BONAA 9

Pↄ́kãdenↄ gaganaa

1 Dikiri pì Musanɛ: Ǹ gɛ́ ǹ Firi'auna le ǹ onɛ Dikiri Eberunↄ Luda pì, à ma gbɛ̃nↄ gbarɛ ò gɛ́ donyĩ kɛmɛnɛ. 2 Tó à gì ń gbarɛi, tó à kpɛ́ ń kũna ari tera, 3 mani ↄ tↄ̃ a pↄ́kãdenↄa a buran. Mani gagagyã pãsĩ ká a sↄ̃nↄn kũ a zaakinↄ kũ a lakuminↄ kũ a zùnↄ kũ a sãnↄ kũ a blènↄ. 4 Mani Isaraila pↄ́kãdenↄ dↄ̃kↄ̃nɛ kũ Misilanↄ pↄ́nↄo. Isarailanↄ pↄ́kãdenↄ ke ni garo. 5 Makũ Dikiri ma a gↄrↄ dìtɛ. Zian mani abire kɛ bùsun la.

6 Kũ gu dↄ̀, akũ Dikiri kɛ̀ lɛ. Misilanↄ pↄ́kãdenↄ gàga pínki, ama Isarailanↄ pↄ́kãdenↄ ke dí garo. 7 Firi'auna yã kũ à kɛ̀ pìi gbɛ̀ka, à mà Isarailanↄ pↄ́kãdenↄ ke dí garo, ama a sã kpɛ́ gbãna, à gì gbɛ̃ pìnↄ gbarɛi.

Bↄ̀bũnu kana Misilanↄgu

8 Dikiri pì Musanɛ kũ Harunao: À tãmakpɛ túbu dã okũ dodo, Musa fã Firi'auna arɛ. 9 Ani da Misila bùsula pínki lán lukutɛ̃ bà, ani kɛ bisãsirinↄnɛ kũ nↄ̀bↄnↄ bↄ̀bũnu ũ gu sĩnda pínkia. 10 Akũ ò tãmakpɛ túbu sɛ̀tɛ ò gɛ̀ɛo Firi'auna kĩnaa. Kũ Musa túbu pìi fã̀ musu, akũ à kɛ̀ bisãsirinↄnɛ kũ nↄ̀bↄnↄ bↄ̀bũnu ũ. 11 Ɛzɛdenↄ dí fↄ̃ ò gɛ̀ɛ Musa kĩnaaro bↄ̀bũnu pìnↄ yãi, zaakũ à dàńla kũ Misilanↄ ń pínki. 12 Akũ Dikiri Firi'auna kùu kɛ̀ gbãna, lákũ à ò Musanɛ nà, akũ à gì ń yã mai.

Legũgbɛ manaa

13 Dikiri pì Musanɛ: Ǹ futɛ kↄnkↄkↄnkↄ ǹ gɛ́ ǹ Firi'auna le, ǹ onɛ makũ Dikiri Eberunↄ Luda ma pì, à ma gbɛ̃nↄ gbarɛ ò gɛ́ donyĩ kɛmɛnɛ. 14 Tera sà mani yã pãsĩ pínki daala kũ a ìbanↄ kũ a gbɛ̃nↄ, de àgↄ̃ dↄ̃ kũ andunia gũn pínki gbɛ̃ke de lán ma bàro. 15 Zaakũ tó ma ↄ tↄ̃̀ḿma ma gagagyã kàńgu yã, de àkũ kũ a gbɛ̃nↄ làka andunia gũn. 16 Ma a kà kpatan de mà a gbãna mↄnɛ, ò ma tↄ́ kpá andunia gũn pínki. 17 Lákũ àtɛni a zĩda bi, à gì ma gbɛ̃nↄ gbarɛi ari tera, 18 zia mandara'i mani tó legũgbɛ pãsĩ ma manamana, legũgbɛ kũ a taka buri dí ma Misila zikiro zaa lákũ ò a kàtɛ nà ari kũ a gbãrao. 19 Ǹ onɛ à gbɛ̃nↄ zĩ ò a pↄ́kãdenↄ kũ pↄ́ kũ à vĩ buranↄ sɛ́tɛ ò káka kpɛ́n pínki. Bisãsirinↄ kũ pↄ́ kũ ò kú bàainↄ, tó òdi gɛ̃ kũńwo kpɛ́nlo, legũgbɛ ni maḿma oni gagamɛ.

