NAANAA 9

Luda bàka kunna kũ Nuhuo

1 Akũ Luda arubarikaa dà Nuhugu kũ a nɛ́nↄ à pìńnɛ: Àgↄ̃ nɛ́ i àgↄ̃ kara à andunia pa. 2 Nↄ̀bↄnↄ kũ bãnↄ kũ pↄ́ kũ òdi táa o kũ kùaonↄ kũ kpↄ̀nↄ nigↄ̃ á vĩna vĩ pínki. Ma ń náárɛ á ↄĩ. 3 Pↄ́ kũ òdi táa onↄ pínki nigↄ̃ de á pↄ́ble ũ. Ma ń kpááwa pínki lákũ ma pↄ́ble kũ òdi butɛ zĩtɛanↄ kpàáwa nà yã. 4 Ama àsun nↄ̀bↄ kũ odi a kùtu kpáro sóro, zaakũ a arumɛ a wɛ̃̀ndi ũ. 5 Mani á aru kũ à de á wɛ̃̀ndi ũ fĩna boárɛ. Tó nↄ̀bↄ gbɛ̃ dɛ̀ ke tó gbɛ̃ a gbɛ̃dake dɛ̀, mani a aru fĩna bonɛ. Mani fĩna bo gbɛ̃ kũ à a gbɛ̃dake dɛ̀ɛa. 6 Tó gbɛ̃ a gbɛ̃dake dɛ̀, oni a dɛ, zaakũ ma bisãsiri kɛ̀ ma taka ũmɛ. 7 Àgↄ̃ nɛ́ i àgↄ̃ kara, à da anduniala àgↄ̃ kɛ dasi.

8 Luda pì Nuhunɛ kũ a nɛ́nↄ dↄ: 9 Ma bàka nigↄ̃ kú kãáo kũ á burinↄ 10 kũ pↄ́ wɛ̃̀ndide kũ ò kú kãáo kũ ò bò gó gũnnↄ pínki, bãnↄ kũ bɛ pↄ́kãdenↄ kũ nↄ̀bↄsɛ̃ntɛnↄ kũ pↄ́ kũ ò kú zĩtɛanↄ pínki. 11 Ma bàka nigↄ̃ kú kãáo. Mani í da anduniala mà pↄ́ wɛ̃̀ndidenↄ kakatɛ pínki doro. Í ni da anduniala à a kakatɛ doro. 12 Akũ Luda ɛ̀ra à pì: Ma bàka nigↄ̃ kú kãáo kũ pↄ́ wɛ̃̀ndide kũ ò kú kãáonↄ ari gↄrↄ sĩnda pínkimɛ. A sèedaan dí. 13 Mani ludambɛfɛ̃nɛda bo legũa ma bàka kunna kũ anduniao sèeda ũ. 14 Tó ma tò legũ sìsi ludambɛfɛ̃nɛda bòa, 15 lákũ ma bàka kú kãáo nà kũ pↄ́ wɛ̃̀ndide buri sĩnda pínkio, a yã ni dↄmagu. Mani tó í da anduniala à pↄ́ wɛ̃̀ndide kakatɛ pínki doro. 16 Tó ma ludambɛfɛ̃nɛda è legũa, ma bàka kunna kũ pↄ́ wɛ̃̀ndide buri sĩnda pínkio ari gↄrↄ sĩnda pínki yã ni dↄmagu. 17 Akũ Luda pì Nuhunɛ: Ma bàka kunna kũ pↄ́ wɛ̃̀ndide kũ ò kú andunia gũnnↄ pínki sèedaan gwe.

Nuhu nɛ́nↄ

18 Nuhu nɛ́ kũ ò bↄ̀tɛ gó gũnnↄ tↄ́n dí: Sɛmu, Hamu, Yafɛti. Hamumɛ Kanaa de ũ. 19 Nuhu nɛ́nↄn gwe gbɛ̃nↄn aakↄ̃. Ń burinↄ mɛ́ ò dàgula andunia gũn pínki.

20 Nuhu bi búbariimɛ, akũ à geepi líkpɛ bà. 21 Kũ à sèwɛ̃ mì à kã̀, akũ a wutɛna pótompo a kpɛ́n. 22 Kũ Kanaa de Hamu a de pótompo è, à bò à gɛ̀ɛ à ò Sɛmunɛ kũ Yafɛtio. 23 Akũ Sɛmu kũ Yafɛtio uta zↄ̃kↄ̃ↄ sɛ̀ ò dì ń gã̀aa ń pla ò táa ò kũ kpɛo. Ń arɛ dↄna gu pãndea de òsun ń de pótompo ero yãi, ò gɛ̀ɛ ò kù ń de pótompola. 24 Kũ wɛ̃ wère Nuhua à vù, à mà lákũ a nɛ́ kpɛde kɛ̀arɛ nà, 25 akũ à pì:

Kanaa nigↄ̃ láari pↄ́ ũmɛ,

àkũ mɛ́ anigↄ̃ a gbɛ̃nↄ zↄ̀ kpɛde ũ.

26 Akũ à pì:

Arubarikademɛ Dikiri, Sɛmu Luda ũ,

Kanaa nigↄ̃ de Sɛmu zↄ̀ ũ.

27 Luda karana kɛ Yafɛtinɛ,

a burinↄ ń baka le Sɛmu burinↄ arubarikaa gũn,

Kanaa nigↄ̃ de Yafɛti zↄ̀ ũ.

28 Í dana anduniala gbɛra Nuhu kɛ̀ wɛ̃̀ wàa do kpɛ́ basuppla akuri. 29 À kɛ̀ wɛ̃̀ wàa siikↄ̃ kpɛ́ basuppla akuri, akũ à gà.

<- NAANAA 8 NAANAA 10 ->