NAANAA 46

Yakubu tana Misila kũ a nɛ́nↄ

1 Isaraila dà zɛ́n kũ pↄ́ kũ a vĩnↄ pínki. Kũ à kà Bɛsɛba, à sa ò a de Isaaku Ludaa. 2 Akũ Luda bò à sùa wɛ́gupu'enaa gũn gwãani à pì: Yakubu! Yakubu! À wèa à pì: Makũ di! 3 Akũ à pì: Makũmɛ Luda ũ n de Luda. Ǹsun Misila gɛna damu kɛro, zaakũ gwen mani n buri karan manamana. 4 Mani gɛ́ kũnwo Misila mà ɛra mà su kũ n burinↄ. Yusufu gbádan ĩni gan.

5 Akũ Yakubu fùtɛ Bɛsɛba. A nɛ́nↄ a dà zùgo kũ Firi'auna gbàrɛ ò a sɛ́onↄ gũn kũ ń nɛ́nↄ kũ ń nanↄnↄo. 6 Ò ń pↄ́kãdenↄ kũ aruzɛkɛ kũ ò lè Kanaanↄ bùsunnↄ sɛ̀tɛ ò tào Misila. 7 Yakubu tà gwe kũ a nɛ́gↄ̃gbɛ̃nↄ kũ a nɛ́nↄgbɛ̃nↄ kũ a daikorenↄ ń pínki. 8 Isaraila kũ ò tà Misilanↄ tↄ́nↄn dí, Yakubu kũ a burinↄ:

Yakubu daudu Rubɛni. 9 Rubɛni nɛ́gↄ̃gbɛ̃nↄ Anↄku, Palu, Ɛzɛrↄnu kũ Kaamio. 10 Simɛↄ nɛ́gↄ̃gbɛ̃nↄ Yemuɛli, Yami, Oada, Yakĩ, Zoa kũ Sauluo kũ à a ì kũ Kanaa nↄgbɛ̃o. 11 Levi nɛ́gↄ̃gbɛ̃nↄ Gɛsↄmu, Koa kũ Mɛrario. 12 Yuda nɛ́gↄ̃gbɛ̃nↄ Ɛɛ, Ona, Sela, Pɛrɛzi kũ Zɛrao, ama Ɛɛ kũ Onao gà Kanaamɛ. Pɛrɛzi nɛ́gↄ̃gbɛ̃nↄ Ɛzɛrↄnu kũ Amuluo. 13 Isaka nɛ́gↄ̃gbɛ̃nↄ Tola, Pua, Yasubu kũ Simirↄnuo. 14 Zɛbuluni nɛ́gↄ̃gbɛ̃nↄ Sɛrɛdi, Ɛlↄni kũ Yalɛlio. 15 Nɛ́gↄ̃gbɛ̃ kũ Lea ń í kũ Yakubuo Mɛsↄpↄtamianↄn gwe. Àkũ mɛ́ à a nɛ́nↄgbɛ̃ Dina ì dↄ. Ń buri pìnↄ ń pínki gbɛ̃nↄn baraakuri awɛɛ'aakↄ̃mɛ.

16 Gada nɛ́gↄ̃gbɛ̃nↄ Zɛfↄ̃, Agi, Suni, Ɛzɛbↄ̃, Eri, Arodi kũ Arɛlio. 17 Asa nɛ́gↄ̃gbɛ̃nↄ Imina, Isiva, Isivi, Bɛria kũ ń dãre Sɛrao. Bɛria nɛ́gↄ̃gbɛ̃nↄ Eberu kũ Malakiɛlio. 18 Labã mɛ́ à Zilipa kpà Leaa. Buri kũ Zilipa kɛ̀ kũ Yakubuon gwe. Ò gbɛ̃nↄn gɛ̃ro awɛɛdomɛ.

19 Yakubu nanↄ Rahila nɛ́gↄ̃gbɛ̃nↄ Yusufu kũ Biliaminuo. 20 Yusufu Manase kũ Ɛflaimuo ì Misila kũ a nanↄ Asɛna, Ɛliↄpↄli sa'ori Potifɛra nɛ́o. 21 Biliaminu nɛ́gↄ̃gbɛ̃nↄ Bɛla, Bɛkɛ, Asabɛli, Gera, Naama, Ɛhi, Rosu, Mupimu, Upimu kũ Adao. 22 Buri kũ Rahila kɛ̀ kũ Yakubuonↄn gwe. Ò gbɛ̃nↄn gɛ̃ro donsarimɛ.

23 Dã nɛ́gↄ̃gbɛ̃ Usimu. 24 Nafatali nɛ́gↄ̃gbɛ̃nↄ Yaziɛli, Guni, Yɛzɛ kũ Silɛmuo. 25 Labã mɛ́ à Bila kpà Rahilaa. Buri kũ Bila kɛ̀ kũ Yakubuonↄn gwe. Ò gbɛ̃nↄn supplamɛ.

26 Yakubu buri kũ ò tà kũńwo Misilanↄn gwe. Ò gbɛ̃nↄn baaakↄ̃ awɛɛsuddomɛ a nɛ́ nↄnↄ baasi. 27 Kũ Yusufu nɛ́ ì Misila gbɛ̃nↄn pla, akũ Yakubu buri kũ ò tà gwenↄ kɛ̀ gbɛ̃nↄn baaakↄ̃ akuri.

28 Yakubu Yuda zĩ̀ à donɛ arɛ Yusufu kĩnaa de à Gosɛ̃ bùsu zɛ́ mↄnɛ. Kũ ò kà gwe, 29 akũ Yusufu gɛ̃̀ a sↄ̃gon à gɛ̀ɛ da a delɛ gwe. Kũ à a lè, à mlɛ̃̀a à ↄ́ↄ dↄ̀ à gìi kɛ̀. 30 Akũ Isaraila pì Yusufunɛ: Lákũ ma wɛ́ sìnlɛ nà ma è ń kú wɛ̃̀ndiio, ga ni fↄ̃ à ma sɛ́ sà.

31 Yusufu pì a vĩ̀ninↄnɛ kũ a de bedenↄ: Mani gɛ́ mà o Firi'aunanɛ ma vĩ̀ninↄ kũ ma de bede kũ ò kú Kanaanↄ bùsunnↄ sù ma kĩnaa. 32 Mani onɛ kũ sãdãrinↄmɛ á ũ, á pↄ́kãdenↄ vĩ, akũ a su kũ á sãnↄ kũ á blènↄ kũ á zùnↄ kũ pↄ́ kũ á vĩnↄ pínki. 33 Tó Firi'auna á sísi, akũ à á lá bↄ́ zĩn adì kɛ, 34 à onɛ à pi á pↄ́kãdedenↄ ũ zaa á kɛfɛnnakɛgↄrↄa ari kũ a gbãrao lán á dizinↄ bà. Tó a ònɛ lɛ, áni le à vutɛ Gosɛ̃ bùsun, zaakũ Misilanↄ dì kakara kũ sãdãrinↄro.

<- NAANAA 45 NAANAA 47 ->