20 Firi'auna ìba kenↄ vĩna kɛ̀ Dikiri yãnɛ, ò ń zĩkɛrinↄ kũ ń pↄ́kãdenↄ kàka kpɛ́n. 21 Ama gbɛ̃ kũ odi Dikiri yã daronↄ ń zĩkɛrinↄ kũ ń pↄ́kãdenↄ tò bàai. 22 Akũ Dikiri pì Musanɛ: Ǹ ↄ sɛ́ musu, legũgbɛ ni ma bisãsirinↄ kũ pↄ́kãdenↄ kũ burapↄnↄa Misila bùsu gu sĩnda pínkia. 23 Kũ Musa a gòo dↄ̀ musu, Dikiri tò legũ tɛn pũtã, àtɛn ma kũ gbɛ̀ɛo, àtɛn pí, akũ sura tɛn kipa zĩtɛ. Dikiri legũgbɛ kà Misilanↄgu. 24 Legũgbɛ tɛn ma, legũ tɛn pí. Legũgbɛ pì pãsĩ. Zaa lákũ Misila bùsu kun nà, legũ dí taka buri dí ma zikiro. 25 Legũgbɛɛ pì pↄ́ kũ ò kú bàai Misila bùsu gũnnↄ ásaru kɛ̀ pínki, bisãsirinↄ kũ pↄ́kãdenↄ kũ burapↄnↄ pínki. À sɛ̃̀ntɛ línↄ ɛ̀'ɛ pínki. 26 Gosɛ̃ bùsu gu kũ Isarailanↄn kunn legũgbɛɛ pì dí kánlo ado.

27 Firi'auna Musa kũ Harunao sìsi à pìńnɛ: Tera sà ma durunna kɛ̀. Dikiri yã mɛ́ à nna, makũ kũ ma gbɛ̃nↄ taaridenↄn ó ũ. 28 À kútɛ kɛnɛ. Legũpũtãna kũ legũgbɛ díkĩnao mↄ̀ lɛ. Mani á gbarɛ sa, mani gíárɛ doro. 29 Musa pìnɛ: Tó ma bo wɛ̃tɛ kpɛ, mani ma ↄnↄ sɛ́ lei gɛna Dikiri kĩnaa, legũpũtãna ni zɛ, legũgbɛ ni láka, de ǹgↄ̃ dↄ̃ kũ zĩtɛ bi Dikiri pↄ́mɛ. 30 Ama má dↄ̃ kũ mↄkↄ̃n kũ n ìbanↄ, átɛn vĩna kɛ Dikiri Ludanɛro ari tera.

31 Nagã kũ gbadoo yàka, zaakũ nagã gĩnakɛ à pìa, gbado mure bò. 32 Ése kũ werao dí yakaro, kũ òdi ma kpɛkpɛ yãi. 33 Musa bò Firi'auna kĩnaa à gɛ̀ɛ wɛ̃tɛ kpɛ, à a ↄnↄ sɛ̀ lei gɛna Dikiri kĩnaa, akũ legũpũtãna kũ legũgbɛɛo zɛ̀, legũ dí ma doro. 34 Kũ Firi'auna è legũ kũ legũgbɛɛo kũ legũpũtãnaao zɛ̀, akũ à kpɛ́ àtɛn durunna kɛ, a sã kpɛ́ gbãna, àkũ kũ a ìbanↄ. 35 A kù kpɛ́ gbãna à gì Isarailanↄ gbarɛi, lákũ Luda dà Musanɛ à ònɛ nà.

<- BONAA 8 BONAA 10 ->