Esekiɛli 32

Bɑ koo Egibitigibu

kɑ ben sinɑ boko gɔɔ swĩiyɑ

1 Isirelibɑn yorun wɔ̃ɔ wɔkurɑ yirusen suru wɔkurɑ yirusen tɔ̃ɔ gbiikiru sɔɔrɑ Yinni Gusunɔ u nɛɛ, 2 tɔnun bii, ɑ gɔɔ swĩiyɔ Egibitin sunɔn sɔ̃. A nùn sɔ̃ɔwɔ ɑ nɛɛ,

wee u sɑ̃ɑwɑ nge gbee sunɔ kpɛmbu bwesenun suunu sɔɔ.

Mɑ u mɑɑ sɑ̃ɑ nge kɑrɑku nim wɔ̃ku sɔɔ.

U rɑ tii kpɑre dɑɑ ten nim sɔɔ

kpɑ u ten nim buri kɑ nɑɑsu

kpɑ ten kurenu nu soonɑ.

3 Yen sɔ̃, ɑmɛniwɑ nɛ, Yinni Gusunɔ nɑ gerumɔ. Nɑ nɛɛ, kon nùn nɛn yɑ̃ɑkororu suremɑ sɑnɑm mɛ tɔn dɑbinu nu mɛnnɛ kpɑ bu nùn gɑwɑ bu yɑrɑmɑ. 4 Kon nùn yɑrɑwɑ kɑsɑɔ kpɑ n nùn kɔ̃ yɑkɑsɔ. Kon dewɑ gunɔsu su nɑ su sinɑ win wɔllɔ kpɑ gbeeku yɛɛ yi nùn di. 5 Kon win yɑɑ yɑriwɑ guunu wɔllɔ kpɑ n ye yɑ tie tɑɑsi wɔwi sɔɔ. 6 Kon de win yɛm mu n yɑri tem mɛ̀ sɔɔ u wɑ̃ɑ sere kɑ guunɔ kpɑ yɛm mu n yibɑ mɛn wɔwi sɔɔ. 7 Sɑnɑm mɛ u koo gbi, kon de wɔllu tu tĩrɑ. Kon kperin yɑm bururɑm go kpɑ guru wiru tu sɔ̃ɔ wukiri, kpɑ suru u ku mɑɑ yɑm bururɑsiɑ. 8 Kon wɔllun fitilɑnu kpuro go win sɔ̃. Kpɑ n de yɑm mu tĩrɑ win tem sɔɔ. Nɛ, Yinni Gusunɔwɑ nɑ yeni geruɑ. 9 Kon de bwese dɑbinu nu biti soorɑ nù n win kpeerɑbun lɑbɑɑri nuɑ, bɑɑ kɑ tem mɛ u ǹ yɛ̃. 10 Kon de bwese ni, nu n biti soore win sɔ̃. Kpɑ nin sinɑmbu bɑ n diirimɔ bɛrum sɔ̃ sɑnɑm mɛ kon nɛn tɑkobi fĩɑ ben wuswɑɑɔ. Sɑnɑm mɛ u koo kpeerɑ mi, bɑ ko n diirimɔwɑ sɑɑ kpuro sɔɔ, ben bɑɑwure u n kɑ win wɑ̃ɑru nɑnde.

11 Domi ɑmɛniwɑ nɛ, Yinni Gusunɔ nɑ gerumɔ. Nɑ nɛɛ, Bɑbilonin sinɑ bokon tɑbu kowobu bɑ koo nùn wɔri kɑ tɑkobi. 12 Kon nùn tɑbu kowo dɑmgibu be bɑ nuku kɔ̃suru bo suremɑ bu win tɔn dɑbi te go. Kpɑ Egibitin tii suɑbu bu kpe. 13 Kon win yɑɑ sɑbenu go nim bɑkɑm bɔkuɔ kpɑ tɔmbu ǹ kun mɛ yɑɑ sɑbenun nɑɑsu su ku mɑɑ nim mɛ buri. 14 Kon de mu kpunɑwɑ kpɑ mu n kokumɔ nge gum yɑrum. Nɛ, Yinni Gusunɔwɑ nɑ yeni geruɑ. 15 Nɑ̀ n derɑ Egibiti yɑ kuɑ bɑnsu mɑ nɑ yen dukiɑ gurɑ mɑm mɑm, nɑ yen tɔmbu kɑm koosiɑ, sɑɑ ye sɔɔrɑ bɑ koo giɑ mɑ nɛnɑ nɑ sɑ̃ɑ Yinni Gusunɔ.

