BONAA 33

1 Dikiri pì Musanɛ: Ǹ futɛ ǹ go la, mↄkↄ̃n kũ gbɛ̃ kũ n bo kũńwo Misilanↄ, ǹ gɛ́ kũńwo bùsu kũ ma la dà Ibrahĩnɛ kũ Isaakuo kũ Yakubuo ma pì mani kpá ń burinↄan. 2 Mani malaika gbarɛ à doárɛ arɛ mani pɛ́árɛ Kanaanↄa kũ Amↄrinↄ kũ Itinↄ kũ Pɛrizinↄ kũ Ivinↄ kũ Yebusinↄo. 3 À gɛ́ bùsu kũ vĩ kũ zↄ́'io din pìi gũn. Ama mani gɛ́ kãáoro, de màsun á kakatɛ zɛ́nlo yãi, zaakũ sãgbãnadenↄn á ũ. 4 Kũ gbɛ̃nↄ yã pãsĩ pìi mà, ò ↄ́ↄ dↄ̀, akũ gbɛ̃ke dí a zãblebↄnↄ da doro. 5 Zaakũ Dikiri gĩnakɛ à yã ò Musanɛ à o Isarailanↄnɛ à pi: Sãgbãnadenↄmɛ ń ũ, bee tó ma táa ò kũńwo gɛ̀sɛ do, mani ń kakatɛ. Ń baadi ń zãblebↄnↄ bobo, manigↄ̃ dↄ̃ deran mani kɛ kũńwo nà. 6 Akũ Isarailanↄ ń zãblebↄnↄ bòbo, odi da doro zaa Orɛbu kpi kĩnaa.

7 Musa dì bizakuta sɛ́ à gɛ́ dↄ bùra kpɛ boruna kũ bùraa pìio fíti. À tↄ́ kpà kuta pìinɛ dakarɛki kuta. Gbɛ̃ kũ à ye Dikiri yãi ade dì bo à gɛ́ dakarɛki kuta pì kĩnaa bùra kpɛ gwe. 8 Tó Musa bò àtɛn gɛ́ kpɛ́ pì kĩnaa, baadi dì bo à zɛ a kpɛ́lɛlɛa àgↄ̃ a gwa ari à gɛ́ à gɛ̃n. 9 Tó Musa gɛ̃̀ kpɛ́ pìn, tɛ́luku dì kipa àgↄ̃ dↄ kpɛ́lɛlɛa, akũ Dikiri dì yã o kãao. 10 Tó gbɛ̃nↄ è tɛ́luku pì dↄ kpɛ́lɛlɛ pìia, baadi dì donyĩ kɛ a kpɛ́lɛlɛa. 11 Dikiri dì yã o kũ Musao tɛ̃tɛ̃ntɛ̃, lákũ gbɛ̃ dì yã o kũ a gbɛ̃nnao nà. Musa dì ɛra à su bùran, ama Nuni nɛ́ Yↄsua a kpàasi dì bo kpɛ́ pìi gũnlo.

Dikiri bo à suna Musaa

12 Musa pì Dikirinɛ: N pìmɛnɛ mà gɛ́ kũ gbɛ̃ pìnↄ, ama ńdi gbɛ̃ kũ ntɛn damɛnɛ omɛnɛro. N pìmɛnɛ yã ń ma dↄ̃ n gbɛ̃nna ũ akũsↄ̃ ma n pↄnna lè. 13 Zaakũ ma n pↄnna lè, ǹ tó mà n laasunnↄ dↄ̃ sà, de mà le màgↄ̃ n dↄ̃ màgↄ̃ nna kũnwo yãpura. Ǹgↄ̃ dↄ̃ kũ buri díkĩna bi n gbɛ̃nↄmɛ. 14 Akũ Dikiri wèa à pì: Ma wɛ́ nigↄ̃ tɛ́ái mà á gba kámmabonaa. 15 Musa pì: Tó ńdi wɛ́ tɛ́wáiro, ǹsun ó futɛ laro. 16 Tó ńdi gɛ́ kũooro, deran oni le ò dↄ̃ kũ makũ kũ n gbɛ̃ pìnↄ ó nna kũnwoo? Oni ó dↄ̃kↄ̃nɛ kũ buri pãndenↄ andunia gũn deramɛɛ? 17 Dikiri pìnɛ: Yã kũ n gbɛ̀kama pì mani kɛ, zaakũ n ma pↄnna lè, má n dↄ̃ ma gbɛ̃nna ũ.

18 Musa pì: Ǹ n gakuri mↄmɛnɛ. 19 Akũ Dikiri wèa à pì: Mani tó ma manakɛ pínki gɛ̃ n arɛ, mani ma tↄ́ Dikiri sísi n arɛ, zaakũ gbɛ̃ kũ má ye mà sùru kɛ kãaon mani kɛ kãao, akũsↄ̃ gbɛ̃ kũ má ye mà wɛ̃nda dↄ̃nɛn mani dↄ̃nɛ. 20 Akũ à pì: Ĩni fↄ̃ ǹ ma ãn gwaro, zaakũ bisãsiri ni fↄ̃ à wɛ́ simalɛ àgↄ̃ kunlo. 21 Dikiri pì: Ǹ gu gwa da ma sarɛ la. Ǹ zɛ gbɛ̀ɛ musu gwe. 22 Tó ma gakuri pì tɛn gɛ̃, mani n sↄtↄ gbɛ̀sↄkↄn mà a ↄ kúnla ari mà gɛ̃tɛ. 23 Tó ma a ↄ gònla, ĩni ma kpɛ kpa e sà, ama oni fↄ̃ ò ma ãn ero.

<- BONAA 32 BONAA 34 ->