1 Ákↄ̃nↄ Galatia yↄ̃nkↄnↄ! Ò pↄ́ dàáwan yá? O Yesu Kirisi gana lía mↄ̀árɛ a è sãnsãn. 2 Má ye mà yã mɛ̀n do gbɛkaáwa. A Luda Nini lè dokakũna yãin yá, ke yã kũ a màa pì náanikɛna yãimɛ? 3 À kɛ̀ dera a gↄ̃ yↄ̃nkↄnↄ ũ lán dí bàa? A naa kũ Luda Nini gbãnao, akũ átɛn láka kũ á zĩda gbãnao yá? 4 Á wari zↄ̃kↄ̃ↄ kɛ̀ pãn yá? Oi, adi kɛ pãro. 5 Luda a Nini kpàáwa, à daboyãnↄ kɛ̀ á tɛ́ á dokakũna yãin yá, ke yã kũ a màa pì náanikɛna yãimɛ?

6 À gwa Ibrahĩa. À Luda náani kɛ̀, akũ Luda tò yã bò kãao nna a náani kũ à kɛ̀ yãi.*fNaa 15:6, Rom 4:3* 7 Àgↄ̃ dↄ̃ kũ gbɛ̃ kũ òtɛn Luda náani kɛnↄ mɛ́ ò Ibrahĩ burinↄ ũ.*fRom 4:16* 8 Luda yã takada gĩnakɛ à a baaruu kpà Ibrahĩnɛ à pì, Luda ni arubarika da buri sĩnda pínkigu a gãi,*fNaa 12:3* zaakũ Luda yã takada pì gĩnakɛ à dↄ̃ kũ Luda ni tó yã bo nna kũ buri pãndenↄ a náani kũ oni kɛ yãi. 9 Lɛn Luda dì arubarika da gbɛ̃ kũ òtɛni a náani kɛnↄgu lɛ, lákũ à kɛ̀ a náanikɛri Ibrahĩnɛ nà. 10 Gbɛ̃ kũ à zɛ̀ kũ dokakũnaao gↄ̃̀ láari pↄ́ ũmɛ, zaakũ à kɛ̃na Luda yãn ò pì, gbɛ̃ kũ òdigↄ̃ yã kũ ò kú doka takada gũnnↄ kũna pínki a zɛ́aro bi láari pↄ́mɛ. 11 Ó dↄ̃ sãnsãn kũ Luda dì tó yã bò kũńwo nna dokakũna yãiro, zaakũ ò pì, gbɛ̃ kũ Luda tò yã bò kãao nna a náani kũ àtɛn kɛ yãi mɛ́ anigↄ̃ kun. 12 Doka dí kↄ̃ le kũ ludanaanikɛnaaoro, zaakũ ò pì, gbɛ̃ kũ à yã pìi kɛ̀ɛ, ade ni wɛ̃̀ndi le a gũn. 13 Kirisi gↄ̃̀ láari pↄ́ ũ ó gɛ̃nɛ ũ, à ó bó doka láari gũn, zaakũ à kɛ̃na Luda yãn ò pì, gbɛ̃ kũ ò lòko lía bi láari pↄ́mɛ. 14 Abire kɛ̀ lɛ de arubarika kũ Luda dà Ibrahĩgu le à gↄ̃ buri pãndenↄnɛ Kirisi Yesu gãimɛ, de ò Nini kũ Luda a lɛ́ sɛ̀ le a náanikɛna yãi.

15 Ma gbɛ̃nↄ, bisãsiri yãkɛna takan matɛn oárɛ. Tó gbɛ̃ lɛ́gbɛɛ dìtɛ, akũsↄ̃ à sèedadenↄ vĩ, oni fↄ̃ ò gbororo, oni fↄ̃ ò yãke karanlo. 16 Lɛn Luda lɛ́ sɛ̀ Ibrahĩnɛ lɛ kũ a burio.*fNaa 12:7* Luda yã takada dí pi kũ a burinↄ lákũ parin à tɛ́ḿma bàro, à pì kũ a buriomɛ. Gbɛ̃ mɛ̀n don à tɛ́a, àkũmɛ Kirisi ũ. 17 Yã kũ má ye mà on dí: Luda gĩnakɛ à lɛ́ sɛ̀nɛ yã à pì a bàka nigↄ̃ kú kãao. Wɛ̃̀ wàa pla kũ mɛ̀n baraakurio gbɛran doka sù.*fBon 12:40* Doka pì ni fↄ̃ à lɛ́sɛnaa pìi gbororo, ani fↄ̃ à a kɛ pãro. 18 Tó òdi Luda arubarika le dokakũnaa gũn, de adi bo a lɛ́sɛnaa gũn doro. Ama Luda gbɛ̃kɛ kɛ̀ Ibrahĩnɛ, kũ à a lɛ́ sɛ̀nɛ yãimɛ.*fRom 4:14* 19 Bↄ́yãi à doka dìtɛi dↄↄ? À doka kàra ari Ibrahĩ buri kũ Luda lɛ́ sɛ̀ a yã musu gↄ̃ sumɛ, de gbɛ̃nↄ le ò dↄ̃ kũ ò de taaridenↄ ũ Luda kĩnaa yãi. Luda a doka pìi kpà malaikanↄa, ò nà yãkɛkɛriinɛ a ↄĩ, à ditɛ gbɛ̃nↄnɛ. 20 Luda lɛ́sɛna sↄ̃, a yãmɛ ado, a bàka kú kũ yãkɛkɛriioro.

21 Tↄ̀, doka pìi bò Luda lɛ́sɛna kpɛn yá? Lɛnlo! Tó doka kũ àdi wɛ̃̀ndi kpáḿma kun yã, de o bo mana doka pì yãi. 22 À kɛ̃na Luda yãn ò pì, durunna gbɛ̃ sĩnda pínki kà kpɛ́n, de arubarika kũ Luda a lɛ́ sɛ̀ɛ pì le à gↄ̃ Yesu Kirisi náanikɛrinↄ pↄ́ ũ a náani kũ òtɛn kɛ pì yãi.

23 Zaade Yesunaanikɛna dí suro, doka ó ká kpɛ́n, à ó kũna purusunanↄ ũ ari Yesunaanikɛna kũ àtɛn su gɛ̀ɛ à bòo gupuraa. 24 Lɛn doka pì de ó gwàri ũ lɛ yã ari Kirisi gↄ̃ su, de ò bo mana a náanikɛna yãi. 25 Lákũ Yesunaanikɛnaa sù nà sà, o bo ó gwàri yãn.

26 Kunna Kirisi Yesu gũn á de Luda nɛ́nↄ ũ á pínki a náani kũ átɛn kɛ yãi, 27 zaakũ ákↄ̃nↄ kũ a da'itɛ kɛ̀ Kirisi pↄ́ ũnↄ, a Kirisi dàa sɛ̀tɛ. 28 Yudanↄ kũ buri pãndenↄ, zↄ̀nↄ kũ zĩdadenↄ, gↄ̃gbɛ̃nↄ kũ nↄgbɛ̃nↄn donadona kↄ̃nɛro, zaakũ á pínki pↄ́ dokↄ̃nↄn á ũ kunna Kirisi Yesu gũn. 29 Tó á de Kirisi pↄ́ ũ, á de Ibrahĩ burinↄ ũmɛ, akũsↄ̃ á de arubarika kũ Luda a lɛ́ sɛ̀nɛɛ blèrinↄ ũ.*fRom 4:13*

<- GALATIANƆ 2GALATIANƆ 4 ->