1 Akũ Dikirii pì Musanɛ: Ǹ gwa! Ma n kɛ lán ma bà Firi'aunanɛ, akũsↄ̃ n vĩ̀ni Haruna de n lɛ́gbɛkpari ũ. 2 Ǹ yã kũ ma ònnɛ pínki o n vĩ̀ni Harunanɛ, ani o Firi'aunanɛ à Isarailanↄ gbarɛ ò bↄtɛ a bùsun. 3 Bee kũ abireo mani a kù kɛ gbãna. Mani sèedanↄ kũ daboyãnↄ kɛ Misila dasi, 4 ama Firi'auna ni á yã maro. Mani ↄ tↄ̃ Misilaa mà yãkpatɛ kɛ kũńwo pãsĩpãsĩ, mani bo kũ ma zĩ̀kari Isarailanↄ gã̀ kũ gã̀ao. 5 Tó ma bo kũ ma gbãnao Misilaa, mani Isarailanↄ bↄtɛn, Misilanↄ ni dↄ̃ sà kũ makũmɛ Dikiri ũ. 6 Akũ Musa kũ Harunao kɛ̀ lákũ Dikiri òńnɛ nà. 7 Gↄrↄ kũ ò yã ò Firi'aunanɛ, Musa kun wɛ̃̀ basiikↄ̃, Haruna sↄ̃ wɛ̃̀ basiikↄ̃ awɛɛ'aakↄ̃.

8 Akũ Dikiri pì Musanɛ kũ Harunao: 9 Tó Firi'auna daboyã gbɛ̀kamma, ǹ o Harunanɛ à a gò sɛ́ à pãtɛ a arɛ, ani li mlɛ̃̀ ũ. 10 Kũ Musa kũ Harunao gɛ̀ɛ Firi'auna kĩnaa, ò kɛ̀ lákũ Dikiri òńnɛ nà. Haruna a gòo sɛ̀ à pã̀tɛ Firi'auna kũ a ìbanↄ arɛ, akũ à lì mlɛ̃̀ ũ. 11 Akũ Firi'auna Misila wɛ́zɛ̃rinↄ kũ ɛzɛdenↄ sìsi, akũ ò daboyã dokↄ̃nↄ pìnↄ kɛ̀ se ń ɛzɛdekɛ gũn. 12 Kũ ń baadi a gòo pã̀tɛ, akũ ń gòo pìnↄ lì mlɛ̃̀nↄ ũ, akũ Haruna gò ń pↄ́nↄ mↄ̀mↄ. 13 Firi'auna sã gbãnamɛ, adi ń yã maro lákũ Dikiri ò nà.

14 Dikiri pì Musanɛ: Firi'auna kù gbãna à gì gbɛ̃nↄ gbarɛi. 15 Ǹ gɛ́ ǹ a le zia kↄnkↄ gↄrↄ kũ àtɛn gɛ́ swai. Ǹgↄ̃ a dã Nili sarɛ gwe. Ǹgↄ̃ n gò kũ à lì mlɛ̃̀ ũ pì kũna. 16 Ǹ pinɛ makũ Dikiri Eberunↄ Luda ma n zĩa, n ònɛ à ma gbɛ̃nↄ gbarɛ ò gɛ́ donyĩ kɛmɛnɛ gbárannan, ama ari tera à gìmai. 17 Makũ Dikiri ma pì, yã kũ ani tó àgↄ̃ dↄ̃ kũ makũmɛ Dikiri ũn dí. Tó n Nili í lɛ̀ kũ gò kũ ń kũnaao, ani li aru ũ. 18 Kpↄ̀ kũ ò kú í pìi gũnnↄ ni gaga, Nili í ni gbĩ sↄ̃, Misilanↄ ni fu í pì minaa.

19 Akũ Dikiri ɛ̀ra à pì Musanɛ: Ǹ o Harunanɛ à a gò sɛ́ à dↄ Misila ínↄ la, ń swanↄ kũ ń swa'ↄnɛnↄ kũ ń ísɛ̃bokinↄ kũ ń íkakinↄ pínki ni gↄ̃ aru ũ. Aru nigↄ̃ dagula Misila, bee kũ kpɛ̃nɛnↄ kũ orozã gũnnↄ.

20 Akũ Musa kũ Harunao kɛ̀ lákũ Dikiri òńnɛ nà. Haruna a gòo pìi sɛ̀, à Nili í lɛ̀o Firi'auna kũ a ìbanↄ wára, akũ í pìi gↄ̃̀ aru ũ pínki. 21 Kpↄ̀ kũ ò kú a gũnnↄ gàga, akũ Nili í pì gbĩ sↄ̃̀, Misilanↄ fùa ò mi. Aru dàgula Misila. 22 Misila ɛzɛdenↄ kɛ̀ lɛ se ń ɛzɛdekɛ gũn, akũ Firi'auna kùgbãna kũ̀, adi ń yã maro lákũ Dikiri ò nà. 23 Firi'auna ɛ̀ra à tà a bɛa, adi yã pì da sero. 24 Misilanↄ bia yↄ̃̀yↄ̃ Nili bara de ò í mi, zaakũ odi fↄ̃ ò swada'i mìro. 25 À kun lɛ ari gↄrↄ supplamɛ Dikiri Nili lɛnaa gbɛra.

<- BONAA 6BONAA 8 ->