NAANAA 3

Bisãsiri kɛ̃kↄ̃ana kũ Ludao

1 Mlɛ̃̀ mɛ́ à manafiki vĩ de pↄ́ kũ Dikiri Luda kɛ̀nↄla pínki, akũ à nↄgbɛ̃ là à pì: Luda pì àsun dàkoo pì lí ke nɛ́ blenloo? 2 Akũ nↄgbɛ̃ wè mlɛ̃̀ɛ pìia à pì: Óni fↄ̃ ò dàkoo pì línɛ ble, 3 ama lí kũ à kú dàkoo pìi guragura, Luda pì òsun a nɛ́ blero òsun ↄ naa sero, de òsun garo yãi. 4 Akũ mlɛ̃̀ɛ pìnɛ: Áni garo fá! 5 Zaakũ Luda dↄ̃ tó a blè, á wɛ́ ni kɛ̃ áni gↄ̃ lán a bà, ánigↄ̃ a mana dↄ̃ kũ a vãnio.

6 Kũ nↄgbɛ̃ è lí pì nɛ́ mana, akũsↄ̃ a blena nigↄ̃ nna ani tó gbɛ̃ wɛ́ kɛ̃, akũ à a nɛ́ kɛ̃̀ à blè. À kpà a zãa dↄ, akũ à blè se. 7 Ń pla ń pínki ń wɛ́ kɛ̃̀, akũ ò dↄ̃̀ sà kũ ò kun pótompo. Akũ ò gboroda lá nàbi ò yĩ̀ḿma.

8 Kũ gↄ̃gbɛ̃ kũ a nanↄo Dikiri Luda kĩni mà àtɛn kure dàkoo pìi gũn ↄkↄsi, akũ ò ùtɛnɛ dàkoo pì lán. 9 Akũ Dikiri Luda lɛ́ zù gↄ̃gbɛ̃i à pì: Ń kú mámɛɛ? 10 À wèa à pì: Kũ ma n kĩni mà, akũ vĩna ma kũ kũ má kun pótompo yãi, akũ ma utɛ. 11 Akũ Dikiri Luda a là à pì: Dí mɛ́ à ònnɛ ń kun pótompoo? Lí kũ ma ginnɛ ǹ a nɛ́ ble, n blèn yá? 12 À wèa à pì: Nↄgbɛ̃ kũ n kpàma àgↄ̃ kú kũmao mɛ́ à lí pì nɛ́ kpàma ma blè. 13 Akũ Dikiri Luda nↄgbɛ̃ là à pì: Bↄ́yãi n kɛ̀ lɛɛ? À wèa à pì: Mlɛ̃̀ mɛ́ à ma kɛkɛ, akũ ma blè. 14 Akũ Dikiri Luda pì mlɛ̃̀ɛnɛ:

Kũ n kɛ̀ lɛ, ĩnigↄ̃ láaribona pↄ́ ũ

de bɛ pↄ́kãdenↄ kũ nↄ̀bↄsɛ̃ntɛnↄla pínki,

ĩnigↄ̃ táa o n kùua,

bùsutitin ĩnigↄ̃ ble ari n wɛ̃̀ndi lɛ́n.

15 Mani ibɛrɛ da mↄkↄ̃n kũ nↄgbɛ̃o dagura,

n buri kũ a burio dagura.

A buri ni n mì wí,

ĩni a gbátoki kĩnna.

16 Akũ à pì nↄgbɛ̃nɛ:

Mani n nↄ̀sinaa wari karannɛ,

ĩnigↄ̃ nɛ́ i kũ wãwão.

N zã ni nigↄ̃ kúmmamɛ,

anigↄ̃ kí ble n musu.

17 Akũ à pì gↄ̃gbɛ̃nɛ:

Lákũ n n nanↄ yã mà nà,

lí kũ ma ginnɛ ǹ a nɛ́ ble n blè,

ma láari bò zĩtɛa n yãi,

ↄsi kũ ↄsioon ĩnigↄ̃ pↄ́ble en

ari n wɛ̃̀ndi lɛ́n.

18 Ani lɛ̀nↄ kũ lá ũkãdenↄ butɛnnɛ,

gbasa ǹ burapↄnↄ ble.

19 Ísimmawaranaa gũnn ĩni pↄ́ble en

ari ǹ ɛra ǹ gɛ̃o bùsun,

zaakũ gwen ma n bon.

Bùsutitimɛ n ũ,

ĩni ɛra ǹ gↄ̃ bùsutiti pìi ũmɛ.

20 Adamu tↄ́ kpà a nanↄnɛ Awau, zaakũ gbɛ̃ pínki daimɛ. 21 Dikiri Luda bára uta kɛ̀ Adamunɛ kũ a nanↄo, akũ à dàńnɛ. 22 Akũ à pì: Bisãsiri a mana kũ a vãnio dↄ̃̀ sà, à gↄ̃̀ lán ó bà. Óni gínɛ à lí wɛ̃̀ndide nɛ́ kɛ̃ à ble de àsungↄ̃ kun gↄrↄ sĩnda pínkiro yãi. 23 Akũ Dikiri Luda pɛ̀a à a bò Ɛdɛni dàkoo pìi gũn. Akũ Adamu gɛ̀ɛ à zĩtɛ kũ Luda a bòn zĩ kɛ. 24 Kũ Dikiri Luda pɛ̀a, akũ à kɛrubunↄ kàtɛ Ɛdɛni dàko ifãboki kpa, de ògↄ̃ lí wɛ̃̀ndide zɛ́ dãkpã kũ fɛ̃nɛda kũ àtɛn tɛ́ kɛ àtɛn litɛlitɛo.

<- NAANAA 2 NAANAA 4 ->