1 Akũ Dikiri pì Musanɛ: Ǹ gɛ́ ǹ o Firi'aunanɛ, makũ Dikiri ma pì à ma gbɛ̃nↄ gbarɛ ò gɛ́ donyĩ kɛmɛnɛ. 2 Tó à gì ń gbarɛi sↄ̃, mani tó blↄ̀nↄ da a bùsu gu sĩnda pínki la. 3 Blↄ̀nↄ ni Nili pa ari ò bikũ bara, ò gɛ̃ a ↄnn ari a kpɛ́n, ò didi a gádoa. Ò gɛ̃ a ìbanↄ ↄnnↄ gũn kũ a gbɛ̃nↄ ↄnnↄ. Ò ká a kĩninↄ kũ a gónↄ gũn. 4 Blↄ̀nↄ ni didia kũ a gbɛ̃nↄ kũ a ìbanↄ ń pínki.

5 Dikiri ɛ̀ra à pì Musanɛ: Ǹ o Harunanɛ à a gò sɛ́ à dↄ swanↄla kũ swa'ↄnɛnↄ kũ ísɛ̃bokinↄ, blↄ̀nↄ ni da Misila bùsula. 6 Kũ Haruna a gòo dↄ̀ Misila ínↄla, akũ blↄ̀nↄ bↄ̀tɛ ò dà bùsuu pìla. 7 Akũ ɛzɛde pìnↄ kɛ̀ lɛ se ń ɛzɛdekɛ gũn, ò tò blↄ̀nↄ dà Misilala.

8 Akũ Firi'auna Musa kũ Harunao sìsi à pì: À kútɛ kɛ Dikirinɛ à blↄ̀nↄ kɛ̃ma kũ ma gbɛ̃nↄ, mani á gbɛ̃nↄ gbarɛ ò gɛ́ sa oa. 9 Akũ Musa pì Firi'aunanɛ: Ǹ gↄrↄ ditɛmɛnɛ mà kútɛ kɛnnɛ Dikirinɛ kũ n ìbanↄ kũ n gbɛ̃nↄ, de à blↄ̀nↄ kɛ̃mma kũ n ↄnnↄ ògↄ̃ kú swai ado. 10 Firi'auna pì: Zia. Akũ Musa pì: Ani kɛ lákũ n ò nà, de ǹgↄ̃ dↄ̃ kũ gbɛ̃ke de lán Dikiri ó Luda bàro. 11 Blↄ̀nↄ ni kɛ̃mma kũ n ↄnnↄ kũ n ìbanↄ kũ n gbɛ̃nↄ ògↄ̃ kú swai ado.

12 Kũ Musa kũ Harunao bò Firi'auna kĩnaa, Musa wɛ́ kɛ̀ Dikiria blↄ̀ kũ ò dà Firi'aunalanↄ yã musu. 13 Dikiri Musa wɛ́kɛ sì, akũ blↄ̀nↄ gàga kpɛ́nↄ gũn kũ ↄnnↄ kũ buranↄ. 14 Ò ń kákara, akũ bùsu gbĩ sↄ̃̀ pínki. 15 Kũ Firi'auna è à kɛ̀ sã̀na, a sã kpɛ́ gbãna, akũ à gì Musa kũ Harunao yã mai lákũ Dikiri ò nà.

16 Dikiri pì Musanɛ: Ǹ o Harunanɛ à a gò sɛ́ à zĩtɛ lɛ́o, bùsutiti ni li sàa ũ Misila gu sĩnda pínkia. 17 Akũ ò kɛ̀ lɛ. Haruna a gòo sɛ̀ à zĩtɛ lɛ̀o, akũ bùsutiti lì sàanↄ ũ, ò dà bisãsirinↄla kũ nↄ̀bↄnↄ. Misila bùsutiti lì sàanↄ ũ pínki. 18 Ɛzɛdenↄ yↄ̃̀ ò gwà se ń ɛzɛdekɛ gũn, akũ ò fùa. Sàanↄ dà bisãsirinↄla kũ nↄ̀bↄnↄ. 19 Akũ ɛzɛdenↄ pì Firi'aunanɛ: Luda ↄgbɛɛmɛ. Ama Firi'auna sã kpɛ́ gbãna, à gì ń yã mai lákũ Dikiri ò nà.

20 Dikiri pì Musanɛ: Ǹ futɛ kↄnkↄkↄnkↄ ǹ gɛ́ ǹ Firi'auna le gↄrↄ kũ àtɛn gɛ́ swai, ǹ onɛ makũ Dikiri ma ò, à ma gbɛ̃nↄ gbarɛ ò gɛ́ donyĩ kɛmɛnɛ. 21 Tó à gì ń gbarɛi, mani ífĩninↄ daala kũ a ìbanↄ kũ a gbɛ̃nↄ kũ a kpɛ́nↄ. Misila kpɛ́nↄ ni pa kũ ífĩninↄ, bee zĩtɛ oni daala. 22 Gↄrↄ birea mani Gosɛ̃ bùsu gu kũ ma gbɛ̃nↄn kun bo ado. Gwen ífĩninↄ ni dan gularo, de àgↄ̃ dↄ̃ kũ makũmɛ Dikiri ũ a bùsun. 23 Mani ma gbɛ̃nↄ dↄ̃kↄ̃nɛ kũ a gbɛ̃nↄ. Zian sèedaa pì ni kɛ.

24 Akũ Dikiri kɛ̀ lɛ. Ífĩninↄ kà Firi'auna ↄnn kũ a ìbanↄ ↄnnↄo. Misila yàka pínki ífĩninↄ yãi. 25 Akũ Firi'auna Musa kũ Harunao sìsi à pì: À gɛ́ sa o á Ludaa bùsun la. 26 Akũ Musa pìnɛ: Ani sí kɛ ò kɛ lɛro, zaakũ pↄ́ kũ óni sa o Dikiri ó Ludaa pì de Misilanↄnɛ tɛ̃̀ ũmɛ. Tó o sa ò kũ pↄ́ kũ à deńnɛ tɛ̃̀ ũo ń wára, oni ó pápa kũ gbɛ̀ɛo ò ó dɛdɛroo? 27 Óni táa o gbárannan gↄrↄ aakↄ̃mɛ, gbasa ò sa o Dikiri ó Ludaa lákũ à òwɛrɛ nà. 28 Akũ Firi'auna pì: Mani á gbarɛ à gɛ́ sa o Dikiri a Ludaa gbárannan, ama àsun gɛ́ zã̀ro. À kútɛ kɛnɛmɛnɛ. 29 Musa pìnɛ: Tó ma ta, mani kútɛ kɛnɛ, ani ífĩninↄ kɛ̃mma zia kũ n ìbanↄ kũ n gbɛ̃nↄ. Ama ǹsun manafiki kɛ doro. Ǹ tó gbɛ̃nↄ gɛ́ sa o Dikiria. 30 Kũ Musa bò Firi'auna kĩnaa, a kútɛ kɛ̀nɛ Dikirinɛ. 31 Dikiri a wɛ́kɛ sì, akũ ífĩninↄ kɛ̃̀ Firi'aunaa kũ a ìbanↄ kũ a gbɛ̃nↄ. Adi gↄ̃ gukearo, bee mɛ̀n do. 32 Ama Firi'auna sã kpɛ́ gbãna ari tera, à gì ń gbarɛi.

<- BONAA 7BONAA 9 ->