EBERUNƆ 8

Yesumɛ ó Sa'oriki ũ

1 Yã kũ ótɛn o mìin dí: Ó sa'oriki bire taka vĩ vutɛna kíblegbaaa musu Luda zↄ̃kↄ̃de ↄplai. 2 Àdi zĩ kɛ Ludakukia, bizakuta yãpura kũ Dikiri dↄ̀n, adi kɛ pↄ́ kũ bisãsirinↄ dↄ̀nlo. 3 Zaakũ suna kũ gbanↄ kũ sa'onaao yãin òdi sa'oriki sĩnda pínki kái, à mana àpii gↄ̃ pↄ́ vĩ à kpá se. 4 Tó à kú andunia gũn, anigↄ̃ de sa'ori ũro, zaakũ sa'ori kũ òdi su kũ gbanↄ lákũ doka dìtɛ nànↄ kun kↄ̀. 5 Zĩ kũ òtɛn kɛ bi pↄ́ kũ à kú musu takamɛ, a ninimɛ. Abire yãi kũ Musa ye à bizakuta dↄ, Luda pìnɛ à laakari kɛ à pↄ́ kũ a a taka mↄ̀nɛ kpi musu kɛ lákũ à de nà pínki. 6 Yesu mɛ́ à Luda bàka kunna kũoo yãkɛkɛri ũ. Zaakũ Luda bàka kunna kũooo pì de a bàka kunna kũńwo zĩla, zĩ kũ ò dànɛ de sa'oriki pìnↄ pↄ́la. Luda bàka kunna kũooo pìi lɛ́sɛna de a zĩla dↄ. 7 Tó Luda bàka kunna kũńwo zĩ pì papanamɛ yã, de a plade zɛ́ vĩro. 8 Kũ Dikiri Isarailanↄ taari lè à pì:

A gↄrↄ tɛn su kũ mani ma bàka

kunna kũ Isarailanↄ kũ Yudanↄ dufu kɛ.

9 Anigↄ̃ de lán ma bàka kunna kũ ń dizinↄo

gↄrↄ kũ ma ń kũ ń ↄa ma ń bↄ́tɛ Misila bàro.

Zaakũ odi zɛ kũ ma bàka kunna kũńwoooro,

akũ ma ń tón.

10 Ma bàka kunna kũ Isarailanↄ gↄrↄ birenↄ gbɛra yãn dí:

Mani ma dokayãnↄ dańnɛ ń nɛ̀sɛn,

mani kɛ̃ ń swɛ̃̀ɛa.

Manigↄ̃ de ń Luda ũ,

onigↄ̃ de ma gbɛ̃nↄ ũ.

11 Ń gbɛ̃ke ni yã dada a dakenɛro,

ń gbɛ̃ke ni ma dↄ̃na da a gbɛ̃nɛro,

zaakũ ń pínki nigↄ̃ ma dↄ̃mɛ,

nɛ́ fíti gbɛ̃ zↄ̃kↄ̃ ń pínki.

12 Mani sùru kɛ kũńwo kũ ń taarinↄ,

mani ń durunnanↄ yã da doro.

13 Kũ Luda bàka kunna kũńwo dufu pì yã ò, à a káakupↄ zĩ bò. Pↄ́ kũ à zĩ kũ̀ à bùsa, a kpana gui zã̀ro.

<- EBERUNƆ 7 EBERUNƆ 9 ->