NAANAA 20

Ibrahĩ kũ Abimɛlɛkio

1 Akũ Ibrahĩ fùtɛ gwe à gɛ̀ɛ Nɛgɛvi bùsun Kadɛsi kũ Suruo dagura. Kũ à gɛ̀ɛ à vùtɛ Gera, 2 à pì a nanↄ Sara bi a dãremɛ, akũ Gera kína Abimɛlɛki gbɛ̃ zĩ̀ à a sɛ̀ à sù kãao. 3 Akũ Luda bò à sù Abimɛlɛkia nana gũn gwãani à pìnɛ: Ĩni ga nↄ kũ n sɛ̀ɛ pì yãi, zaakũ nↄzãremɛ. 4 À sù à lè Abimɛlɛki dí wútɛ kãao kↄ̀ro, akũ à pì: Dikiri, ĩni buri kũ odi yãke kɛronↄ dɛdɛn yá? 5 Àkũ mɛ́ à pìmɛnɛ a dãrenloo? Nↄgbɛ̃ pì sↄ̃ à pì a dãgↄ̃mɛ. Ma yã kɛ̀ a zɛ́amɛ, má taari vĩro. 6 Akũ Luda pìnɛ nana pìi gũn: Ee, má dↄ̃ kũ n yã kɛ̀ a zɛ́amɛ. A yã mɛ́ à tò, ma kpannɛ ǹ durunna kɛmɛnɛ, mádi we n ↄ nà nↄgbɛ̃ pìiaro. 7 Tera sà, à gↄ̃gbɛ̃ pì nↄ kpáa, zaakũ annabiimɛ. Ani adua kɛnnɛ de ǹ gↄ̃ aafia. Tó ńdi a nↄ pì kpáa sↄ̃ro, ǹgↄ̃ dↄ̃ kũ n gamɛ, mↄkↄ̃n kũ n gbɛ̃nↄ á pínki.

8 Akũ Abimɛlɛki fùtɛ kↄnkↄkↄnkↄ, à a gbɛ̃nↄ sìsi à yã pì bàbańnɛ ń pínki, akũ vĩna ń kũ manamana. 9 Akũ Abimɛlɛki Ibrahĩ sìsi à pìnɛ: Bↄ́yãi n kɛ̀wɛrɛ lɛɛ? Bↄ́ taarin ma kɛ̀nnɛ gbasa n tò ma gↄ̃ durunnade ũ kũ ma bùsuuo? N yã kũ à de ò kɛro kɛ̀mɛnɛ. 10 Bↄ́ laasun n lɛ̀ gbasa n yã pìi kɛ̀ɛ? 11 Ibrahĩ wèa à pì: Matɛn da yã gbɛ̃ke Luda vĩna vĩ bùsu díkĩna gũnlo, oni ma dɛ ma nanↄ yãimɛ. 12 Abire gbɛra nↄgbɛ̃ pì bi ma dãremɛ yãpura. Ó de dokↄ̃nↄmɛ, baadi kũ a dao, akũ à gↄ̃̀ ma nↄ ũ. 13 Kũ Luda ma bo ma de bɛa yã, matɛn likara, akũ ma pì ma nↄ pìinɛ gu kũ óni gɛ́n pínki, à gbɛ̃kɛ kɛmɛnɛ àgↄ̃ pi a dãgↄ̃n ma ũ. 14 Akũ Abimɛlɛki sù kũ sãnↄ kũ zùnↄ kũ gↄ̃gbɛ̃ zĩkɛrinↄ kũ nↄgbɛ̃ zĩkɛrinↄ à kpà Ibrahĩa, akũ à a nanↄ ɛ̀ranɛ. 15 Akũ Abimɛlɛki pì: Ma bùsun dí, ǹ vutɛ gu kũ ń yein. 16 Akũ à pì Saranɛ: Ma andurufu ↄgↄ wàa sↄↄro kpà n dãgↄ̃a kútɛkɛbↄ ũ, de gbɛ̃ kũ ò kú kũnwonↄ dↄ̃ ń pínki kũ ńdi taari kɛro. 17 Akũ Ibrahĩ wɛ́ kɛ̀ Ludaa, akũ Luda Abimɛlɛki gbà aafia kũ a nanↄo kũ a nↄ yìgisaridenↄ, de ò nɛ́ i, 18 zaakũ Dikiri tò Abimɛlɛki bɛ nↄgbɛ̃nↄ para kũ̀ yã Ibrahĩ nanↄ yã musu.

<- NAANAA 19 NAANAA 21 ->