16 Womu geniwɑ bwesenu kpuron tɔn kurɔbu bɑ koo ko Egibiti kɑ yen tɔn dɑbi ten sɔ̃. Nɛ, Yinni Gusunɔwɑ nɑ yeni geruɑ.

Bɑ koo bwese ni bɑ kɑmiɑ

gɔɔ swĩiyɑ

17 Isirelibɑn yorun wɔ̃ɔ wɔkurɑ yirusen suru wɔkurɑ yirusen sɔ̃ɔ wɔkurɑ nɔɔbuse sɔɔ, Yinni Gusunɔ u nɛɛ, 18 tɔnun bii, ɑ gɔɔ wuri koowo Egibitigibun sɔ̃ kpɑ ɑ de wunɛn gɔɔ wuri yi, yi bu sure sere tem sɔɔwɔ gɔribun wɑ̃ɑ yerɔ be kɑ bwese ni nu dɑm mɔn tɔmbu. 19 A bu sɔ̃ɔwɔ ɑ nɛɛ, bɑ tɑmɑɑ bɑ gɑbu bɛɛrɛ kerewɑ? Aɑwo! Bɑ koo dɑwɑ gɔribun wɑ̃ɑ yerɔ bɑ n kpĩ mi sɑnnu kɑ be bɑ kun Gusunɔ yɛ̃. 20 Bɑ koo wɔrukuwɑ bu kpunɑ kɑ be bɑ go tɑbu sɔɔ sɑnnu. Wee, bɑ tɑkobi womɑ kɑrɑrun di bu kɑ be kpuro go. 21 Tɑbu durɔ dɑmgii be bɑ wɑ̃ɑ gɔribun wɑ̃ɑ yerɔ kɑ be, Egibitigibun somiɔ be bɑ gu, bɑ koo nɔɔgiru suɑ bu bu dɑm koosiɑ bu nɛɛ, be wee bɑ sɑrɑmɑ be, be bɑ ǹ Gusunɔ yɛ̃. Wee bɑ kpĩ. Bɑ bu gowɑ kɑ tɑkobi.

22 Mɛyɑ Asirin sinɑ boko kɑ win tɔn dɑbinu bɑ kpĩ mɑ ben sikɑ yɑ nùn sikerenɛ. Be kpurowɑ bɑ gu tɑbu sɔɔ. 23 Siki ni, nu wɑ̃ɑwɑ sere tem sɔɔ sɔɔwɔ, mɑ nu kɑ ben sinɑ bokogiru sikerenɛ. Tɑbu sɔɔrɑ bɑ be kpuro go be, be bɑ rɑɑ nɑsie.

24 Mɛyɑ mɑɑ Elɑmun sinɑ boko kɑ win tɑbu kowobu bɑ kpĩ. Mɑ win tɑbu kowobun sikinu wigiru sikerenɛ. Be kpurowɑ bɑ go tɑbu sɔɔ be, be tɔmbɑ rɑɑ nɑsie. Bɑ ǹ Gusunɔ yɛ̃. Wee bɑ wɑ̃ɑ sikɑɔ sere tem sɔɔwɔ. Bɑ sekuru sɔɔwɑ gɔribun wɑ̃ɑ yeru mi. 25 Elɑmun sinɑ boko kɑ win tɑbu kowobu bɑ kpĩ kɑ be bɑ go tɑbu sɔɔ. Win tɑbu kowobun sikɑ yɑ wigiru sikerenɛ. Be, be bɑ ǹ Gusunɔ yɛ̃ bɑ gu tɑbu gberɔ. Beyɑ tɔmbɑ rɑɑ nɑsie. Be wee tɛ̃ bɑ kpĩ bɑ sekuru sɔɔwɑ kɑ be bɑ gu tɑɑ bii sɔɔ.

