kũ àdi bo musu vĩ, káaku àdigↄ̃ gbãsĩ vĩro, a gbɛra àdigↄ̃ yãkete vĩro, àdi a zĩda busańnɛ, àdi gbɛ̃ yã ma, à sùru papana kũ yãmanakɛnaao. Àdi gbɛ̃ tɛ̃̀ boro, akũsↄ̃ àdigↄ̃ manafiki vĩro. 18 Ibɛrɛmidɛrii dì kɛna kũ kↄ̃o nna tↄ̃, akũ àdi yã mana kɛ̃.

<- YAMISI 2YAMISI 4 ->