1 Nà pãsĩ kũ̀ Kanaanↄ bùsun. 2 Kũ ò pↄ́blewɛ kũ ò bòo Misila blè ò làka, ń de pìńnɛ: À ɛra à gɛ́ pↄ́blewɛ lú fíti dↄ. 3 Akũ Yuda pìnɛ: Gↄ̃gbɛ̃ pìi òwɛrɛ sãnsãmmɛ à pì, tó ó dakũna kú kũooro, óni wɛ́ sikↄ̃lɛro. 4 Tó ĩni we ó dakũna gɛ́ kũoo, óni gɛ́ ò pↄ́blewɛ lúnnɛ. 5 Tó ńdi we sↄ̃ro, óni gɛ́ro, zaakũ gbɛ̃ pìi òwɛrɛ, tó ó dakũna kú kũooro, óni wɛ́ sikↄ̃lɛro. 6 Akũ Isaraila pì: Bↄ́ yã mɛ́ à tò a wari dↄ̀ma, kũ a ò gbɛ̃ pìinɛ á dakũna vĩi? 7 Ò wèa ò pì: Àkũ mɛ́ à yã gbɛ̀kawá kũ ó bedenↄ yão à pì: Á de kun ari tera yá? Á dakũna vĩ yá? Yã birenↄ musun o wea. Ó dↄ̃ yã ani pi ò su kũ ó dakũnaon yá? 8 Akũ Yuda pì a denɛ: Ǹ tó nɛ́ pì gɛ́ kũmao. Óni futɛ ò gɛ́ gↄ̃̀nↄmɛ, de ókↄ̃nↄ kũ mↄkↄ̃nwo kũ ó nɛ́nↄ òsun gagaro yãi, ónigↄ̃ kun aafia. 9 À gↄ̃̀ ma yã ũmɛ. Ma a zĩda wɛ̃̀ndii dìtɛ a pↄ́ gɛ̃nɛ ũ. Tó mádi su kãaonnɛ aafiaro, ma gↄ̃ n taaride ũmɛ. 10 Tó ódi sika kɛ yãro, de o gɛ kũ gɛ̃̀n pladeo o su. 11 Akũ ń de pìńnɛ: Tó lɛmɛ, à yã díkĩna kɛ. À ó bùsu pↄ́ mananↄ sɛ́tɛ à ká á asasanↄ gũn à gɛ́ à gↄ̃gbɛ̃ pì gba. À lí'ↄ ɛzɛ sɛ́ fíti kũ zↄ́'io fíti kũ do pↄ́nↄ kũ lí'ↄ gbĩ nnannao kũ gↄ̀rↄↄo kũ sĩo. 12 À gɛ́ kũ ↄgↄo lɛu pla à ↄgↄ kũ ò dàárɛ á asasanↄ gũn ɛrańnɛ. Ke ò sã̀tɛn yá, á dↄ̃ro. 13 À á dakũna sɛ́ à ɛra à gɛ́ gↄ̃gbɛ̃ pì kĩnaa. 14 Luda Gbãnasĩndapinkide tó gbɛ̃ pì á wɛ̃nda gwa à á gbɛ̃ndo kũ Biliaminuo gbarɛ ò su kãáo. Makũ sↄ̃, tó Luda ma nɛ́nↄ sìmamɛ, à sìman gwe.