26 Mɛsɛki kɑ Tubɑli bɑ kpĩ kɑ ben tɑbu kowobu kpuro. Mɑ tɑbu kowo ben sikɑ begiɑ sikerenɛ. Be, be bɑ ǹ Gusunɔ yɛ̃ mi, bɑ guwɑ tɑbu sɔɔ. Beyɑ tɔmbɑ rɑɑ nɑsie. 27 Be, be bɑ ǹ Gusunɔ yɛ̃ mi, bɑ ǹ kɑ bu yellun tɑbu durɔ dɑmgibu mɛnnɛ bɑ sikuɑ. Bɑ duɑwɑ gɔribun wɑ̃ɑ yerɔ kɑ ben tɑbu yɑ̃nu bɑ kpunɑ ben torɑnun sɔ̃, mɑ ben tɑkobibɑ bɑ kuɑ ben leferi. N deemɑ beyɑ tɔmbu bɑ rɑɑ nɑsie. 28 Nge mɛyɑ Egibitigibu bɑ koo mɑɑ gbisuku kpɑ bu bu sike tɔn be bɑ ǹ Gusunɔ yɛ̃n suunu sɔɔ be, be bɑ go tɑbu gberɔ.

29 Edɔmubɑ kɑ ben sinɑ ɑsɑkpɔbu ben tii bɑ wɑ̃ɑ gɔribun wɑ̃ɑ yeru mi. Bɑɑ mɛ bɑ wɔrugɔru mɔ, bɑ bu gowɑ. Wee bɑ bu sikuɑ kɑ be bɑ ǹ Gusunɔ yɛ̃ sɑnnu.

30 Sɔ̃ɔ yɛ̃sɑn nɔm geu giɑn sinɑmbu kɑ sere Sidonigibu bɑ sɑrɑ bɑ dɑ gɔribun wɑ̃ɑ yerɔ. Wee tɔn be, bɑ wɑ̃ɑ sekuru sɔɔ bɑɑ mɛ bɑ rɑɑ bu nɑsie ben wɔrugɔrun sɔ̃. Adɑmɑ tɛ̃, bɑ dɑ bɑ kpĩ kɑ be bɑ go tɑbu sɔɔ sɑnnu be, be bɑ ǹ Gusunɔ yɛ̃ mi. Bɑ sekuru sɔɔwɑ gɔribun wɑ̃ɑ yeru mi.

31 Egibitin sinɑ boko u koo bu wɑ kpɑ win lɑɑkɑri yu kpunɑ win tɔn dɑbi ten sɔ̃ kɑ win tɑbu kowobun sɔ̃ be bɑ go tɑbu sɔɔ. Nɛ, Yinni Gusunɔwɑ nɑ yeni geruɑ. 32 Nɑ derɑ tɔmbu bɑ rɑ n bɛrum soore Egibitin sinɑ boko win sɔ̃. Adɑmɑ tɛ̃, wi kɑ win tɑbu kowo be bɑ gu tɑbu sɔɔ, bɑ koo bu sikewɑ be bɑ ǹ Gusunɔ yɛ̃n suunu sɔɔ. Nɛ, Yinni Gusunɔwɑ nɑ yeni geruɑ.

Yinni Gusunɔ u Esekiɛli kuɑ

Isirelibɑn kirɔ kowo

(I mɑɑ mɛɛrio 3:16-21)

<- Esekiɛli 31 Esekiɛli 33 ->