15 Ò pↄ́ kũ oni gɛ́ ò a gba pìnↄ sɛ̀tɛ kũ ↄgↄo lɛu pla kũ Biliaminuo ò fùtɛ ò gɛ̀ɛ Misila, akũ ò gɛ̀ɛ Yusufu kĩnaa. 16 Kũ Yusufu Biliaminu è ń tɛ́, à pì a bɛgwariinɛ: Ǹ gɛ́ kũ gbɛ̃ birenↄ ma bɛa. Ǹ nↄ̀bↄ dɛ ǹ kɛkɛ, zaakũ gbɛ̃ pìnↄ ni pↄ́ ble kũmao fãnantɛ̃aramɛ. 17 Bɛgwarii pì yã kũ Yusufu dànɛɛ kɛ̀ à gɛ̀ɛ kũńwo a bɛa. 18 Kũ òtɛn gɛ́ kũńwo Yusufu bɛa lɛ, vĩna ń kũ ò pì: Ɔgↄ kũ ò dà ó asasanↄ gũn yã mɛ́ à tò òtɛn su kũoo la. Ò ye ò lɛ́tɛwá ò gbãna mↄwɛrɛ ò ó kũkũ zↄ̀nↄ ũ ò ó zaakinↄ sɛ́tɛmɛ. 19 Kũ ò kà Yusufu bɛ kpɛ́lɛlɛa, ò nà a bɛgwarii pìii ò pì: 20 Mare, n yã nna! O su ò pↄ́blewɛ lú la yã káaku. 21 Kũ o ka gu kũ óni in, o ó asasanↄ pòro, akũ ó baadi a ↄgↄ lè a asasa lɛ́n papana. Akũ o su kũ ↄgↄ pìio ó ↄĩ. 22 O su kũ ↄgↄ pãndeo de ò pↄ́ble pãnde lúo. Ó dↄ̃ gbɛ̃ kũ à ↄgↄ pìi dà ó asasanↄ gũnlo. 23 Bɛgwarii pìi pì: Àsun damu kɛro, àsun vĩna kɛro. Á Luda, á de Luda mɛ́ à ↄgↄ pìi dàárɛ á asasanↄ gũn. Á ↄgↄ ma ki lè. Akũ à Simɛↄ bòńnɛ. 24 Bɛgwarii pìi gɛ̃̀ kũńwo Yusufu ↄnn, à í kpàḿma ò zú oo, akũ à sɛ̃̀ɛ kpà ń zaakinↄa. 25 Akũ ò pↄ́ kũ oni Yusufu gba pì yã kɛ̀kɛ ari àgↄ̃ gɛ́ su fãnantɛ̃, zaakũ ò mà oni pↄ́ ble a bɛamɛ.

26 Kũ Yusufu sù bɛ, ò a gbà pↄ́ kũ ò sùoo pìnↄ ò wùtɛ zĩtɛ a arɛ. 27 À ń aafiaa gbɛ̀ka, akũ à pì: Á de zĩkũna kũ a a yã òo pì gbãna yá? À kú kũ wɛ̃̀ndiio yá? 28 Ò wèa ò pì: Ó de n zↄ̀bleri gbãna à kun ari tera. Akũ ò kùtɛnɛ ò arɛ pɛ̀tɛ zĩtɛ. 29 Yusufu wɛ́ sɛ̀ à a dakũna dadokↄ̃nↄde Biliaminu gwà à pì: Á dakũna kũ a a yã òmɛnɛ pìin dí yá? Akũ à pì Biliaminunɛ: Luda arubarika dangu. 30 Kũ à a dakũna gwà, a pↄ kɛ̀ nna zↄ̃kↄ̃ à ye à ↄ́ↄ dↄ, akũ à gɛ̃̀ kpɛ́nɛn likalika à ↄ́ↄ dↄ̀ gwe. 31 Kũ à ãnn pìpi, akũ à bò à a zĩda kũ̀ à pì ò su kũ pↄ́bleo.

32 Ò pↄ́ble dìtɛnɛ ado, ń pↄ́ sↄ̃ adona, Misila kũ ò kú kãaonↄ pↄ́ adona dↄ, zaakũ Misilanↄ dì pↄ́ ble kũ Eberunↄro òdi kakara kũńworo. 33 Ò ń vútɛvutɛ a arɛ ń sárakɛa, zaa dauduua ari ń gbɛ̃ kpɛdea, akũ ò lɛ́ àtɛ ò kↄ̃ gwàgwa. 34 Akũ ò pↄ́ble kũ à kú Yusufu arɛ kpàatɛtɛńnɛ. Biliaminu pↄ́ zↄ̃kↄ̃ de gbɛ̃ kparanↄ pↄ́la lɛu sↄↄro. Akũ ò pↄ́ blè ò í mì kũ Yusufuo ari ò kã̀.

<- NAANAA 42NAANAA 44 ->